១១ជំហាន ជួយឱ្យអ្នករកសង្សារបាន ទោះគ្មានលុយវាល់លាន!

2019-12-24 06:46:50
ស្នេហា

2019-12-24 06:46:50
ចំនួនមតិ 0 | ចំនួនចែករំលែក 0

ចន្លោះមិនឃើញ

“ឥលូវវ័យពាក់កណ្ដាល២០ ឬជិត៣០ឆ្នាំហើយ រកសង្សារម្នាក់មិនបានសោះ! មើល៍អាពួកម៉ាក...ជួយរកឱ្យគ្នាមួយមើល៍វី! គ្នាខំរកដែរ តែរកអត់បានសោះ! ប្រាប់វិធីសាស្ត្រដល់គ្នាខ្លះផងអ្ហា៎?”

អ្វីទាំងនេះអ្នកអាចនឹងធ្លាប់ឮ ហើយក៏អាចធ្លាប់និយាយលេងសើចជាមួយមិត្តភ័ក្ដិដែរ មែនអត់? មិនអីទេ! បើអ្នកកំពុងជួបបញ្ហានេះ ហើយចង់ដោះស្រាយនោះ អាចសាកល្បងតាមវិធីសាស្រ្ដទាំង១១ ដូចខាងក្រោម៖

ជំហានទី១៖ ស្រលាញ់ខ្លួនអ្នកជាមុនសិន

ត្រូវថែរក្សាខ្លួនអ្នកជាមុនសិន មុនធ្វើឱ្យនារីណាម្នាក់ស្រលាញ់អ្នក។ អ្នកត្រូវសំអាតខ្លួនប្រាណឱ្យស្អាត ស្លៀកពាក់ឱ្យបានស្អាត ធ្វើលំហាត់ប្រាណ ញ៉ាំឱ្យគ្រប់គ្រាន់ ដើម្បីឱ្យខ្លួនអ្នករឹងមាំ និងសុខភាពល្អ។

ជំហានទី២៖ កែប្រែខ្លួនអ្នកជាមុនសិន

បើអ្នកនៅធ្វើទម្លាប់ដដែលៗ ឧទាហរណ៍ដូចជា លេងហ្គេម Angry Birds ពេញមួយថ្ងៃ នោះអ្នកមិនអាចទាក់ទាញស្រីៗមកស្រលាញ់អ្នកទេ។ មនុស្សដែលអភិវឌ្ឍខ្លួនតាមផ្លូវផ្សេងៗ និងរៀនអ្វីថ្មីៗ តែងទទួលបានការចាប់អារម្មណ៍ច្រើនពីមនុស្សស្រី ដូច្នេះចូរស្វែងយល់ពីអ្វីដែលថ្មី ធ្វើអ្វីប្លែកៗសម្រាប់ខ្លួន នោះអ្នកនឹងទទួលបានការចាប់អារម្មណ៍មិនខាន។

ជំហានទី៣៖ ជ្រើសរើសនារីដែលត្រូវនឹងអ្នក

ទំនាក់ទំនងស្នេហារវាងបុរសនឹងស្ត្រី ត្រូវធ្វើឡើងដោយចិត្ត និងចិត្ត មិនមែនបង្ខំទេ។ អ្នកត្រូវគិតឱ្យច្បាស់ពីគោលដៅអ្នកចង់បានថា នារីបែបណាសមនឹងអ្នក។ ចំណែកនាងអាចទទួលយកអ្នកអត់? បុរសមួយចំនួនច្រើនខូចចិត្ត ព្រោះតែពួកគេយល់ថា៖ "នាងចូលចិត្តខ្ញុំ នាងស្អាត មានទំនាក់ទំនងល្អជាមួយខ្ញុំ។ ខ្ញុំគិតថា នាងស្រលាញ់ខ្ញុំ"។ ទីបញ្ចប់ពួកគេត្រូវក្អួតឈាម ព្រោះគេអត់ស្រលាញ់ ហើយត្រូវអង្គុយខូចចិត្តតែម្នាក់ឯង។

ជំហានទី៤៖ បង្ហាញគុណតម្លៃគួរឱ្យស្រលាញ់របស់អ្នក

ត្រង់ចំណុចនេះ គឺចង់ឱ្យអ្នកធ្វើជាមនុស្សចិត្តល្អ និងចេះយកអសារ។ ពេលខ្លះក្ដីស្រលាញ់ កើតចេញពីគុណតម្លៃច្រើនជាងអ្វីៗទាំងអស់ ថែមទាំងលុយ និងសម្ភារៈនិយម។

ជំហានទី៥៖ ចេះកំប្លែង

នារីចូលចិត្តអ្វី Funny Funny ហើយបើអ្នកចេះកំប្លែងទៀតនោះ ភាគរយដែលនាងមានចិត្តលើអ្នក អាចមានច្រើន។ ចូរហាត់និយាយរឿងកំប្លែង ឱ្យមិត្តភ័ក្ដិស្ដាប់ឱ្យបានញឹកញាប់។

ជំហានទី៦៖ បង្កើនការប្រលែងលេងឱ្យបានច្រើន

ចំណុចនេះស្រដៀងចំណុចខាងលើដែរ។ ការលេងសើចច្រើន អាចជាចំណុចទាក់ទាញដ៏មានប្រសិទ្ធភាពមួយ ប៉ុន្តែកុំជ្រុលហួសហេតុ ដែលបង្កឱ្យមានរឿងមិនល្អផ្សេងៗកើតឡើង។

HappyAsianCoupleWalkingOnBeach-850x400

ជំហានទី៧៖ បង្កើតបរិយាកាសសង្គម ឱ្យមានភាពទាក់ទាញ

អ្នកត្រូវគិតពីប្រភេទនារីដែលអ្នកស្រលាញ់ ហើយសម្របខ្លួនអ្នកឱ្យត្រូវតាមស្ថានភាពរបស់នាង។ បើសិននាងចូលចិត្តហាត់ប្រាណ អ្នកត្រូវបបួលនាងទៅហាត់ប្រាណ បើនាងចូលចិត្តស្ដាប់តន្ត្រីជាដើម ចូររកបទណាពីរោះៗដែលនាងពេញចិត្ត។ ម្យ៉ាងសេពគប់មិត្តភ័ក្ដិ ក៏ជាប្រការសំខាន់ដែរ បើរាប់អានមនុស្សមនុស្សត្រូវ អ្នកនឹងត្រូវគេណែនាំនារី ដែលត្រូវនឹងអ្នក។

ជំហានទី៨៖ ស្គាល់នាងឱ្យច្បាស់

អ្នកត្រូវស្គាល់នាងឱ្យច្បាស់! ត្រូវស្វែងយល់ពីអ្វីដែលនារីក្នុងចិត្តអ្នកចូលចិត្ត និងមិនចូលចិត្ត។ បើនាងចូលចិត្តទៅមើលកុន ឬដើរលេង អ្នកត្រូវមានពេលវេលាសម្រាប់នាង។ បើនាងមិនចូលចិត្តនិយាយទូរសព្ទពេលយប់ច្រើន OK អ្នកត្រូវយល់ពីចំណុចនេះដែរ ឬ អាចនិយាយឱ្យស្រួលស្ដាប់ថា ត្រូវដឹងពីចំណុចខ្លាំង និងចំណុចខ្សោយរបស់នាង។

ជំហានទី៩៖ ត្រូវមានទំនុកចិត្តលើខ្លួនឯង

អ្នកត្រូវជឿជាក់ថា អ្នកមានតម្លៃ តែមិនត្រូវក្រអឺតក្រទម។ ស្ត្រីភាគច្រើនមិនចូលចិត្ត បុរសណាបន្ទាបបន្ថោកខ្លួនឯងឡើយ។ មើលពីភាពខ្សោយរបស់អ្នក ហើយបំពេញវាឱ្យបានល្អ តែមិនត្រូវបង្ហាញវាចេញមកក្រៅទេ។

ជំហានទី១០៖ ត្រូវចេះគោរពគំនិត អារម្មណ៍ និងចេះលើកសរសើរនាង

បើគំនិតរបស់នាងបង្ហាញលើអ្វីមួយសមហេតុផល ឬធ្វើអ្វីមួយបានល្អ អ្នកត្រូវចេះលើកទឹកចិត្ត និងសរសើរ។ មនុស្សមិនចូលចិត្តពាក្យបន្ទោសបង្អាប់ទេ តែត្រូវសរសើរឱ្យត្រូវរឿង។

ជំហានទី១១៖ ស្មោះត្រង់ចំពោះខ្លួនឯង និងនារីខ្លួនស្រលាញ់

អ្នកត្រូវតែកសាងភាពទុកចិត្ត តែការសុខចិត្តបែកបាក់ វាមិនវិលមកវិញទេ ព្រោះនាងនឹងតាមសង្ស័យអ្នកគ្រប់ពេល។ ចូរបង្ហាញបេះដូងពិតរបស់អ្នកទៅកាន់នាង មិនត្រូវបិទបាំងឡើយ៕

ក្រៅពីចំណុចទាំងប៉ុន្មានខាងលើ តើមិត្តអ្នកអានមានអ្វីចង់បន្ថែមអត់?

ប្រភព៖ Purseblog | Wiki How ប្រែសម្រួល៖ អ៊ុំ សុភក្តិ