ញាក់សាច់! អាជ្ញាធរប៉ារ៉ាហ្គាយ កំពុងឈឺក្បាលខ្លាំងក្រោយអ្នកទោសហែកគុកម្ដង ៧៥នាក់

2020-01-20 06:34:45
ព័ត៌មាន

2020-01-20 06:34:45
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរប៉ារ៉ាហ្គាយ អះអាងថាអ្នកទោសចំនួន ៧៥នាក់ បាននាំគ្នាហែកគុករត់គេចខ្លួនដោយសុវត្ថិភាពនៅពន្ធនាគារភាគខាងកើតប្រទេសជាប់ព្រំប្រទល់ជាមួយប្រេស៊ីល។

យោងតាមសារព័ត៌មានក្នុងតំបន់ឲ្យដឹងថា អាជ្ញាធរកំពុងដាក់ការសង្ស័យទៅលើបញ្ហានេះ ដោយសារអ្នកទោសភាគច្រើនត្រូវបានអនុញ្ញាតឲ្យដើរចេញដោយសេរីតាមច្រកទ្វារធំដោយឆ្មាំគុក។ ក្រុមមន្ត្រី បានរកឃើញរូងក្រោមដីមួយដែលត្រូវបានជីក ប៉ុន្តែពួកគេអះអាងថានេះគ្រាន់តែជាការបំភ័ន្តភ្នែកសម្រាប់ការហែកគុកប៉ុណ្ណោះ។ ប្រភពដដែលឲ្យដឹងទៀតថា ភាគច្រើននៃក្រុមអ្នកហែកគុកទាំងនោះ ស្ថិតនៅក្នុងក្រុមឧក្រិដ្ឋជនធំជាងគេបំផុតរបស់ប្រេស៊ីល។

ក្រោយពេលកើតហេតុ រដ្ឋមន្ត្រីក្រសួងយុត្តិធម៌ បានបញ្ជាឲ្យបញ្ឈប់ការងារ និងចាប់ខ្លួនមន្ត្រីឆ្មាំគុកទាំងអស់ដែលពាក់ព័ន្ធ។ រដ្ឋមន្ត្រី Cecilia Perez ឲ្យដឹងថា អ្នកទោសនៅជាន់ទីពីរ ក៏បានរត់គេចខ្លួនផងដែរ ដោយសារតែរបងគុករបស់ពួកគេត្រូវបានបើក។ លើសពីនេះទៀត អាជ្ញាធរបានទទួលព័ត៌មានថាការហែកគុកនេះ ត្រូវបានគ្រោងឡើងដោយបង់ប្រាក់ចំនួន ៨ម៊ឺនដុល្លារទៅឲ្យភ្នាក់ងារ ហើយនេះជាអំពើពុករលួយជាក់ស្ដែង។

គួរបញ្ជាក់ដែរថា ក្រុមឧក្រិដ្ឋជនប្រេស៊ីលនេះ មានសមាជិកជាង ៣ម៉ឺននាក់ដែលមានមូលដ្ឋានក្នុងទីក្រុង Sao Paulo ហើយជាប់ពាក់ព័ន្ធនឹងការជួញដូរអាវុធ និងថ្នាំញៀនដែលធ្វើប្រតិបត្តិការទូទាំងប្រទេស និងឈានដល់ប្រទេសក្បែរខាងប៉ារ៉ាហ្គាយ, បូលីវី និងកូឡុំប៊ីផងដែរ៕