- 2018-01-22 10:14:50
- ការអប់រំ
អាយុ២០ឆ្នាំ បើនៅលាដៃសុំលុយម៉ែង៉ូចៗ ប្រញាប់ធ្វើរឿង៥យ៉ាងនេះភ្លាម
- 2018-01-22 10:14:50
- ចំនួនមតិ 0 | ចំនួនចែករំលែក 0
អាយុ២០ឆ្នាំ បើនៅលាដៃសុំលុយម៉ែង៉ូចៗ ប្រញាប់ធ្វើរឿង៥យ៉ាងនេះភ្លាម
ចន្លោះមិនឃើញ
លោក ចាង ប៊ុនលាង ស្ថាបនិកហាងកាហ្វេ Brown ក្នុងស្រុកមួយមានឈ្មោះបោះសម្លេងក្នុងវិថីជំនួញ លោកបានចូលរួមចែករំលែកគំនិតមានតម្លៃជាច្រើនដល់យុវជនដើម្បីធ្វើខ្លួនឲ្យក្លាយជាទំពាំងស្នងឫស្សីរបស់សង្គមជាតិ។ ទន្ទឹមនឹងនោះ លោក បានលើកឡើងនូវពាក្យមួយឃ្លា៖ " ធ្វើជាសិស្សល្អ មិនមែនពូកែអានតែសៀវភៅនោះទេ" ត្រង់ចំណុចនេះ លោកពន្យល់ថា អានសៀវភៅហើយយកមកអនុវត្តនោះទើបធ្វើឲ្យជីវិតមានប្រសិទ្ធិភាព។ ប៉ុន្តែដើម្បីបន្ថែមគុណភាពជីវិតកាន់តែជោគជ័យលើផ្លូវដ៏វែងឆ្ងាយ យុវជនគួរមានគោលដៅច្បាស់លាស់ អមជាមួយដំណើរក្បួនខាងក្រោមនេះ៖
១. ចាប់ផ្ដើមដើររកថ្មីៗ
ស្វែងរកដំណើរជីវិតបែបថ្មី ជាស្ទីលរបស់ខ្លួន។ ផ្លាស់ប្ដូរទម្លាប់ខ្ជិលច្រអូស ចាប់ផ្ដើមទម្លាប់ឧស្សាហ៍ព្យាយាម មានវិន័យផ្ទាល់ខ្លួន និងដាច់ខាតមិនត្រូវមានលេសកុហកអ្វីដែលខ្លួនចង់ធ្វើឡើយ។ ឧទារហណ៍ថា អ្នកចង់ពូកែនិយាយលើវេទិកាសាធារណៈ ដូច្នេះ មួយថ្ងៃត្រូវចំណាយពេលអានសៀវភៅឲ្យបាន ១ទៅ ២ម៉ោង និងឧស្សាហ៍ចូលក្លឹបសិក្សាចែករំលែកចំណេះដឹងជាមួយមិត្តភក្តិ។ ២. កុំគេចបញ្ហា
មនុស្សពូកែ គឺជាមនុស្សមិនរអាលនឹងបញ្ហា និងហ៊ានសម្រេចចិត្តដោយសុទិដ្ឋនិយម(គិតវិជ្ជមាន)។ ជាមួយគ្នានោះ មនុស្សពូកែចូលចិត្តធ្វើការច្រើនធ្វើលឿន និងឯករាជ។ ចំណែកមនុស្សគេចបញ្ហា គឺជាមនុស្សធម្មតាចូលចិត្តធ្វើការតិច ចង់សុខស្រួល ខ្លាចហត់ ខ្លាចការផ្លាស់ប្ដូរ និងគ្មានសមត្ថភាពដោះស្រាយបញ្ហាដោយខ្លួនឯង។
៣. ធ្វើរឿងពិបាកៗឲ្យក្លាយជាទម្លាប់
មនុស្សជោគជ័យជាច្រើន ចូលចិត្តធ្វើរឿងពិបាកៗ ធ្វើវាឲ្យក្លាយជាទម្លាប់ប្រចាំថ្ងៃ ធ្វើហើយធ្វើទៀតធ្វើឲ្យស៊ាំដៃ។ បន្ទាប់មកផ្ដើមធ្វើរឿងផ្សេងៗ ដែលជម្រុញឲ្យជីវិតអ្នកកាន់តែមានតម្លៃ និងមានជំនឿចិត្តមុះមុតជានិច្ច។
៤. ចេះសន្សំ
ត្រូវមានគំនិតសេដ្ឋកិច្ច ចេះបែងចែកចំណូលដែលមាន ជាពិសេសនោះបើលោកអ្នកមិនទាន់មានគំនិតវិនិយោគ ឬរកស៊ីអ្វីនោះទេ ដំបូងត្រូវតែចេះសន្សំទុកមុន យ៉ាងហោចណាស់ឲ្យបាន ២០ ទៅ ២៥ ភាគរយនៃចំណូលសរុប។
៥. មានដៃគូល្អ
ត្រង់ចំណុចនេះ វាសំខាន់សម្រាប់អ្នកត្រង់ថា អ្នកត្រូវមានទំនាក់ទំនងជាមនុស្សដែលអាចឲ្យអ្នកក្លាយជាមនុស្សល្អ។ សេពគប់មនុស្សជុំវិញជាបណ្ឌិត នោះអ្នកនឹងក្លាយជាបណ្ឌិត បើស្គាល់អ្នកជំនួញ អ្នកនឹងក្លាយជាសហគ្រិន ប៉ុន្តែបើស្គាល់មនុស្សពាលា ប្រាកដណាស់ថា អ្នកនឹងក្លាយជនបាតសង្គមដែរ។ ម្យ៉ាងការរើសដៃគូជីវិតក៏ដូចគ្នា យុវជនកុំស្វែងរកដៃគូស្រឡាញ់តែមួយគ្រា ប៉ុន្តែត្រូវគិតចំណេះដឹង ចំណេះធ្វើ និងទំនួលខុសត្រូវ៕
