- 2018-09-05 10:14:54
- ព័ត៌មាន
ក្មេងៗសម័យថ្មីទំនងមិនសូវដែលលេង ឬស្គាល់ល្បែងកម្សាន្តបីប្រភេទរបស់ចាស់ពីដើម
- 2018-09-05 10:14:54
- ចំនួនមតិ 0 | ចំនួនចែករំលែក 0
ក្មេងៗសម័យថ្មីទំនងមិនសូវដែលលេង ឬស្គាល់ល្បែងកម្សាន្តបីប្រភេទរបស់ចាស់ពីដើម
ចន្លោះមិនឃើញ
ចាស់បុរាណបានបន្សល់ទុកនូវល្បែងកម្សាន្តប្រជាប្រិយជាច្រើនប្រភេទសម្រាប់កូនចៅជំនាន់គ្រោយប៉ុន្តែថាគួរឲ្យស្តាយដែលល្បែងនេះមិនសូវពេញនិយមសម្រាប់ក្មេងៗសម័យហ្វេសប៊ុកនោះទេ។
ថ្ងៃនេះ Sabay លើកយកល្បែងកម្សាន្តបីប្រភេទដែលកុមារនៅទីជនបទខ្លះនៅពេញនិយមលេងតែពុំសូវឃើញមានទេសម្រាប់កុមារនៅទីក្រុង។
ល្បែងកម្សាន្តលោតអន្ទាក់
ល្បែងនេះមានខ្សែមួយសង្វាយនឹងមនុស្សបីនាក់ឬលើសពីនេះអាចលែងបាន។ មនុស្សពីរនាក់ជាអ្នកបង្វឹលខ្សែហៅថាអ្នកចាំទីរីឯអ្នកលោតអាចផ្លាស់ប្តូរគ្នាពីម្នាក់ទៅម្នាក់ ហើយក្នុងករណីដែលអ្នកលោតណាម្នាក់ទាក់ខ្សែត្រូវមកចាំទីឲ្យអ្នកផ្សេងលោតវិញម្តង។ល្បែងនេះអាចនឹងបន្តលែងរហូតប្រសិនបើពួកអ្នកលេងទាំងឡាយនៅតែចង់បន្ត។
ល្បែងកម្សាន្តលេងអ៊ូ
ល្បែងនេះចែកគ្នាជាពីរក្រុមក្នុងមួយក្រុមអាចមានគ្នាពីបីទៅបួននាក់ឡើង។នៅចំកណ្តាលក្រុមទាំងពីរគឺមានគំនូសខ្សែត្រង់មួយសម្រាប់បែងចែកខណ្ឌក្រុមទាំងពីរហើយក្រុមម្ខាងៗត្រូវស្ថិតនៅឃ្លាតពីគ្នាចម្ងាយប្រហែលពីប្រាំទៅ១០ម៉ែត្រ។
ក្រុមទាំងពីរត្រូវប៉ាវយកឈ្នះដើម្បីបានចាប់ផ្តើមចេញអ៊ូមុនគេ។ អ្នកអ៊ូត្រូវអត់ដង្ហើមរត់សំដៅទៅប៉ះកូនក្រុមបដិបក្ខរបស់ខ្លួន ហើយត្រូវព្យាយាមរត់មកទីរបស់ខ្លួនវិញមុនអស់សំឡេងអ៊ូ ខណៈក្រុមម្ខាងទៀតខំប្រឹងចាប់មេអ៊ូឲ្យជាប់ដើម្បីឲ្យមេអ៊ូអស់ដង្ហើមមុនពេលរត់មកដល់គំនូសខ្សែកណ្តាល បើចាប់មិនជាប់ទេក្រុមខ្លួននឹងចាញ់បាត់សមាជិកក្រុម។ ដូចគ្នាដែរ បើមេអ៊ូបានប៉ះកូនក្រុមគូបក្សដិបក្ខក៏ដោយ តែមិនអាចរើបម្រាស់រត់មកដល់ទីខ្លួនមុនអស់ដង្ហើមទេនឹងត្រូវចាញ់ ហើយក្លាយខ្លួនជាសមាជិករបស់ក្រុមបក្សដិបក្ខ។
ក្រុមទាំងពីរនឹងបន្តលេងបែបនេះរហូតដល់ក្រុមម្ខាងៗអស់សមាជិកក្រុម ហើយក្រុមដែលចាញ់ត្រូវធ្វើតាមការបញ្ជារបស់ក្រុមដែលឈ្នះធ្វើអ្វីមួយតាមការព្រមព្រៀងគ្នាពេលមុនលេងតែពុំមែនជាការភ្នាល់ស៊ីសងអ្វីនោះទេ។
ល្បែងកម្សាន្តលេងសេង
ល្បែងនេះបែងចែកជាពីរក្រុមក្នុងមួយក្រុមៗមានគ្នាពីបួននាក់ឡើងហើយត្រូវគូសខ្សែចាំទីទៅតាមចំនួនអ្នកលេងតែត្រូវមានខ្សែមេកណ្តាលមួយ។ ក្រុមទាំងពីរត្រូវប៉ាវយកឈ្នះដើម្បីចេញរត់មុន។អ្នកចាំទីម្នាក់ៗត្រូវចល័តតាមទីតាំងនៃខ្សែរបស់ខ្លួន។អ្នកចេញមុនត្រូវព្យាយាមឆ្លងកាត់ខ្សែត្រៀមយ៉ាងណាកុំឲ្យគេចាប់បានបើមិនដូច្នោះទេក្រុមទាំងមូលត្រូវចាញ់និងវិលមកចាំទីម្តងវិញពុំខាន។ល្បែងនេះនឹងបន្តលេងបែបនេះវិលទៅវិលមករហូតឈប់លេងទើបចប់។
លោកសេស ផល វ័យ៥០ឆ្នាំជាអ្នកធ្លាប់ឆ្លងកាត់លេងល្បែងទាំងនេះកាលពីនៅតូចៗប្រាប់ថាកាលពីលោកនៅវ័យកុមារលោកចូលចិត្តលេងល្បែងទាំងនេះណាស់ជាពិសេសនៅរាល់ពេលមានបុណ្យដាលានតាមភូមិម្តងៗ។ លោកថាក្មេងៗក្នុងភូមិទាំងតូចទាំងធំនាំគ្នាគូសដីលេងសេងភ្លេចបាយភ្លេចទឹកក៏មាន។ លោកបន្តថា៖ «បើនៅពេលយប់ខែភ្លឺ...ពួកយើងចូលចិត្តលេងអ៊ូសប្បាយណាស់ប្អូនដូចហាត់កីឡាចឹង រត់ដេញអ៊ូចាប់គ្នាបែកញើសជោគខ្លួនរហូតដល់កណ្តាលអធ្រាត្រក៏មាន...ទើបមុជទឹកចូលដេក»។
ចំណែកគ្រូកីឡា នៅវិទ្យាល័យព្រៃទប់លោក អ៊ុច ពោញី ឲ្យដឹងថាល្បែងទាំងបីប្រភេទនេះចាត់ទុកថាជាប្រភេទកីឡាមួយបែបដែលជួយជំរុញឲ្យកុមារតូចៗមានការលូតលាស់កាយសម្បទាបានល្អប្រសើរ។លោកពន្យល់ថាព្រោះថាល្បែងនេះមានគ្រប់សកម្មភាពកីឡាអត្តពលកម្មបង្កប់ក្នុងនោះរួចស្រេចទៅហើយម្យ៉ាងទៀតតាមរយៈសកម្មភាពល្បែងទាំងមូលបានបង្ហាញនូវស្មារតីរិតចំណងសាមគ្គីគ្នាផងដែរ៕