ទីបំផុតក្មេងស្រីកម្ពុជា បានជួបបុគ្គលល្បីពីអាមេរិក ចែករំលែកចំណេះដឹងគ្នា រឿងដ៏កម្រ១

2018-09-05 11:20:00
ការអប់រំ

2018-09-05 11:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សយន្ត គឺជាមុខជំនាញដ៏កម្រមួយ ដែលមានមនុស្សតិចណាស់បានស្គាល់ និងដឹងពីលក្ខណៈពិសេសៗជាច្រើនផ្សេងទៀត ដើម្បីជួយដល់វិស័យអប់រំ និងប្រយោជន៍របស់មនុស្ស។

ក្មេងស្រីកម្ពុជាម្នាក់ បានប្រាប់ថា ខ្លួនពិតជារំភើប និងសប្បាយចិត្ត ក្រោយវេទិកា ស្ដីពីមនុស្សយន្ត ដែលអាចជជែកផ្ទាល់ជាមួយបុគ្គលល្បីឈ្មោះម្នាក់ លើទំព័រទស្សនាវដ្ដី Business Insider មកពីសហរដ្ឋអាមេរិក។

យុវតីវ័យក្មេង ងួន ឡូរ៉ាណា សិស្សរៀននៅវិទ្យាល័យព្រះស៊ីសុវត្ថិ បានប្រាប់ Sabay ថា នេះជាលើកទី១ ដែលបានចូលកម្មវិធីនេះ ជជែករឿងដ៏កម្រនេះ ដែលរៀបចំដោយស្ថានទូតសហរដ្ឋអាមេរិក នៅប្រទេសកម្ពុជា ក្នុងបរិវេណសាលាតិចណូ។

យុវតីវ័យរូបនេះប្រាប់ថា ខ្លួនស្រលាញ់ជំនាញទាក់ទងនឹងមនុស្សយន្ត និងធ្លាប់បានចូលរួមប្រកួតប្រជែងនៅបរទេសផងដែរ។ ពីមុនក្រៅតែមិត្តភ័ក្ដិប៉ុន្មាននាក់ គឺពិតជាពិបាករកអ្នកជជែក សួរដេញដោលរឿងនេះណាស់ ព្រោះគ្រាន់តែនិយាយដល់ពាក្យមនុស្សយន្ត គឺគ្មានអ្នកស្គាល់បាត់ទៅហើយ។

ឡូរ៉ាណា បញ្ជាក់ថា មនុស្សជាច្រើនយល់ថា មនុស្សយន្ត មិនដឹងប្រើការអីកើត ក្រៅតែជារបស់ក្មេងចុចបញ្ជាលេង។ កញ្ញាបន្តថា ពីមុនពិតជាមានអារម្មណ៍ឯកាបន្តិច ដូចនៅតែម្នាក់ឯង ចូលចិត្តធ្វើអ្វីប្លែក ហើយគ្មានអ្នកស្គាល់ទៀត។

យុវតីវ័យក្មេងបន្តថា រហូតមកដល់ថ្ងៃនេះ ទើបដឹងមានមនុស្ស ១ក្រុមក្នុងស្រុក រួមនឹងការចែករំលែកពីបុគ្គលល្បីនៅបរទេស ដែលមានទិសដៅរួម ចំណូលចិត្តដូចគ្នា ដើម្បីធ្វើឧបករណ៍ដែលអាចជួយដល់មនុស្សរៀនសូត្រអ្វីថ្មី និងជួយដល់ការអភិវឌ្ឍ។

លោកស្រី Ayanna Howard បណ្ឌិត ផ្នែកវិស្វកម្មអគ្គិសនី ពីសាកលវិទ្យាល័យ University of Southern California នៃសហរដ្ឋអាមេរិក និងជាអ្នកជំនាញ នៃភាពជឿនលឿន ផ្នែកភាពវៃឆ្លាតសិប្បនិម្មិត ( Artificial Intelligence) បច្ចេកទេសទាក់ទង នឹងឧបករណ៍សម្រាប់ជួយមនុស្សពិការ តាមរយៈបច្ចេកវិទ្យាមនុស្សយន្ត បានផ្ដល់បទសម្ភាសមកកាន់ Sabay ថាលោកស្រីពិតរីករាយ ចំពោះការផ្ដល់យោបល់ ឬការប្រឹក្សានានាដល់យុវជនខ្មែរ ពិសេសក្មេងស្រី ដែលចាប់អារម្មណ៍រៀនសូត្រពីប្រយោជន៍នៃមនុស្សយន្ត។

លោកស្រី Ayanna Howard ពេលជជែកជាមួយក្រុមយុវជនកម្ពុជា

បណ្ឌិត Ayanna បានទទួលស្គាល់ថា ប្រទេសកម្ពុជាពិតជានៅខ្វះខាតធនធានស្រាវជ្រាវ ហើយបច្ចេកវិទ្យាក៏ទាន់មានភាពរីកចម្រើនខ្លាំង។ លោកស្រី នៅតែមានជំនឿជាក់ថា ធនធានមនុស្សពិសេសក្មេងៗ និងយុវជនរបស់កម្ពុជា អាចរៀនសូត្របន្ថែម ដោយចំណាយដ៏ខ្លីបន្ថែម ប្រហែលជា ៤ ឬ៥ឆ្នាំទៅមុខទៀត ដើម្បីឲ្យមានភាពល្អប្រសើរ គួបផ្សំនឹងសមត្ថភាពគ្រូបង្វឹកដើម្បីជួយដល់ក្មេងៗដែលស្រលាញ់ផ្នែកនេះ។

សូមបញ្ជាក់ថា ក្រៅតែស្ថិតក្នុងបច្ចេកវិទ្យាទំនើបមនុស្សយន្ត គឺអាចជួយដល់វិស័យសំខាន់នានា ដូចជាជួយលើការងារថែទាំសុខភាពនៅក្នុងផ្ទះ។

ចំពោះវិស័យអប់រំ មនុស្សយន្ត ក៏បានដើរតួនាទីកាន់តែសំខាន់ សម្រាប់សម្រួល ឲ្យអ្នកមានកាយសម្បទាមិនគ្រប់លក្ខណៈ មានឱកាសអាចសិក្សាដូចគេឯងបានយ៉ាងងាយស្រួល។ នេះបើតាមលោកស្រីបណ្ឌិត Ayanna Howard។

អត្ថបទ៖ ពៅ រក្សា