- 2018-10-01 03:13:55
- ព័ត៌មាន
រមណីយដ្ឋាន៥កន្លែង ទេសភាពស្អាត ដើរលេងសប្បាយខ្លាំង មានវត្តអារាមបានធ្វើបុណ្យទៀត
- 2018-10-01 03:13:55
- ចំនួនមតិ 0 | ចំនួនចែករំលែក 0
រមណីយដ្ឋាន៥កន្លែង ទេសភាពស្អាត ដើរលេងសប្បាយខ្លាំង មានវត្តអារាមបានធ្វើបុណ្យទៀត
ចន្លោះមិនឃើញ
រដូវភ្ជុំបិណ្ឌ មកដល់ម្ដងៗប្រជាពលរដ្ឋខ្មែរគ្រប់គ្រួសារ តែងធ្វើបុណ្យសាងកុសល នៅតាមទីវត្តអារាមនានា ហើយក៏ជាឱកាសជួបជុំគ្នាដើម្បីដើរលេងកម្សាន្ត។ ថ្ងៃនេះ Sabay សូមនាំប្រិយមិត្តទៅតំបន់ទេសចរណ៍បែបធម្មជាតិ និងវប្បធម៌ ប្រវត្តិសាស្ត្រ និងជាកន្លែងសក្ការដ៏សំខាន់ ៥កន្លែងនៅក្នុងប្រទេសកម្ពុជា។ តើតំបន់ទេសចរណ៍ទាំងនោះមានទីតាំងនៅឯណាខ្លះ? តោះទៅដើរលេងទាំងអស់គ្នា!
១.រមណីយដ្ឋានភ្នំសំពៅ
ភ្នំសំពៅជារមណីយដ្ឋានធម្មជាតិ ប្រកបដោយទេសភាពស្រស់បំព្រង ហ៊ុមព័ទ្ធដោយវាលស្រែខៀវស្រងាត់ មានប្រវែងប្រមាណ១៤គីឡូម៉ែត្រប៉ុណ្ណោះពីទីរួមខេត្តបាត់ដំបង។ នៅក្នុងរដូវភ្ជុំបិណ្ឌនេះ ពុទ្ធបរិស័ទអាចឆៀងចូលវត្តភ្នំសំពៅនៅក្បែរនោះ ដើម្បីប្រគេនចង្ហាន់ដល់ព្រះសង្ឃ រួចហើយបង្ហួសទៅលេងភ្នំសំពៅតែម្ដង។
ភ្ញៀវទេសចរអាចនៅរង់ចាំទស្សនាប្រចៀវរាប់លានល្បាលនៅពេលល្ងាច និងទស្សនាព្រះអាទិត្យហៀបលិចដ៏ស្រស់ស្អាតនៅលើកំពូលភ្នំសំពៅ និងទិញវត្ថុអនុស្សាវរីយ៍នៅជើងភ្នំ ក៏ដូចជាម្ហូបអាហារ នំចំណីដ៏សម្បូរបែបទៀតផង។
២. រមណីយដ្ឋានធម្មជាតិ និងប្រវត្តិសាស្ត្រភ្នំបាណន់
ភ្នំបាណន់រមណីយដ្ឋានដ៏ល្បីល្បាញមួយក្នុងខេត្តបាត់ដំបង មានចម្ងាយប្រមាណ២៥គីឡូម៉ែត្រ ពីទីរួមខេត្ត។ ក្រៅពីបានទៅធ្វើបុណ្យរាប់បាត្រ នៅវត្តភ្នំបាន់ហើយ នៅទីនោះមានទេសភាពស្អាត មានភ្នំព្រៃព្រឹក្សាដ៏ស្រស់បំព្រង មានទឹកបឹងធម្មជាតិដ៏ថ្លាឈ្វេងក្បែរជើងភ្នំ។ ភ្ញៀវទេសចរអាចអ៊ុំទូកលេងកម្សាន្តទស្សនាព្រៃលិចទឹក ពិសាម្ហូបអាហារឆ្ងាញ់ៗ ដែលមានក្យូសអង្គុយសម្រាកលម្ហែកាយតម្រៀបគ្នាហូរហែនៅប្របនឹងមាត់បឹង។
ពិសាបាយថ្ងៃត្រង់ជុំគ្រួសាររួចរាល់ អាចបន្តទៅជិះឡូរីដ៏ល្បីល្បាញប្រចាំខេត្តទៀតផង ដោយចំណាយតែម្នាក់មួយម៉ឺនរៀលប៉ុណ្ណោះ ដើម្បីទស្សនាព្រៃព្រឹក្សានៅក្បែរជើងភ្នំ និងទេសភាពវាលស្រែដ៏ស្រស់បំព្រងនៅទីនោះ។
៣. ភ្នំប្រុសភ្នំស្រី
ភ្នំប្រុសភ្នំស្រី គឺរមណីយដ្ឋានធម្មជាតិមួយ ស្ថិតក្នុងភូមត្រពាំងចារ ឃុំក្រឡា ស្រុកកំពង់សៀម មានចម្ងាយប្រមាណ ៧គីឡូម៉ែត្រពីទីរួមខេត្តកំពង់ចាម និងចម្ងាយប្រមាណ ១១៤គីឡូម៉ែត្រ ពីរាជធានីភ្នំពេញ។ វត្តភ្នំប្រុសមានឈ្មោះជាផ្លូវការហៅថា "វត្តសុវណ្ណគិរីរតនៈភ្នំប្រុស"។ នៅចំទិសខាងជើងចម្ងាយប្រមាណ ១០០០ម៉ែត្រគេអាចមើលឃើញភ្នំមួយទៀតដែលមានកំពូលស្រួចឈ្មោះថា "ភ្នំស្រី"។ ចំណែកនៅផ្នែកខាងជើងភ្នំស្រី មានជួរភ្នំរកេតរកូតជាច្រើនទៀតមានឈ្មោះថា ភ្នំដងរែក ភ្នំលី ភ្នំឈូក។
មិនត្រឹមតែជាតំបន់ទេសចរមួយដ៏ទាក់ទាញប៉ុណ្ណោះទេ តែភ្នំប្រុសភ្នំស្រី មានប្រវត្តិរឿងរ៉ាវជាច្រើន អាចសិក្សារៀនសូត្រ ទាក់ទងនឹងប្រពៃណីស្ដីដណ្ដឹងកូនចៅរបស់ប្រជាពលរដ្ឋខ្មែរទៀតផង។ ចំណែក ពុទ្ធបរិស័ទទាំងអស់ក៏អាចធ្វើបុណ្យដាក់ទាន អុជធូបសុំសេចក្ដីសុខ នៅក្នុងវត្តអារាមលើកំពូលភ្នំ ហើយក៏ជាទីតាំងដ៏ល្អបំផុតសម្រាប់លម្ហែកាយនារដូវបុណ្យទាននេះ។
៤. ភ្នំជីសូរ្យ
ខេត្តតាកែវជាទឹកដីប្រវត្តិសាស្ត្រ ដ៏ចំណាស់មួយនៅក្នុងប្រទេសកម្ពុជា និងមានសក្ដានុពលទេសចរណ៍មិនចាញ់ខេត្តផ្សេងៗនោះទេ។ ជាក់ស្ដែង ភ្នំជីសូរ្យ គឺជារមណីយដ្ឋានប្រវត្តិសាស្ត្រដ៏ពេញនិយមមួយស្ថិតនៅក្នុង ភូមិស្លា ឃុំរវៀង ស្រុកសំរោង មានចម្ងាយប្រហែល ៦២គីឡូម៉ែត្រប៉ុណ្ណោះពីរាជធានីភ្នំពេញ។
ឡើងទៅដល់កំពូលភ្នំភ្ញៀវទេសចរទាំងឡាយ នឹងភ្លាំងភ្លឹកគយគន់សម្រស់ធម្មជាតិដ៏ស្រស់បំព្រង គ្របដណ្ដប់ដោយខ្យល់អាកាសដ៏បរិសុទ្ធ។ ជាពិសេសនោះបងប្អូនទេសចរ នឹងបានទស្សនាប្រាសាទបុរាណមួយឈ្មោះថា "ប្រាសាទភ្នំជីសូរ្យ" កសាងឡើងដោយព្រះបាទសូរ្យវរ្ម័នទី១ តាំងពីសតវត្សទី១១មកម្ល៉េះ។ សម្រស់ធម្មជាតិ បន្ថែមដោយក្បូរក្បាច់រចនាដ៏ល្អវិចិត្រនៅលើតួប្រាសាទ បានធ្វើឱ្យទីតាំងមួយនេះ រំលេចចេញជាផ្ទាំងទស្សនីយភាពគយគន់មិនចេះជិនណាយ។
៥.រមណីយដ្ឋានកំពង់ត្រាច
ធ្វើដំណើរចម្ងាយប្រមាណជា ៣៨គីឡូម៉ែត្រ នៅភាគខាងកើតនៃក្រុងកំពត តាមផ្លូវជាតិលេខ៣៦ គេនឹងទៅដល់រមណីយដ្ឋានមួយកន្លែងមានឈ្មោះថា «ល្អាងកំពង់ត្រាច» ដែលស្ថិតនៅក្នុងឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។ ល្អាងកំពង់ត្រាចមិនត្រឹមតែគេស្គាល់ថាជាតំបន់ទេសចរណ៍ប៉ុណ្ណោះទេ តែជាកន្លែងសក្ការៈបូជាថែមទៀតផង។
ភ្នំកំពង់ត្រាចបានទាក់ទាញប្រជាជនជិតឆ្ងាយទាំងជាតិនិងអន្តរជាតិមកទស្សនា និងដើម្បីបួងសួងសុំសេចក្តីសុខ។
ភ្នំកំពង់ត្រាចជារមណីយដ្ឋានប្រវត្តិសាស្ត្រមួយរបស់ទឹកដីខេត្តកំពតដែលប្រជាជខ្លះហៅថា «ភ្នំបាក់» ដោយសារតែភ្នំនោះមានលក្ខណៈខុសប្លែកពីភ្នំដទៃត្រង់នៅចំកណ្តាលភ្នំមានវាលធំដែលមានពន្លឺថ្ងៃចាំងចូល ដែលហាក់ប្លែកពីល្អាងធម្មតា។ ភ្នំកំពង់ត្រាចមានបរិមាត្រប្រមាណជា៤គីឡូម៉ែត្រ និងកម្ពស់ប្រមាណជា២០០ម៉ែត្រ ហើយក្បែរភ្នំនោះក៏មានវត្តមួយហៅថា «វត្តគិរីសិសា»៕