- 2018-10-24 03:14:20
- សេដ្ឋកិច្ច
ដំណើរការអាជីវកម្មបានល្អសហគ្រិនត្រូវមានកត្តា ៣យ៉ាង
- 2018-10-24 03:14:20
- ចំនួនមតិ 0 | ចំនួនចែករំលែក 0
ដំណើរការអាជីវកម្មបានល្អសហគ្រិនត្រូវមានកត្តា ៣យ៉ាង
ចន្លោះមិនឃើញ
មុននឹងសម្រេចចិត្តឈានជើងចេញរកស៊ី អ្នកគួរដាក់ក្ដីស្រមៃឲ្យធំ និងគិតពីនិរន្តរភាពរបស់អាជីវកម្មអ្នក ហើយចាបផ្ដើមធ្វើវាពីចំណុចតូចៗ ជាមុនសិន។ នេះជាការលើកឡើងរបស់សហគ្រិន ដែលជោគជ័យក្នុងអាជីវកម្មជាច្រើនរូប ដែលធ្លាប់បានផ្ដល់សម្ភាសន៍ឲ្យ Sabay កន្លងមក។
សហគ្រិនខ្លះទៀតបានលើកឡើងថា ការចាប់ផ្ដើមអាជីវកម្មមួយមិនមែនជាការលំបាកប៉ុន្មានទេ តែរឿងលំបាកនោះគឺ រក្សានិរន្តរភាពអាជីវកម្មឲ្យបានល្អ និងធ្វើយ៉ាងណារកឱកាសពង្រីកខ្លួនឲ្យទាន់តម្រូវការទីផ្សារ។ បើមិនដូច្នោះទេម្ចាស់អាជីវកម្មនឹងប្រឈមនឹងការដួលទៅវិញជាក់ជាមិនខាន។
តែយ៉ាងណាក៏ដោយ ដើម្បីឈានទៅដល់ចំណុចអស់ទាំងនោះបាន អ្នកត្រូវមាន ៣ចំណុចសំខាន់ៗ ដែលជាកត្តាជួយឲ្យអ្នកក្លាយជាសហគ្រិនដ៏ឆ្នើម។
ទី០១, គឺជំនាញសរសេរគម្រោង។
ទី០២, ជំនាញគ្រប់គ្រងហិរញ្ញវត្ថុ។
ទី០៣, ជំនាញដឹកនាំមនុស្ស។
បើស្ដាប់ទៅរៀងស្មុគស្មាញបន្តិច ក៏ប៉ុន្តែតាមពិតវាមិនលំបាកពេកនោះទេ! នេះបើតាមការលើកឡើងរបស់អ្នកជំនាញ។ លោក តឹក វាសនា ដៃគូគ្រប់គ្រងនៃក្រុមហ៊ុន វីអេសឌីឃេ (VSDK) ដែលធ្វើការទៅលើការប្រឹក្សាយោបល់ផ្នែកអាជីវកម្ម និងសវនកម្មប្រាប់ថា «ដើម្បីចាប់ផ្ដើមដំណើរការជំនួញមួយបាន យើងត្រូវដឹងពី Business Activity ថាមានអ្វីខ្លះ។ យើងដឹងពី Business Activity អ៊ីចឹង យើងដឹងពីធនធានមនុស្សដែលត្រូវយកមកប្រើប្រាស់»។
ពាក់ព័ន្ធនឹងចំណុចនេះ លោក សាឡេះ សុវណ្ណារ៉ា ប្រធានផ្នែកធនធានមនុស្ស នៃក្រុមហ៊ុនអន្តរជាតិមួយបានប្រាប់នូវគន្លឹះក្នុងការជ្រើសរើសបុគ្គលិកមកធ្វើការ «ត្រូវមានលក្ខណៈ ៣យ៉ាង ទីមួយចំណេះដឹង ដែលបានមកពីការសិក្សានៅសកលវិទ្យាល័យ ទីពីរ ជំនាញ ដែលបានមកពី បទពិសោធន៍ការងារ និង ទីបី ចំណង់ចំណូលចិត្តក្នុងការងារ គឺបានដល់ការស្រលាញ់ចូលចិត្តការងារដែលកំពុងធ្វើ»។
ពេលរើសបានធនធានមនុស្សហើយ យើងត្រូវធ្វើគម្រោងការដើម្បីឲ្យពួកគាត់ធ្វើទៅតាមជំនាញនីមួយៗ។ ដើម្បីធ្វើគម្រោងឲ្យបុគ្គលិក ដំណើរការបានត្រឹមត្រូវ គឺវាពាក់ព័ន្ធទៅនឹងយុទ្ធសាស្ត្រទីផ្សារ។ លោក តឹក វាសនា បាននិយាយ។
មកដល់ចំណុចនេះ លោក យន សុភារិទ្ធ លើកឡើងថា «ការស្រាវជ្រាវទីផ្សារ (Marketing research) មានពីរវិធីធំៗទីមួយគឺ ការស្រាវជ្រាវដោយផ្ទាល់ និងដោយប្រយោល» ត្រង់នេះលោកពន្យល់បន្ថែមថា៖
១. ការស្រាវជ្រាវដោយផ្ទាល់ ជាការចុះទៅសាកសួរអតិថិជនគោលដៅដោយផ្ទាល់ ស្ទាបស្ទង់ ឬសង្កេតមើលថា តើតម្រូវការផលិតផលរបស់យើងមានច្រើនប៉ុណ្ណា?
២. ការស្រាវជ្រាវមិនផ្ទាល់ គឺសំដៅលើការស្រាវជ្រាវដោយប្រភពឯកសារផ្សេងៗដែលមានស្រាប់ ពីស្ថាប័នរដ្ឋ ឬឯកជន ដែលគេបានចងក្រងទុក និងបានធ្វើបច្ចុប្បន្នភាពជាប្រចាំ។
សូមទស្សនាវីដេអូ នៃបទសម្ភាសន៍
ការស្រាវជ្រាវទីផ្សារនេះ គេធ្វើការសិក្សាទៅលើឥរិយាបថ និងត្រូវការអតិជន និងសិក្សាលើចំណុចខ្លាំងខ្សោយរបស់គូប្រកួត។
បើនិយាយមកដល់រឿងគ្រប់គ្រងហិរញ្ញវត្ថុ! ចំណុចសំខាន់ជាងគេ ត្រូវចេះកត់ត្រាចំណូល-ចំណាយ និងរក្សាទុកនូវឯកសារជាភស្តុតាង(Support Document)។ ចំណុចនេះមានគុណសម្បត្តិពីរយ៉ាង ទី១ ជួយអ្នកងាយវិភាគទៅលើអាជីវកម្មទាំងមូល ទី២គឺងាយស្វែងរកទុនបន្ថែមដើម្បីពង្រីកអាជីវកម្ម។ លោកតឹក វាសនាបានបង្ហើបប្រាប់។
អ្នកប្រឹក្សាយោបល់អាជីវកម្មរូបនេះបន្ថែមថា ដើម្បីងាយស្រួលក្នុងការគ្រប់គ្រងលុយកាក់ ចំណូលចំណាយ សម្រាប់អាជីវកម្មខ្នាតតូចល្មមៗ គេនិយមប្រើកម្មវិធី Excel ព្រោះថា វាមានរូបមន្តគណនាស្រាប់ និងមានសុក្រឹតភាព។ ប៉ុន្តែបើជាក្រុមហ៊ុនខ្នាតធំ មានដំណើរការ (Operation) ច្រើនគេត្រូវការប្រើកម្មវិធីគណនីធំៗ ដែលត្រូវការជួលអ្នកជំនាញមកដំណើរការ។ ក៏ប៉ុន្តែសហគ្រិនក៏អាចស្វែងរកវគ្គសិក្សាខ្លីៗ នៅតាមសកលវិទ្យាល័យពាក់ព័ន្ធនឹងជំនាញនេះបានដែរ។
ប្រិយមិត្តដឹងទេ? ទស្សនៈសហគ្រិនជោគជ័យជាច្រើនបានលើកឡើងស្រដៀងៗគ្នាថា ផលិតផល មិនមែនជាចំណុចទីមួយ ដែលម្ចាស់អាជីវកម្មគិតនោះទេ ចំណុចចម្បងទីមួយ ដែលពួកគាត់គិតគឺ ធនធានមនុស្ស។ រើសមនុស្សឲ្យត្រូវ រក្សាមនុស្សឲ្យនៅ បង្វឹកមនុស្សឲ្យខ្លាំង ត្រង់នេះជាចំណុច ដែលអ្នកដឹកនាំល្អម្នាក់ត្រូវតែមាន៕
