- 2018-12-07 03:05:29
- ព័ត៌មាន
ណាត់គ្នាទៅប៉ែកឦសានម្ដង! ៧កន្លែងនៅស្ទឹងត្រែង ដើរលេងចុងឆ្នាំនេះសប្បាយបំផុត
- 2018-12-07 03:05:29
- ចំនួនមតិ 0 | ចំនួនចែករំលែក 0
ណាត់គ្នាទៅប៉ែកឦសានម្ដង! ៧កន្លែងនៅស្ទឹងត្រែង ដើរលេងចុងឆ្នាំនេះសប្បាយបំផុត
ចន្លោះមិនឃើញ
ស្ទឹងត្រែងត្រូវបានគេចាត់ទុកថា ជាខេត្តដែលមានសក្ដានុពលទេសចរណ៍ ខ្លាំងជាងគេនៅតំបន់ភាគខាងជើង។ ក្នុងខេត្តនេះមានតំបន់ទេសចរណ៍បែបវប្បធម៌ និងធម្មជាតិជាច្រើនដែលទទួលស្វាគមន៍ភ្ញៀវជាតិ និងអន្តរជាតិគ្រប់ពេលវេលា។ Sabayសូមបង្ហាញតំបន់ទេសចរណ៍សំខាន់ទាំង៧ក្នុងចំណោមទីកន្លែងកម្សាន្តជាច្រើននៅខេត្តស្ទឹងត្រែង។
១- រមណីយដ្ឋានធម្មជាតិអូរច្រឡង់«ក្រមុំព្រហ្មចារី» នៅកណ្តាលព្រៃ
ទឹកហូរអូរច្រឡង់ ឬហៅថា អូរវែង ដែលស្ថិតនៅចម្ងាយ៤៤គីឡូម៉ែត្រ ពីក្រុងស្ទឹងត្រែង ប្រៀបដូចជា «ក្រមុំព្រហ្មចារី» នៅក្នុងព្រៃស្ងប់ស្ងាត់ បែបធម្មជាតិសុទ្ធសាធ ហើយភ្ញៀវទេសចរភាគច្រើន នៅមិនទាន់ស្គាល់ ឬទៅលេងច្រើននោះទេ។
សូមទស្សនាវីដេអូ៖
២- ជិះទូកមើលថ្ងៃលិចនៅស្ពានសេកុង ពិតជាគួរឲ្យគយគន់ ព្រះអាទិត្យរៀបអស្ដង្គតនៅស្ពានសេកុង ក្រុងស្ទឹងត្រែង បានចាំងផ្លាតនៅលើផ្ទៃទឹក ប្រៀបនឹងគ្រាប់ពេជ្រ រំលេចជាពណ៌មាស គួរឲ្យគយគន់មិនជិនណាយ ធ្វើឲ្យអារម្មណ៍ស្រស់ស្រាយ ស្បើយអស់ទុក្ខកង្វល់។ តាមធម្មតាមភ្ញៀវមិនសូវចាប់អារម្មណ៍ ប៉ុន្តែពេលសាក់ល្បងម្តងនឹងមានអារម្មណ៍ចង់ទៅម្តងទៀត។
៣- រមណីយដ្ឋានធម្មជាតិអូរឫស្សីកណ្ដាលមានទាំងស្ពានយោល
រមណីយដ្ឋានធម្មជាតិអូរឫស្សីកណ្ដាល ស្ថិតនៅភាគខាងត្បូងទីក្រុងស្ទឹងត្រែងប្រមាណ៣០គីឡូម៉ែត្រជាទីកម្សាន្តដ៏ពេញនិយមមួយសម្រាប់អ្នកខេត្តស្ទឹងត្រែង និងភ្ញៀវពីចម្ងាយ។ លេងទឹកអូរថ្លាខ្មៅលើថ្ម គ្រប់ដោយព្រឹក្សាលតាវល្លិ៍ដ៏ត្រជាក់ចិត្ត និងមានស្ពានយោលថែមទៀតផង។
៤- ទឹកជ្រោះល្បាក់ខោនប្រៀបផ្ទាំងគំនូរឯកនៅជាប់ព្រំដែនឡាវ
ទឹកធ្លាក់លើផ្ទាំងសិលាយក្សនេះមានឈ្មោះដល់ទៅ៣ដែលត្រូវបានអ្នកស្រុកនិយាយតៗពីគ្នាគឺអ្នកខ្លះហៅ ទឹកជ្រោះសុភមិត្រ អ្នកខ្លះហៅ ល្បាក់ខោន ឬក៏ហៅព្រះនិម្មិត។ ប៉ុន្តែឈ្មោះដែលគេនិយមហៅជាងគេគឺល្បាក់ខោន។ វាស្ថិតនៅភាគខាងប្រទេសកម្ពុជាដែលជាប់នឹងព្រំដែនឡាវ។ វាគឺជាតំបន់មួយដែលទន្លេមេគង្គហូរឆ្លងកាត់ចុះចេញពីខ្ពង់រាបធ្លាក់ចូលមកទន្លេមេគង្គក្នុងទឹកដីនៃប្រទេសកម្ពុជា។
ទឹកធ្លាក់ល្បាក់ខោន ឬទឹកធ្លាក់សុភមិត្រស្ថិត នៅក្នុងឃុំ ព្រះរំកិល ស្រុកថាឡាបូរិវ៉ាត់ដែលមានចម្ងាយប្រមាណជិត៨០គីឡូម៉ែត្រពីខេត្តស្ទឹងត្រែង និងស្ថិតក្នុងភូមិ កំពង់ស្រឡៅ ស្រុកឆែប ដែលមានចម្ងាយជាង១០០គីឡូម៉ត្រពីខេត្តព្រះវិហារ។
៥- ព្រះរំកិលជាអន្លង់ផ្សោតនៅជាប់ទល់ដែនឡាវ
តំបន់ព្រះរំកិលជាអន្លង់ផ្សោតឈើទាល ស្ថិតនៅព្រំប្រទល់ខ្មែរឡាវ ក្នុងទឹកដីឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង និងមានចម្ងាយប្រហែល ៦៩គីឡូម៉ែត្រពីទីរួមខេត្ត។ ពេលទៅដល់មាត់ទន្លេមេគង្គនៅព្រះរំកិល នៅម្ខាងទន្លេមានកោះស្ដាំ ស្រុកចំប៉ាសាក់ ប្រទេសឡាវ រីឯកោះខាងស្ដាំដៃឈ្មោះថា «កោះល្ង»ជាកោះខ្មែរ រីឯប្រជាជននៅទីនោះ ក៏ចេះនិយាយភាសាឡាវច្រើនផងដែរ។
៦- ល្អាងភ្នំប្រាក់ជាតំបន់បោះជំរំក្នុងព្រៃដ៏ពិសេស
ល្អាងភ្នំប្រាក់ ស្ថិតនៅជើងភ្នំប្រាក់ មានចម្ងាយប្រហែល១៨គីឡូម៉ែត្រ ពីឃុំអូរស្វាយ។ ដើម្បីទៅដល់ល្អាងភ្នំមួយនេះ ភ្ញៀវទេសចរត្រូវធ្វើដំណើរដោយជិះទូកតាមដៃទន្លេមេគង្គ រយៈពេលប្រហែល១ម៉ោង ទើបដល់ភូមិវឿនសៀន រួចបន្តធ្វើដំណើរដោយថ្មើរជើង ឬជិះគោយន្តចូលទៅព្រៃ៣គីឡូម៉ែត្រទៀត។ វាស្ថិតនៅតំបន់ភ្នំដែលមានទាំងរូងថ្ម និងព្រៃឈើរាប់សិបហិចតាដែលអាចក្លាយជាកន្លែងបោះជំរំដ៏អស្ចារ្យបាន។
សូមទស្សនាវីដេអូខាងក្រោមនេះ៖
៧- ទស្សនាព្រៃលិចទឹកតាមដៃទន្លេមេគង្គនៅអូរស្វាយ
ព្រៃលិចទឹកនៅតាមដៃទន្លេមេគង្គជាកន្លែងកម្សាន្តដ៏កម្រមួយនៅប្រទេសកម្ពុជាដែលមនុស្សគ្រប់គ្នាប្រាថ្នាចង់ឃើញ។ ព្រៃលិចទឹកនេះត្រូវបានគេហៅថា រុំាសា (តំបន់អភិរក្សលិចទឹក)មានចម្ងាយរាប់គីឡូម៉ែត្រតាមដងទន្លេមេគង្គ នៅឃុំអូរស្វាយ ស្រុកថាឡាបូរិវ៉ាត ខេត្តស្ទឹងត្រែង។ តំបន់រុំាសា (តំបន់អភិរក្ស លិចទឹក) ដែលមានសត្វផ្សោតតាមដងទន្លេមេគង្គ សត្វបក្សាបក្សី សត្វព្រៃ ជាច្រើនទៀត។ វាប្រៀបបាននឹងត្បូងពេជ្រដ៏មានតម្លៃ ដែលបានផុសឡើងពីទឹកតាមបណ្ដោយទន្លេមេគង្គ។ វាបានផ្តល់នូវសម្បត្តិព្រៃឈើដ៏ ប្រសើរ ដែលជាជម្រកដ៏ប្រសើរសម្រាប់សត្វព្រៃ។
