- 2019-04-19 08:03:12
- ព័ត៌មាន
វីវរហើយ ! បរិវេណប្រាសាទចំណាស់ជិត១ពាន់ឆ្នាំ នៅកំពង់ឆ្នាំងរងការឈូសឆាយ
- 2019-04-19 08:03:12
- ចំនួនមតិ 0 | ចំនួនចែករំលែក 0
វីវរហើយ ! បរិវេណប្រាសាទចំណាស់ជិត១ពាន់ឆ្នាំ នៅកំពង់ឆ្នាំងរងការឈូសឆាយ
ចន្លោះមិនឃើញ
បរិវេណប្រាសាទដ៏ចំណាស់មួយនៅក្នុងភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ត្រូវបានប្រជាពលរដ្ឋនៅតំបន់នោះ ឈូសឆាយធ្វើស្រែ និងជីកយកអាចម៍ដី។ ប្រាសាទនេះមានឈ្មោះថា ប្រាសាទសក្ល ឬប្រាសាទប្រុស ត្រូវបានកសាង ដោយបុព្វបុរសខ្មែរនៅទស្សចន្លោះសតវត្សទី៨និងទី៩ ដែលគិតមកដល់ឥលូវប្រាសាទនេះមានអាយុកាលជិត១ពាន់ឆ្នាំហើយ។
លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងឱ្យដឹងថា ក្រោយទទួលបានសេចក្ដី រាយការណ៍ពីប្រជាពលរដ្ឋ កាលពីព្រឹកមិញនេះ លោកបានចុះទៅទីតាំងប្រាសាទផ្ទាល់ ដើម្បីពិនិត្យស្ថានភាពទូទៅ និងហាមឃាត់មិនឱ្យឈូសឆាយ។
លោកថា ការឈូសឆាយមានទំហំតូចទេ ដើម្បីធ្វើស្រែ និងជីកយកអាចម៍ដី ហើយប្រជាពលរដ្ឋបានអាស្រ័យផលនៅលើដីបរិវេណប្រាសាទតាំងពីឆ្នាំ១៩៧៩មក។ ប៉ុន្តែមិនមានចេញជាប្លង់កម្មសិទ្ធិស្របច្បាប់ឡើយ។ លោកថា ជនល្មើសដែលបានឈូសវាទយកដី និងជីកយកអាចម៍ដីនៅបរិវេណប្រាសាទបូរាណ ត្រូវតែផ្តន្ទាទោសតាមច្បាប់ជាដាច់ខាត។ “កុំថា ឡើយតួប្រាសាទ សូម្បីការឈូសឆាយ ឬកាប់ទន្ទ្រានបរិវេណប្រាសាទ គឺមិនអនុញ្ញាតជាដាច់ខាត។ ឥឡូវជនល្មើសដែលគាត់ឈូស ការឈូសឆាយមិនធំដែរទេ យើងមើលរូបថតយើងឃើញធំ តែតូចដែរទេ។ ឥឡូវគាត់បានផ្អាកសកម្មភាព និងបំពេញដីមកវិញ(ដីដែលឈូស)។អញ្ចឹងយើងមានការអនុគ្រោះដល់គាត់”។
បើតាមច្បាប់បេតិកភណ្ឌ មិនអនុញ្ញាតឱ្យមានការឈូសឆាយ កាប់ទន្រ្ទានដីនៅក្បែរប្រាសាទរង្វង់ ១ពាន់ម៉ែត្រ។ នេះបើតាមលោក លោក សុខ ធួក។ លោកថា បច្ចុប្បន្នប្រាសាទដែលត្រូវបានកសាងពីថ្មភក់នេះមានរូបរាងល្អស្អាតប្រហែល ៦០% ខណៈប្រាសាទត្រូវបានកសាងឡើង ដោយព្រះមហាក្សត្រីមួយអង្គ ព្រះនាមស្រីទេវី។
បើគេចង់ទៅប្រាសាទខាងលើ គឺអាចធ្វើដំណើរតាមកំពង់ចម្លងក្នុងទីរួមខេត្តឆ្ពោះទៅកំពង់ចម្លងកំពង់លែង រួចធ្វើដំណើរតាមម៉ូតូ ឬជិះកង់បី ដែលមានចម្ងាយពីរួមខេត្តកំពង់ឆ្នាំងប្រមាណ ៤០គីឡូម៉ែត្រ។
លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងបានអំពាវនាវដល់ដល់កូនខ្មែរសូមចូលរួមជួយថែរក្សាសម្បត្តិវប្បធម៌ជាតិយើង ព្រោះជាដុំពេជ្រមិនអាចកាត់ថ្លៃបាន និងជាសម្បត្តិវប្បធម៌របស់កូនខ្មែរជាង ១៥លាននាក់៕
រូបភាព៖ មន្ទីរវប្បធម៌ និង វិចិត្រសិល្បៈខេត្តកំពង់ឆ្នាំង