- 2019-06-21 04:17:39
- ព័ត៌មាន
ប្រវត្តិពិតលោក ជ័យ ថាវី គ្រូបង្រៀនល្បីឈ្មោះនៅកម្ពុជា
- 2019-06-21 04:17:39
- ចំនួនមតិ 0 | ចំនួនចែករំលែក 0
ប្រវត្តិពិតលោក ជ័យ ថាវី គ្រូបង្រៀនល្បីឈ្មោះនៅកម្ពុជា
ចន្លោះមិនឃើញ
សាលាជ័យ ថាវី ជាសាលាបង្រៀនគួរ ត្រៀមប្រលងឌីប្លូម បាក់ឌុប និងប្រលងយកអាហារូបករណ៍ទៅក្រៅប្រទេសដ៏ល្បី ជាយូរមកហើយ។ កេរ្តិ៍ឈ្មោះល្បីរន្ទឺ បាននាំឲ្យយុវជនតាំងពីរាជធានី រហូតដល់ជនបទ បានស្គាល់លោកគ្រូ ជ័យ ថាវី ដែលជាអ្នកបង្កើតសាលានេះឡើង។ តើលោកគ្រូ មានប្រវត្តិតស៊ូយ៉ាងណាខ្លះ ទម្រាំជោគជ័យដូចថ្ងៃនេះ?
លោក ជ័យ ថាវី កើតនៅថ្ងៃ២១ ខែឧសភា ឆ្នាំ១៩៦២ នៅភូមិស្បែក ឃុំកណ្ដោលជ្រំ ស្រុកពញាក្រែក ខេត្តកំពង់ចាម (បច្ចុប្បន្នស្ថិតក្នុងខេត្តត្បូងឃ្មុំ)។ លោកជាកូនច្បង ក្នុងចំណោមបងប្អូន ១០នាក់។ ឪពុករបស់លោកជាវិស្វករគីមីនៃមន្ទីរពិសោធន៍ចម្ការកៅស៊ូជប់ និងជាឱសថការីផ្នែកផលិតថ្នាំគ្រាប់ ក្នុងសម័យអាណានិគមនិយមបារាំង។ ចំណែកម្ដាយ ជាមេផ្ទះ។
ប្រវត្តិសិក្សា និងការងារ៖
នៅពេលធំដឹងក្ដី នាឆ្នាំ១៩៦៨ កុមារាជ័យ ថាវី ត្រូវបានឪពុកបញ្ជូនទៅរៀននៅសាលាបឋមសិក្សាម្រាមទាល ហៅជប់ ។ នៅសម័យនោះគេរៀនបញ្ច្រាសមកវិញ គឺចាប់ពីថ្នាក់ទី១២ ចុះមកទី១។ លោករៀនបានតែ ២ឆ្នាំក៏ឈប់ទៅវិញ ព្រោះមានរដ្ឋប្រហារ ១៨មីនា ឆ្នាំ១៩៧០ កើតឡើង។
នៅឆ្នាំ១៩៧០ ដដែលនោះ លោកបានឡើងមករាជធានីភ្នំពេញ ដោយស្នាក់នៅជាមួយម្ដាយធំ ហើយបានចូលរៀននៅសាលាបឋមសិក្សាចៅពញាហុក សង្កាត់បឹងកេងកង១។ លោករៀនបានចប់ថ្នាក់ទី៧ ក៏ត្រូវវិលត្រឡប់ទៅស្រុកកំណើតវិញ ដោយសារសង្គ្រាមកាន់តែធ្ងន់ធ្ងរ។ សម័យប៉ុលពតចូលមកដល់ លោកមិនបានរៀន រហូតដល់ឆ្នាំ១៩៨១ ទើបឪពុករបស់លោក បញ្ជូនចូលសាលាវិញ គឺនៅសាលាមធ្យមសិក្សាកម្រិត២សួង។ លោករៀននៅសួង ៣ឆ្នាំ កាលនោះមិនមានគ្រូល្អទេ ព្រោះគ្រូនៅសម័យនោះ ត្រូវបានប៉ុលពតសម្លាប់ស្ទើរអស់ទៅហើយ។ រដ្ឋាភិបាលនៅសម័យនោះ អនុវត្តផែនការ [អ្នកចេះច្រើនបង្រៀនអ្នកចេះតិច]។
ឆ្នាំ១៩៨៣ លោក ជ័យ ថាវី ពោលគឺអាយុដល់ទៅ ២១ឆ្នាំ ទើបលោកបានប្រឡងជាប់ថ្នាក់ឌីប្លូម។ ដោយសារលើសអាយុ លោកបានកែអាយុ ដើម្បីបានចូលរៀននៅសាលាកម្រិត៣កំពង់ចាម។ នៅឆ្នាំ១៩៨៦ លោកបានប្រលងជាប់បាក់ឌុប។
ក្រោយជាប់បាក់ឌុប លោកបានដាក់ពាក្យប្រលងចូលរៀននៅសាកលវិទ្យាល័យសុខាភិបាល ប៉ុន្តែលោកប្រលងមិនជាប់នោះទេ។ ក្រោយប្រឡងធ្លាក់នៅសាលានោះ ដោយសារគ្មានអ្នកធានាប្រវត្តិរូប (សម័យនោះ ជាសម័យរដ្ឋកម្ពុជា អ្នកធានាប្រវត្តិរូបសំខាន់ណាស់) លោកក៏ប្រលងចូលធ្វើជាគ្រូបង្រៀនផ្នែកគីមីវិទ្យា ហើយត្រូវរៀននៅសាកលវិទ្យាល័យភូមិន្ទភ្នំពេញ ៥ឆ្នាំទៀត។ តាមពិតទៅ លោកមិនចង់ធ្វើជាគ្រូប៉ុន្មានទេ ប៉ុន្តែបើលោកមិនធ្វើ ខ្លាចគេចាប់ទៅធ្វើជាទាហាន ហើយម្យ៉ាងទៀត គ្រូនៅសម័យនោះមិនសូវមានផង។
ឆ្នាំ១៩៨៩ ពោលគឺក្រោយរៀនមហាវិទ្យាល័យបាន ៣ឆ្នាំ លោកត្រូវចេញមកធ្វើគ្រូនៅសាកលវិទ្យាល័យតែម្ដង ដោយសារប្រទេសកំពុងខ្វះគ្រូបង្រៀន។ កាលនោះលោកមិនទាន់មានបរិញ្ញាបត្រទេ គឺបង្រៀនផង រៀនខ្លួនឯងផង។ លោកបង្រៀននៅសាកលវិទ្យាល័យភូមិន្ទភ្នំពេញផង មកបង្រៀនគួរនៅបាក់ទូកផង។ បច្ចុប្បន្ន លោកជាប្រធានដេប៉ាតេម៉ង់គីមីវិទ្យានៃសាកលវិទ្យាល័យភូមិន្ទភ្នំពេញ។
ប្រវត្តិកកើតនៃសាលាជ័យថាវី៖
នៅឆ្នាំ១៩៨៩ ជាឆ្នាំដែលលោកជ័យ ថាវី ចេញបង្រៀនដំបូង កាលនោះលោកបើកថ្នាក់បង្រៀននៅផ្ទះល្វែង។ សាលាជ័យថាវី ត្រូវបានបង្កើតឡើង នៅឆ្នាំ១៩៩៣ កាលនោះមានតែ ២ ទៅ៣ថ្នាក់ប៉ុណ្ណោះ។ នៅពេលល្បីកាន់តែខ្លាំង លោកក៏បានពង្រីកបន្ថែមទៀត ហើយគ្រូៗទាំងអស់ដែលបានបង្រៀនជាមួយគ្នា បានមូលមតិគ្នាដាក់ឈ្មោះថា សាលាជ័យ ថាវីនេះទៅ។
លោក ជ័យ ថាវី បានប្រាប់ក្នុងបទសម្ភាសន៍កាលពីឆ្នាំ២០១៤ ថា មូលហេតុដែលលោកបើកសាលាបង្រៀនគួរនេះឡើង គឺដោយសាតែលោកចង់ពង្រីកចំណេះដឹង ហើយម្យ៉ាងទៀតវាជាអាជីពក្នុងនាមជាគ្រូបង្រៀនម្នាក់របស់លោក។
លោកបញ្ជាក់ថា សាលាជ័យថាវី ចាប់ផ្ដើមល្បីខ្លាំងនៅឆ្នាំ១៩៩៧។ មូលហេតុដែលធ្វើឲ្យសាលានេះល្បីខ្លាំង ព្រោះកម្មវិធីអប់រំ នៅកាលនោះវាខុសពីបច្ចុប្បន្ន។ អ្នកដែលជាប់បាក់ឌុប ចង់រៀនបន្តនៅមហាវិទ្យាល័យត្រូវតែប្រលងចូល។ អីចឹងហើយ សិស្សទាំងនោះត្រូវតែមករៀនវិញ្ញាសាត្រៀមដើម្បីប្រលង ចូលមហាវិទ្យាល័យ។
អ្វីជាភាពជោគជ័យរបស់លោក?
លោក ជ័យ ថាវី បានបញ្ជាក់ថា តាមរយៈការបង្រៀន និងប្រាក់ដែលបានមកពីការបង្រៀន លោកអាចដោះស្រាយជីវភាពរស់នៅក្នុងគ្រួសារបានដោយស្រួល។ ភាពជោគជ័យមួយវិញទៀត គឺសិស្សជាច្រើនបានស្គាល់លោក ហើយគ្រូគីមីវិទ្យានៅក្នុងប្រទេសកម្ពុជាប្រហែលជា៩០% ជាកូនសិស្សរបស់លោក។
ជាចុងក្រោយ លោកគ្រូ ជ័យ ថាវី បានផ្ដាំដល់យុវវ័យ ដែលចង់ក្លាយខ្លួនជាសាស្ត្រាចារ្យល្បី គឺត្រូវខិតខំស្រាវជ្រាវបន្ថែមជាដាច់ខាត មិនត្រូវនៅស្ងៀមនោះទេ។ ការបង្រៀនទៀតសោត គឺត្រូវមានគរុកោសល្យជាចាំបាច់៕
