- 2019-09-02 01:37:27
- ការអប់រំ
អាយុត្រឹម ១៣ឆ្នាំ ហេង សិរីមង្គល ឈ្នះពានរង្វាន់សិស្សពូកែពិភពលោក នៅអូស្ត្រាលី
- 2019-09-02 01:37:27
- ចំនួនមតិ 0 | ចំនួនចែករំលែក 0
អាយុត្រឹម ១៣ឆ្នាំ ហេង សិរីមង្គល ឈ្នះពានរង្វាន់សិស្សពូកែពិភពលោក នៅអូស្ត្រាលី
ចន្លោះមិនឃើញ
យុវជនឆ្នើមរបស់កម្ពុជា ហេង សិរីមង្គល អាយុត្រឹម១៣ឆ្នាំ ប៉ុន្តែមានសមត្ថភាព និងចំណេះដឹងមិនធម្មតា អាចដណ្ដើមបានលេខ១ពានរង្វាន់ World Scholar's Cup នៅឯប្រទេសអូស្ត្រាលី និងជាប់ទៅជុំទី៣ វគ្គផ្ដាច់ព្រ័ត្រនៅឯសហរដ្ឋអាមេរិក នាខែវិច្ឆិកា ២០១៩ ខាងមុខនេះទៀតផង។
សិស្សឆ្នើមរបស់សាលាអន្តរជាតិ Western រូបនេះ បានឲ្យដឹងថា ខ្លួនឈ្នះបានលេខ១ពានរង្វាន់ The First Place Overall Student Junior Division, World Scholar's Cup, Global Round in Sydney 2019 ដែលជាពានរង្វាន់ធំជាងគេទី១ អាយុក្រោម១៤ឆ្នាំ ក្នុងចំណោមសិស្ស ២៨ប្រទេសចូលរួម។ ក្រៅពីនេះទៀតនោះ រូបគេបានឈ្នះពាន Trophies ចំនួន៣ រួមនិងមេដាយមាសចំនួន ១៥គ្រឿងផ្សេងទៀតផងដែរ។ ចំពោះការប្រកួតនេះដែរ គឺនិយាយជជែកដេញដោលគ្នា (Debate) ផ្ដោតលើមុខវិជ្ជា វិទ្យាសាស្ត្រ អក្សរសាស្ត្រ សិល្បៈ ភ្លេង ប្រវត្តិសាស្ត្រ និងសិក្សាសង្គមជាដើម។
មិនត្រឹមតែឈ្នះពានរង្វាន់លក្ខណៈឯកត្តជននោះទេ ហេង សិរីមង្គល ក៏បានប្រកួតឈ្នះមេដាយជាក្រុមថែមទៀតផង ហើយបន្តដំណើរប្រកួតទាំងជាក្រុម និងម្នាក់ឯងផងដែរនៅវគ្គផ្ដាច់ព្រ័ត្រជុំទី៣នៅឯអាមេរិកនេះ។
ចំពោះជ័យជម្នះនេះដែរ សិស្សសាលាអន្តរជាតិ Western រូបនេះបញ្ជាក់ថាពិតជាមានមោទនភាពជាខ្លាំងណាស់ ដែលអាចឈ្នះពានរង្វាន់ដ៏ធំ និងមានអត្ថន័យមួយនេះជូនប្រទេសកម្ពុជា ហើយវាពិតជាបានធ្វើឲ្យប្រទេសជឿនលឿន ខ្លាំងៗមួយចំនួនឆ្ងល់ ងាកមកចាប់អារម្មណ៍ផងដែរអំពីសមត្ថភាពកូនខ្មែរ។ មុនការប្រកួតចាប់ផ្ដើមពួកគេមិនរំពឹងឡើយថា កម្ពុជាអាចឈានទៅដល់ឈ្នះពានរង្វាន់ ឬមេដាយច្រើនបែបនេះឡើយ។
បញ្ជាក់ផងដែរថា World Scholar's Cup នេះបង្កើតដោយលោក Daniel Berdichevsky និង DemiDec ចាប់តាំងពីឆ្នាំ២០០៦ មកម្ល៉េះ ហើយជាកម្មវិធីរបស់បណ្ឌិតសភាអន្តរជាតិ (International Academic Program) ដែលមានប្រទេសចូលរួមចំនួន៨២។ កម្មវិធីនេះសំដៅទៅលើសិស្សមធ្យមសិក្សា ដែលចូលរួមពីគ្រប់វប្បធម៌ ជាតិសាសន៍ ទូទាំងពិភពលោក ដើម្បីរួមគ្នាពិភាក្សា ជជែកដេញដោល បង្ហាញគំនិតផ្សេងៗ នាពេលបច្ចុប្បន្ននេះ។ ការប្រកួតត្រូវបានបែងចែកជា២ គឺក្រុមសិស្សតូច (Junior Division) អាយុក្រោម១៤ឆ្នាំ និងក្រុមសិស្សធំ (Senior Division) អាយុលើ១៤ឆ្នាំ(ការប្រឡងមានលក្ខណៈជាបុគ្គល និងជាក្រុម)។
ការប្រកួតមាន៣ដំណាក់កាល ទី១ ពានរង្វាន់សិក្សាពិភពលោក ជុំតំបន់ (World Scholar's Cup Regional Round) ទី២ ពានរង្វាន់សិក្សាពិភពលោក ជុំសកល (World Scholar's Cup Global Round) និងទី៣ ការប្រកួតយកពានជើងឯក (Tournament of Champions) នៅថ្ងៃទី៨-១៣ វិច្ឆិកា ២០១៩ នៅសាកលវិទ្យាល័យ យ៉ែល (Yale University) ក្រុងញូយ៉ក សហរដ្ឋអាមេរិក។ ដោយឡែកសម្រាប់ ហេង សិរីមង្គល រួមនិងមិត្តរួមក្រុមបានឈ្នះពីរដងរួចហើយ រួមទាំងជុំនៅឯប្រទេសអូស្ត្រាលី កាលពីថ្ងៃប្រកួតទី១៥-២០ ខែសីហា ២០១៩ កន្លងទៅនេះ៕