នាយករដ្ឋមន្រ្តីម៉ាឡេស៊ី លោក Mahathir Mohamad បានប្រកាសលាលែងពីតំណែង ប៉ុន្តែត្រូវបានស្នើឲ្យបន្តធ្វើជាមេដឹកនាំបណ្តោះអាសន្ន ដោយព្រះមហាក្សត្រនៃប្រទេសម៉ាឡេស៊ី។

លោក Mahathir បាននិយាយនៅក្នុងសេចក្តីថ្លែងការណ៍ប្រវែងពីរបន្ទាត់មួយថា លោកបានជូនដំណឹងដល់ព្រះមហាក្សត្រ អំពីការលាលែងតំណែងរបស់លោក នៅវេលាម៉ោង ១ រសៀល (ម៉ោងនៅទីក្រុងគូឡាឡាំពួរ) កាលពីថ្ងៃច័ន្ទកន្លងទៅនេះ។

យោងតាមប្រភពព័ត៌មានពីកាសែត Reuters បានដកស្រង់សំដីប្រភពចំនួន ៣ ថា លោក Mahathir ក៏បានលាឈប់ពីគណបក្ស Parti Pribumi Bersatu Malaysia (PPBM) របស់ខ្លួនផងដែរ។ ការសម្រេចចិត្តរបស់លោក Mahathir កើតឡើង បន្ទាប់ពីមានការបះបោរនយោបាយ ក្រោយមានសេចក្តីរាយការណ៍កាលពីយប់ថ្ងៃអាទិត្យថា គណបក្សរបស់លោកគ្រោងនឹងបង្កើតរដ្ឋាភិបាលថ្មីមួយ។

យ៉ាងណាមិញ ព្រះមហាក្សត្រម៉ាឡេស៊ី បានទទួលយកការលាឈប់របស់លោក Mahathir ហើយ ប៉ុន្តែបានស្នើសុំលោក Mahathir ធ្វើជានាយករដ្ឋមន្ត្រីបណ្តោះអាសន្នសិន ខណៈពេលរង់ចាំការតែងតាំងនាយករដ្ឋមន្ត្រីថ្មី។ មុនពេលនោះមកដល់ លោក Mahathir នឹងចាត់ចែងកិច្ចការប្រទេសដដែល។

គួរឲ្យដឹងថា ឧបនាយករដ្ឋមន្ត្រីម៉ាឡេស៊ី អ្នក​ស្រី Wan Azizah Wan Ismail អាច​នឹង​ក្លាយ​ជា​ស្ត្រី​ដំបូង​បង្អស់​ ឡើង​កាន់​តំណែង​នាយករដ្ឋមន្ត្រីម៉ាឡេស៊ី ក្រោយ​ពេល​ដែល​លោក មហាធៀរ ​លាលែង​ទៅ។ លោក Mahathir បាន​ឡើង​កាន់​តំណែង​ក្នុង​វ័យ ៩៤​ឆ្នាំ​កាលពី​ខែ ឧសភា​ឆ្នាំ ២០១៨​កន្លង​ទៅ ដែល​ជា​លើក​ទី ២ ​ក្នុង​ការ​ទទួល​តំណែង​ជា​នាយករដ្ឋមន្ត្រី៕