សម្តេច ហ៊ុន សែន ផ្ញើសារឱ្យរួមគ្នាលុបបំបាត់ជំងឺគ្រុនចាញ់ ទោះកំពុងប្រយុទ្ធកូវីដ ១៩ ក៏ដោយ

2020-04-21 04:20:15
ព័ត៌មាន

2020-04-21 04:20:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីចូលរួមក្នុងទិវាគ្រុនចាញ់ពិភពលោក ២៥ មេសា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើសារលិខិត ១ ច្បាប់ជូនជនរួមជាតិ ក៏ដូចជាក្រសួងស្ថាប័ន និង ដៃគូពាក់ព័ន្ធជាតិ អន្តរជាតិ ឱ្យបន្តយកចិត្តទុកដាក់ប្រយុទ្ធប្រឆាំងនឹងជំងឺគ្រុនចាញ់នៅកម្ពុជាតទៅទៀត ដើម្បីជោគជ័យតាមកម្មវិធីជាតិរបស់កម្ពុជា ។

រូបភាព៖ www.medscape.com

សារលិខិតរបស់សម្តេចប្រមុខរាជរដ្ឋាភិបាល បានសរសេរថា សូមក្រសួងស្ថាប័ន អាជ្ញាធរមូលដ្ឋានគ្រប់លំដាប់ថ្នាក់ វិស័ឯកជន អង្គការនានា ប្រព័ន្ធផ្សព្វផ្សាយព័ត៌មាន សហគមន៍ជាតិ អន្តរជាតិ និង ដៃគូអភិវឌ្ឍន៍ ជាពិសេសប្រជាជនគ្រប់រូប សូមបន្តចូលរួម និង គាំទ្រដល់បេសកកម្មរបស់ក្រសួងសុខាភិបាល តាមផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ក្នុងព្រះរាជាណចក្រកម្ពុជា ២០១១-២០២៥ ឱ្យទទួលបានជោគជ័យ ។ រាជរដ្ឋាភិបាល តែងតែផ្តល់លទ្ធភាព និង លើកទឹកចិត្ត ឱ្យមានចលនាកៀរគរប្រភពធនធាន ដើម្បី ជំរុញការអនុវត្តន៍ការងារជំងឺគ្រុនចាញ់ឱ្យកាន់តែមានសកម្មភាពខ្លាំងក្លាថែមទៀត ឆ្ពោះទៅលុបបំបាត់ជំងឺនេះឱ្យបានតាមផែនការកំណត់ បើទោះបីជាពិភពលោក និងកម្ពុជា ផង កំពុងប្រឈមនឹងវិបត្តិជំងឺកូវីដ ១៩ ក៏ដោយ ។

តាមការគ្រោងទុក ឆ្នាំនេះកម្ពុជា ប្រារព្ធ ទិវាគ្រុនចាញ់ ក្រោមប្រធានបទ គ្មានជំងឺគ្រុនចាញ់ផ្តើមចេញពីយើង ក្នុងគោលបំណងជំរុញ និងបំផុសការយល់ដឹង និង យកចិត្តទុកដាក់កាន់តែខ្ពស់បន្ថែមទៀត ក្នុងការលើកកម្ពស់សុខុមាលភាពសង្គម និង សំដៅរួមចំណែកដល់ការរក្សាសុខភាពរបស់ប្រជាពលរដ្ឋ។

របាយការណ៍របស់អាជ្ញាធរជាតិប្រយុទ្ធប្រឆាំងជំងឺគ្រុនចាញ់នៅកម្ពុជា បានអះអាងថា កម្ពុជា លែងមានករណីស្លាប់ដោយសារជំងឺគ្រុនចាញ់ចាប់តាំងពីឆ្នាំ ២០១៨ មកម្ល៉េះ ដែលបានសេចក្តីថា កម្ពុជាសម្រេចបានគោលដៅ ៣ ឆ្នាំមុនការគ្រោងទុក គឺឆ្នាំ ២០២០ ហើយថាឆ្នាំ ២០១៩ ករណីជំងឺគ្រុនចាញ់ប្រភេទ ហ្វាល់ស៊ីប៉ារ៉ូម ឬ ប្រភេទសន្ធំ និង ចម្រុះ មានចំនួន ៤៩៩០ ករណី គឺបានថយចុះ ៧២ ភាគរយ បើធៀបនឹងឆ្នាំ ២០១៨ ដែលមានដល់ទៅ ១៨០៥៧ ករណី ខណៈជំងឺគ្រុនចាញ់ប្រភេទលាប់ ក៏បានថយចុះ ៣៩ ភាគរយដែរ។

អង្គការសុខភាពពិភពលោក ( WHO) បានសរសេរនៅលើគេហទំព័ររបស់ខ្លួនថា ពីចន្លោះឆ្នាំ ២០០០ ដល់ឆ្នាំ ២០១៤ ជំងឺគ្រុនចាញ់បានបណ្តាលឱ្យមនុស្សស្លាប់ពី ៧៤៣ ០០០ ទៅ ៤៤៦ ០០០ នាក់ នៅទូទាំងពិភពលោក ឬ ប្រមាណជា ៤០ នៃ អ្នកដែលកើតជំងឺគ្រុនចាញ់នេះ។

WHO បន្ថែមថា បច្ចុប្បន្នេះ នៅទូទាំងពិភពលោក ហាក់ដូចជាមិនមានភាពជឿនលឿនក្នុងការកាត់បន្ថយអត្រា នៃការស្លាប់ឡើយ ដូច្នេះ ការស្លាប់ដោយសារជំងឺគ្រុនចាញ់ គឺនៅទ្រឹងពីចន្លោះឆ្នាំ ២០១៤ ដល់ឆ្នាំ ២០១៨។

តាមរយៈសាររបស់អង្គការសុខភាពពិភពលោកនេះ គេអាចយល់បានថា នៅទូទាំងពិភពលោក មានប្រទេសមិនច្រើនទេដែលទទួលបានជោគជ័យដូចកម្ពុជា ក្នុងការប្រយុទ្ធប្រឆាំងទៅនឹងជំងឺគ្រុនចាញ់។

ទោះយ៉ាងនេះ សារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា កម្ពុជាមិនទាន់អាចធ្វេសប្រហែសចំពោះជំងឺគ្រុនចាញ់បានទេ ព្រោះថា ជំងឺគ្រុនចាញ់នៅតែជាបន្ទុសម្រាប់កម្ពុជានៅឡើយ ខណៈកម្ពុជា កំពុងខិតខំអភិវឌ្ឍន៍តាមតំបន់ព្រំដែន និង អេកូទេសចរធម្មជាតិ ព្រៃភ្នំ ប្រឈមនឹងបញ្ហាជំងឺគ្រុនចាញ់នៅឡើយ ពោលគឺគ្រុនចាញ់ នៅតែរំខាន ឬ ធ្វើឱ្យប៉ះពាល់ដល់គុណភាពជីវិតប្រជាជន និង ការអភិវឌ្ឍប្រទេសជាតិ៕

សូមអានសារលិខិតរបស់សម្ដេចតេជោ ខាងក្រោមនេះ៖