- 2020-08-20 03:51:24
- សេដ្ឋកិច្ច
ស្រស់ស្រាយបំផុត! ទឹកធ្លាក់អន្លង់ធំ ខេត្តកំពត ទាក់ចិត្តអ្នកចូលចិត្តងូតទឹកជ្រោះធ្លាក់ពីលើភ្នំ
- 2020-08-20 03:51:24
- ចំនួនមតិ 0 | ចំនួនចែករំលែក 0
ស្រស់ស្រាយបំផុត! ទឹកធ្លាក់អន្លង់ធំ ខេត្តកំពត ទាក់ចិត្តអ្នកចូលចិត្តងូតទឹកជ្រោះធ្លាក់ពីលើភ្នំ
ចន្លោះមិនឃើញ
ទឹកជ្រោះ អន្លង់ធំ ស្ថិតនៅក្នុងសហគមន៍ព្រែកត្នោត ជារមណីយដ្ឋានបែបធម្មជាតិ ទាក់ចិត្តភ្ញៀវទេសចរណ៍គ្រប់គ្នាមកទស្សនាកម្សាន្ត នៅរៀងរាល់ថ្ងៃចុងសប្ដាហ៍ និងថ្ងៃឈប់សម្រាក។ តើទឹកធ្លាក់អន្លង់ធំ មានអ្វីប្លែក និងអស្ចារ្យ?
ទឹកធ្លាក់អន្លង់ធំ គឺជារមណីយដ្ឋាន ដែលទាក់ចិត្តភ្ញៀវទេសចរបំផុត ព្រោះជាមានទឹកធ្លាក់ពីលើភ្នំបូកគោ ហើយទឹកហូរធ្លាក់ទៅកាន់តំបន់សមុទ្រ ហើយមានព្រៃឈើច្រើន និងមានថ្មដុះច្រូងច្រាង ធ្វើឲ្យទឹកហូរបោកលើផ្ទៃថ្មធំ ជាទីចាប់អារម្មណ៍ និងទឹកថ្លាឈ្វេង មានមច្ឆាតូចធំ ហែលប្រដេញគ្នា គួរជាទីសែនមនោរម្យ សម្រាប់អ្នកនិយមចូលចិត្តហែរទឹកកម្សាន្តនៅទីភ្នំបែបធម្មជាតិ។
ទឹកជ្រោះខាងលើនេះស្ថិតនៅចម្ងាយប្រមាណជា ២៧គីឡូម៉ែត្រពីទីរួមខេត្តកំពត ដោយធ្វើដំណើរតាមផ្លូវទៅកាន់វាលរេញ មកដល់ត្រឹមគីឡូម៉ែត្រលេខ ១៧៧-១៧៨ នៅខាងស្ដាំដៃនឹងឃើញឈ្មោះវិទ្យាល័យ ហ៊ុន សែន ព្រែកត្នោត ហើយបន្ដដំណើរតាមផ្លូវសាលានេះ ក្នុងចម្ងាយប្រមាណជាជាង១គីឡូម៉ែត្រ នឹងឃើញស្លាកឈ្មោះរបស់រមណីយដ្ឋានទឹកធ្លាក់អន្លង់ធំ ស្ថិតនៅក្នុងភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត។
អ្នកលក់ដូរនៅរមណីយដ្ឋានអន្លង់ត្នោត បាននិយាយប្រាប់ Sabay ថា នៅអំឡុងនៃការផ្ទុះជំងឺកូវីដ១៩ដំបូង រមណីយដ្ឋាននេះឆ្ងាត់ជ្រងំ ប៉ុន្ដែក្រោយពីស្ថានភាពជំងឺកូវីដ១៩ ហាក់ធូរស្បើយ នៅអំឡុង១ខែមកនេះ ភ្ញៀវទេសចរណ៍ ហាក់មកកម្សាន្តច្រើនខុសពីធម្មតា ជាពិសេសនៅអំឡុងថ្ងៃឈប់សម្រាក ដែលកំណត់ដោយរាជរដ្ឋាភិបាល ជំនួសថ្ងៃចូលឆ្នាំនេះ។
ចំពោះម្ហូបអាហារនៅទីនេះមានសម្បូរបែប មានទាំងមាន់ សម្លកុម្ម៉ង់ ហើយក៏មានគ្រឿងសមុទ្រធ្វើភ្លាមៗ តាមតម្រូវការភ្ញៀវទេសចរ ហើយតម្លៃធូរថ្លៃ ទោះថ្ងៃបុណ្យក៏លក់ដូរធម្មតា ព្រោះមានតារាងបង្ហាញដោយសហគមន៍ទេសចរណ៍។
គួរកត់សម្គាល់ថា រមណីយដ្ឋានធម្មជាតិអន្លង់ធំបានបង្កើតឡើងអំឡុងឆ្នាំ ២០០៣ លើផ្ទៃដីជិត ២០០ហិកតា គាំទ្រ និងឧបត្ថម្ភពីសំណាក់អង្គការសង្គ្រោះសត្វព្រៃកម្ពុជា (SCW) និងអង្គការជួយជនក្រីក្រ (CRS)។ រមណីយដ្ឋានអន្លង់ធំ ក៏មានសេវាផ្តល់ផ្ទះសម្រាប់ជូនភ្ញៀវស្នាក់នៅផងដែរ ដោយផ្ទះទាំងនោះជ្រើសរើសយកផ្ទះប្រជាពលរដ្ឋសហគមន៍ទាំងបួនភូមិទូទាំងឃុំតែម្តង៕
