- 2021-01-09 04:43:12
- ព័ត៌មាន
មហោស្រពពិព័រណ៍វិទ្យាសាស្រ្ដប្រចាំឆ្នាំ នឹងធ្វើឡើងតាមអនឡាញជាលើកដំបូងនៅកម្ពុជា
- 2021-01-09 04:43:12
- ចំនួនមតិ 0 | ចំនួនចែករំលែក 0
មហោស្រពពិព័រណ៍វិទ្យាសាស្រ្ដប្រចាំឆ្នាំ នឹងធ្វើឡើងតាមអនឡាញជាលើកដំបូងនៅកម្ពុជា
ចន្លោះមិនឃើញ
អង្គការពិព័រណ៍វិទ្យាសាស្រ្ដកម្ពុជា និងអង្គការស្ទីមកម្ពុជា បានចូលរួមសហការគ្នាដើម្បីរៀបចំមហោស្រពពិព័រណ៍វិទ្យាសាស្រ្ដប្រចាំឆ្នាំ លើកទី១៦ និងជាពិព័រណ៍ស្ទែមអនឡាញដំបូងគេបង្អស់នៅក្នុងប្រទេសកម្ពុជា ដែលនឹងប្រព្រឹត្តទៅនៅថ្ងៃទី២៥ ខែមករា ដល់ថ្ងៃទី២៩ ខែមករា ឆ្នាំ២០២១។
ក្រោមប្រធានបទ "ត្រៀមខ្លួនដើម្បីអនាគត" និងតាមរយៈការសហការពីក្រសួងអប់រំ យុវជន និងកីឡា និងការគាំទ្រពីក្រសួងបរិស្ថាន ព្រឹត្តិការណ៍នេះនឹងពង្រីកវិសាលភាពរបស់ខ្លួន បន្ថែមពីលើការរៀបចំកម្មវិធីនៅតែរាជធានីភ្នំពេញ ដើម្បីផ្ដល់ឱកាសឲ្យសិស្សានុសិស្សទូទាំងប្រទេស អាចស្វែងយល់បន្ថែម និងបង្កើនការយល់ដឹងពីការអប់រំស្ទែម រួមទាំងមុខជំនាញផ្សេងៗក្នុងវិស័យនេះ សម្រាប់អាជីពការងារនាថ្ងៃអនាគត។
ជាមួយនឹងការផ្ដោតសំខាន់ទៅលើប្រធានបទពាក់ព័ន្ធនឹងការអប់រំស្ទែម នាថ្ងៃនីមួយៗ ក្នុងព្រឹត្តិការណ៍ផ្សាយផ្ទាល់នេះដែរ អ្នកទស្សនានៅទូទាំងប្រទេស នឹងអាចសិក្សាពីវីដេអូឯកសារអប់រំជាច្រើនបែប ព្រមទាំងអស់កម្សាន្តរីករាយជាមួយនឹងការសម្ដែងសិល្បៈប្លែកៗ ដែលនាំមកជូនដោយសិល្បករទាំងអាជីព និងមិនអាជីព។
ក្នុងនោះដែរ អ្នកទស្សនានឹងមានឱកាសជួប និងតាមដានជាមួយបេក្ខជនវគ្គផ្ដាច់ព្រ័ត្រពីកម្មវិធីប្រកួតស្ទែម By Smart ដំបូងគេបង្អសល់នៅកម្ពុជា និងការប្រកួតសិល្បៈគំនូររបស់សិស្សបឋមសិក្សា។ ម្យ៉ាងវិញទៀត ពួកគាត់ក៏អាចស្វែងយល់ពីមុខជំនាញនានានៅក្នុងវិស័យស្ទែម តាមរយៈសិក្ខាសាលាស្ដីពីអាជីពការងារផងដែរ។
បច្ចុប្បន្ននេះ គឺជាពេលមួយដ៏សំខាន់ ដើម្បីវិនិយោគទៅលើសហគមន៍វិទ្យាសាស្រ្ដ នៅទូទាំងសកលលោក ដោយសារស្ទែមដើរតួនាទីយ៉ាងសំខាន់ ក្នុងការសក្ដាស្ថានការណ៍ឡើងវិញ ដែលបង្កឡើងដោយសារវិបត្តិជំងឺកូវីដ-១៩។ យើងមានគោលបំណងបំផុសគំនិត និងផ្សារភ្ជាប់វិស័យវិទ្យាសាស្រ្ដទៅនឹងសង្គម ព្រមទាំងផ្ដល់នូវវេទិកាមួយដែលសិស្ស-និស្សិតកម្ពុជា និងអ្នកជំនាញស្ទែមអាចជឿទុកចិត្តបាន ដើម្បីរួមគ្នាបង្កើនទំនាក់ទំនង និងសេចក្ដីទុកចិត្តរវាងគ្នា និងគ្នា។
ចាប់តាំងពីពេលចាប់ផ្ដើមដំបូងមក មហោស្រពពិព័រណ៍វិទ្យាសាស្រ្ដកម្ពុជា បានក្លាយជាព្រឹត្តិការណ៍ស្ទែមមួយដែលឈានមុខគេនៅក្នុងប្រទេសកម្ពុជា ក្នុងគោលបំណងជំរុញនូវការស្រលាញ់វិទ្យាសាស្រ្ដបច្ចេកវិទ្យា វិស្វកម្ម និងគណិតវិទ្យារបស់យុវជនកម្ពុជាយើង។ ជាក់ស្ដែង ព្រឹត្តិការណ៍កាលពីឆ្នាំមុន យើងសង្កេតឃើញភាពជោគជ័យយ៉ាងធំធេង ដោយយើងទទួលបានអ្នកទស្សនាចាង ១៣០០០នាក់ ហើយគម្រោងស្ទែមជាង ២០០ ត្រូវបានដាក់បង្ហាញ និងមានការកាត់បន្ថយការប្រើប្រាស់ផលិតផលប្លាស្ទិកជាង ៥៨៧៥០ តាមរយៈការអនុវត្តគោលការណ៍ការពារបរិស្ថាន។
ព្រឹត្តិការណ៍ដ៏មានសារៈសំខាន់នេះ អាចប្រព្រឹត្តទៅបាន ក្រោមការឧបត្ថម្ភពីក្រុមហ៊ុនផារ៉ាហ្គន អេឌ្យូខេសិន ឯ.ក និងក្រុមហ៊ុន ស្មាត អាស្យាតា។ មហោស្រពពិព័រណ៍វិទ្យាសាស្រ្ដកម្ពុជាប្រចាំឆ្នាំលើកទី១៦ អាចទស្សនាបានដោយសេរី និងឥតគិតថ្លៃ។ សូមចុះឈ្មោះនៅគេហទំព័រ www.stemcambodia.org៕
