- 2021-08-03 04:47:05
- ព័ត៌មាន
ប្រាសាទគុកជើង ដែលមានចម្លាក់ព្រះពុទ្ធរូបទ្រង់ឈរក្នុងកាយវិការអភយមុទ្រា ទទួលការ សម្អាតកាប់ឆ្ការ
- 2021-08-03 04:47:05
- ចំនួនមតិ 0 | ចំនួនចែករំលែក 0
ប្រាសាទគុកជើង ដែលមានចម្លាក់ព្រះពុទ្ធរូបទ្រង់ឈរក្នុងកាយវិការអភយមុទ្រា ទទួលការ សម្អាតកាប់ឆ្ការ
ចន្លោះមិនឃើញ
ក្រុមការងារការិយាល័យបេតិកភណ្ឌ នៃមន្ទីរវប្បធម៌ និងវិចិត្រសិល្ប:ខេត្តកំពង់ធំ បានចុះកាត់កូនឈើ និងសម្អាតល្បាស់នៅប្រាសាទគុកជើង (ត្នោតជុំខាងជើង) នៅស្រុកបារាយណ៍ ខេត្តកំពង់ធំ។ ប្រាសាទនេះចម្ងាយប្រមាណ ៣០គ.ម.ពី ទីរួមខេត្តកំពង់ធំ ដើមឡើយសង់នៅសតវត្សទី៧ ដោយសារវត្តមានផ្ដែររចនាបថសំបូរព្រៃគុក ក៏ដូចជាចម្លាក់រូបហង្សនៅលើក្បាលជញ្ជាំង។
នៅប្រទេសកម្ពុជា ប្រាសាទបុរាណធ្វើអំពីឥដ្ឋដែលមានចម្លាក់ព្រះពុទ្ធរូបទ្រង់ឈរក្នុងកាយវិការអភយមុទ្រានេះមានតែមួយគត់។ បើតាមប្រភពពីទំព័រ Culture & Art នៅលើជញ្ជាំងឥដ្ឋ សិល្បករឆ្លាក់រូបព្រះពុទ្ធចំនួនប្រាំ គឺខាងលិច១ ខាងជើង១ ខាងត្បូង១ និងខាងកើត២ (នៅខាងកើតឆ្លាក់រូបតូចជាងទិសផ្សេងៗ តែឆ្លាក់ចំនួនពីរនៅអមសងខាងទ្វារចូលប្រាសាទ)។
ចម្លាក់ព្រះពុទ្ធរូបទាំងអស់សុទ្ធសឹងមានកាយវិការអភយមុទ្រា ដោយសារយើងឃើញព្រះហស្តឆ្វេងដាក់ទម្លាក់ចុះក្រោម និងព្រះហស្តស្ដាំ ដាក់ លាត្រង់មកខាងមុខត្រឹមដើមទ្រូង ហើយជាទូទៅកាយវិការរបៀបនេះច្រើនតែឃើញដាក់ព្រះហស្តនៅខាង មិនសូវមាន ដាក់របៀបនេះទេ។ អភយមុទ្រា មានន័យថា "កាយវិការគ្មានភាពភ័យខ្លាច" ហើយជាកាយវិការនៃការធានា និងសុវត្ថិភាព បំបាត់ភាពភ័យខ្លាចរបស់ព្រះពុទ្ធអង្គចំពោះ សត្វលោករបស់ទ្រង់។
គុកជើង ជាប្រាសាទសាងសង់ឡើងអំពីឥដ្ឋ បែរមុខទៅទិសខាងកើត មានកសិន្ធុទឹកព័ទ្ធជុំវិញ នៅដើមស.វ.ទី៧ ទំនងរជ្ជកាលព្រះបាទ ឦសាន វរ្ម័នទី១ (គ.ស.៦១៦-៦៣៧) ឧទ្ទិសដល់ព្រហ្មញ្ញសាសនា និកាយព្រះឥសូរ (នៅខាងមុខប្រាសាទមានចម្លាក់គោនន្ទិធ្វើអំពីថ្ម) ប៉ុន្តែចម្លាក់ ព្រះពុទ្ធរូបក្នុងលទ្ធិព្រះពុទ្ធសាសនាថេរវាទនេះពុំមែនសាងជំនាន់ជាមួយប្រាសាទទេ ពោល គឺគេសាងបន្ថែមនៅពេលក្រោយក្នុងស.វ.ទី១៤ រជ្ជកាលព្រះបាទស្រីស្រិន្ទជ័យវរ្ម័ន។
ការដែលគេហ៊ានសន្និដ្ឋានដូច្នេះមកពីមានសិលាចារឹកមួយចារឹកនៅលើមេទ្វារប្រាសាទដែលបង្ហាញថា ព្រះរាជគ្រូស្រីស្រិន្ទជ័យវរ្ម័នមកថ្វាយបង្គំព្រះពុទ្ធរូបគង់នៅលើផ្កាឈូក ពោលគឺព្រះពុទ្ធរូបដែលឆ្លាក់ជាប់ជញ្ជាំងប្រាសាទនេះឯង។ ប៉ុន្តែទម្រផ្កាឈូកក្រោមព្រះបាទព្រះពុទ្ធ បានបាក់បែកមើលស្ទើរលែងយល់ទៅហើយ៕