កុំព្រងើយឲ្យសោះ! ឥឡូវមន្ត្រីជំនាញថា កម្ពុជាគួរតែបារម្ភពីមេរោគបម្លែងថ្មី "អូមីក្រុង"

2021-11-27 14:07:55
ព័ត៌មាន

2021-11-27 14:07:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិភពលោកបាន និងកំពុងជួបការប្រឈមជាថ្មីទៀត ក្រោយមេរោគកូវីដ១៩បម្លែងថ្មីមួយប្រភេទដែលត្រូវបានរកឃើញរាលដាលនៅអាហ្វ្រិក ក្នុងនោះមន្ត្រីជំនាញបានរំលឹកថា កម្ពុជាបើទោះបច្ចុប្បន្នកំពុងមានស្ថានភាពល្អ ប៉ុន្តែគួរតែបារម្ភពី មេរោគប្រភេទនេះព្រោះវាមានកម្រិតឆ្លងរហ័សជាងប្រភេទណាទាំងអស់។

រូបភាព៖គេហទំព័រក្រសួងព័ត៌មាន

លោកស្រី Li Ailan ប្រធានអង្គការសុខភាពពិភពលោកប្រចាំនៅកម្ពុជា បានមានប្រសាសន៍ថា "កម្ពុជា គួរតែបារម្ភអំពីវីរុសបំប្លែងខ្លួនថ្មី អូមីក្រុង ដែលទើបរកឃើញថ្មីៗនេះ បើទោះបីកម្ពុជាសម្រេចបានអត្រានៃការចាក់វ៉ាក់សាំងកូវីដ១៩ខ្ពស់ក៏ដោយ!”។ មន្ត្រីជាន់ខ្ពស់អង្គការសុខភាពពិភពលោកដដែល បានបន្តថា បុគ្គលគ្រប់រូប គួរតែត្រៀមខ្លួនសម្រាប់ការកើនឡើងជាគំហុកជាយថាហេតុនៃករណីជំងឺកូវីដ១៩ ហើយយើងគួរតែបន្តរៀនសូត្រ និងកែតម្រូវវិធានការឆ្លើយតបរបស់យើង"។

វីរុសបំប្លែងខ្លួនថ្មី B.1.1.529 (ឈ្មោះ អូមីក្រុង) ត្រូវបានរាយការណ៍ជាលើកដំបូងទៅកាន់អង្គការសុខភាពពិភពលោក ដោយប្រទេសអាហ្វ្រិកខាងត្បូងកាលពីថ្ងៃទី ២៤ វិច្ឆិកា ២០២១។ មកទល់នឹងថ្ងៃទី ២៧ វិច្ឆិកានេះ មានរបាយការណ៍ថា ការឆ្លងជំងឺនេះនៅអាហ្វ្រិកខាងត្បូង បានកើនឡើងខ្លាំងក្លាណាស់នាប៉ុន្មានសប្ដាហ៍នេះ។

ស្ថានភាពនេះ អង្គការសុខភាពពិភពលោកបានក្រើនរំលឹកប្រទេសទាំងអស់ឲ្យបន្ថែមការប្រុងប្រយ័ត្នចំពោះការគំរាមកំហែងរបស់ អូមីក្រុង ខណៈមានការសិក្សាវីរុសបំប្លែងថ្មីនេះ មានកម្រិតឆ្លងរហ័សជាវីរុសណាទាំងអស់ក្នុងអំបូរកូវីដ១៩។

ទទួលបានការក្រើនរំលឹកនេះ កម្ពុជាតាមរយៈក្រសួងសុខាភិបាល បានចេញវិធានការណ៍៣ចំណូច ដើម្បីការពារ និងទប់ស្កាត់បានទាន់ពេលវេលានូវការចម្លងវីរុសប្រភេទថ្មីខាងលើនេះ និងដើម្បីបន្ត និរន្តភាពនៃការរស់នៅក្នុងប្រក្រតីភាពថ្មីក្នុងសង្គមកម្ពុជា ក្នុងនោះមាន៖

១. សូមបន្តអនុវត្តវិធានការសំខាន់ៗ ជាពិសេសសូមបន្តអនុវត្តវិធានការ "៣ការពារ និង៣កុំ” ឱ្យបាន ហ្មត់ចត់ ដើម្បីកាត់បន្ថយហានិភ័យនៃការឆ្លងវីរុសកូវីដ-១៩ រួមទាំងអនុវត្តវិធានការសុខភាពសាធារណៈ និងសង្គមចាំបាច់នានាដូចជា ការពាក់ម៉ាស់ឱ្យបានត្រឹមត្រូវ អនាម័យដៃដោយលាងសម្អាតញឹកញាប់ ការរក្សាគម្លាតសុវត្ថិភាពបុគ្គល ១,៥ម៉ែត្រឡើង ការកែលម្អខ្យល់ចេញចូលនៃទីធ្លាក្នុងផ្ទះ ឫទីតាំងការងារ ឫទីតាំងប្រកបរបររកស៊ីទទួលទាន ជៀសវាងកន្លែងមានមនុស្សច្រើន កន្លែងដែលបិទជិតគ្មានខ្យល់ចេញ ចូល និងទទួលចាក់ថ្នាំបង្ការជំងឺកូវីដ-១៩ ឱ្យបានគ្រប់ដូសមូលដ្ឋានទាំងអស់គ្នា។

២. រាយការណ៍ជូនអាជ្ញាធរមូលដ្ឋាន ឬគ្រូពេទ្យដែលនៅជិតលោកអ្នក អំពីករណីសង្ស័យណាមួយដែល ពាក់ព័ន្ធទៅនឹងភាពខុសប្លែកធម្មតានៃរោគសញ្ញា ឬជំងឺ និងត្រូវនៅដាច់ដោយឡែកដើម្បីកុំឱ្យមានការចម្លងបន្ត ទៅអ្នកដែលនៅជិតខ្លួនឬក្រុមគ្រួសារខ្លួនក្នុងកំឡុងពេលរងចាំការវិភាគដើម្បីរកវីរុសកូវីដ-១៩ថ្មីនេះ។

៣. ត្រូវជំរុញប្រជាពលរដ្ឋឱ្យទៅទទួលការចាក់វ៉ាក់សាំងកូវីដ-១៩ ឱ្យបានគ្រប់គ្នា ជាពិសេសជនដែល ងាយរងគ្រោះ និងបង្កើនការយកចិត្តទុកដាក់បន្ថែមទៀត ដោយបុគ្គលម្នាក់ៗត្រូវទទួលខុសត្រូវលើការការពារខ្លួន ព្រមទាំងគ្រួសារ និងសហគមន៍ត្រូវលើកកម្ពស់ការចូលរួម តាមដាន និងអនុវត្តវិធានការការពារ និងស្វែងរកការព្យាបាលឱ្យបានទាន់ពេលវេលា ដើម្បីជួយសង្គ្រោះអាយុជីវិតអ្នកជំងឺធ្ងន់ៗ ជាដើម៕

អត្ថបទ៖ ទារិកា