ចូលដល់សប្តាហ៍ថ្មីនៃកម្មវិធីជជែកពីមុខជំនួញ Starting Up ប្រិយមិត្តនឹងបានជួបជាមួយភ្ញៀវកិត្តិយសមួយរូប គឺ លោកបេ អុិញហ៊ាន ស្ថាបនិកសិប្បកម្មស៊ូហ៊ាន Sou Hean Safety Food កែច្នៃអាហារសុវត្ថិភាពដូចជា មីដំឡូង មីត្រាវ មីល្ពៅ លក់ដុំនិងរាយ ប្រកបដោយរសជាតិឆ្ងុយឆ្ងាញ់ ល្អចំពោះសុខភាព។

លោក បេ អុិញហ៊ាន បញ្ចប់ថ្នាក់បរិញ្ញាបត្រវិទ្យាសាស្ត្រកសិកម្ម នៅសាកលវិទ្យាល័យភូមិន្ទកសិកម្ម និងជំនាញកែច្នៃចំណីអាហារ Food Innovation នៅវិទ្យាស្ថានជាតិពហុបច្ចេកទេសកម្ពុជា NPIC។ លោកបញ្ចប់ថ្នាក់បណ្ដុះបណ្ដាលជំនាញកែច្នៃអាហារ ​មកពីប្រទេសអ៉ីស្រាអែល។ លោក បង្កើតសិប្បកម្មអាហារសម្ងួត ស៊ូហ៊ាន (Sou Hean Safety Food) បានប្រមាណជាង ៩ខែ ដែលជាសិប្បកម្មកែច្នៃអាហារសុវត្ថិភាព ស្ដង់ដារ​វិញ្ញានប័ត្រទទួលស្គាល់ដោយមន្ទីរ​ឧស្សាហកម្ម ចំណីអាហារកម្ពុជា មានការស្រាវជ្រាវនិង​សាកល្បងលើទីផ្សារច្រើនខែមុននឹង​ដាក់​លក់។

លោក បេ អុិញហ៊ាន បង្កើតសិប្បកម្មអាហារសុវត្ថិភាពនេះឡើង គឺដើម្បីជួយលើកកម្ពស់វត្ថុធាតុដើម ក្នុងស្រុក កាត់បន្ថយ​ការកែច្នៃអាហារ​ដោយគ្រឿងផ្សំគីមីបណ្ដាល​ឲ្យប៉ះពាល់ដល់សុខភាព និងរួមចំណែកកាត់បន្ថយផលិតផលនាំចូល​ពីក្រៅប្រទេស។

ចង់ដឹងថាអាជីវកម្មកែច្នៃអាហារ ជួបប្រទះការលំបាក ឫ ឧបសគ្គអ្វីខ្លះ?  រួម​ជា​មួយ​ភាព​ជោគជ័យ​រហូត​ដល់​សព្វ​ថ្ងៃ​នេះ​បែប​ណា? ​​កុំភ្លេចរង់ចាំទស្សនា កម្មវិធី Starting Up សប្ដាហ៍ថ្មី ដោយជួបជាមួយនឹងលោក បេ អុិនហ៊ាន នៅថ្ងៃទី ៩ ខែមេសា ឆ្នាំ ២០២២ វេលាម៉ោង ១០ព្រឹក នៅលើទំព័រហ្វេសប៊ុកផេកផ្លូវការរបស់កម្មវិធី Starting Up ក៏ដូចជា channel YouTube "Sabay TV" និងស្ដាប់ជាសំឡេង Podcast "Starting Up" ៕