មូលនិធិព្រូដិនស៍ តាមរយៈក្រុមហ៊ុនព្រូដិនសលកម្ពុជា និងកិច្ចសហការណ៍ជាមួយអង្គការមូលនិធិសិទ្ធិកុមារ ដោយមានការគាំទ្រពីសំណាក់ក្រសួងអប់រំ យុវជន និងកីឡា បានប្រកាសជាផ្លូវការនូវកិច្ចបន្តគម្រោង កម្មវិធីអប់រំហិរញ្ញវត្ថុមូលដ្ឋានសម្រាប់កុមារ «ឆាឈីង» ក្នុងដំណាក់កាលទី២ ក្រោមឈ្មោះ «កុមារឆ្លាតអំពីលុយ ឆាឈីង» ។ ក្នុងកម្មវិធីប្រកាសនេះក៏មានវត្តមានអញ្ជើញចូលរួមជាអធិបតីភាពពីសំណាក់ ឯកឧត្តមបណ្ឌិត ចាន់ សុភា អគ្គលេខាធិការរងនៃក្រុមប្រឹក្សាជាតិកម្ពុជា ដើម្បីអភិវឌ្ឍយុវជន និងជាប្រធាននាយកដ្ឋានបឋមនៃក្រសួងអប់រំ យុវជន និងកីឡា ព្រមទាំង ឯកឧត្តម ខៀវ រិទ្ធិភ័ណ្ឌ អភិបាលរងនៃគណៈអភិបាលខេត្តកំពតផងដែរ។

សេចក្តីប្រកាសនេះ បញ្ជាក់អំពីការប្ដេជ្ញាបន្តគាំទ្រការលើកស្ទួយអក្ខរកម្មហិរញ្ញវត្ថុទៅដល់កុមារកម្ពុជាក្នុងរយៈពេល ៣ឆ្នាំទៅមុខទៀត។ គម្រោងនេះមានគោលបំណងធំដើម្បីបង្រៀនកុមារ អាយុពី ៧ ដល់ ១២ឆ្នាំ ពីចំណេះដឹង ឧបករណ៍ និងការអនុវត្តន៍នានា ដែលពួកគាត់ត្រូវការក្នុងការសម្រេចចិត្តហិរញ្ញវត្ថុដ៏ត្រឹមត្រូវដើម្បីសម្រេចគោលដៅ និងសុបិន្តរបស់ពួកគេ។

ការពង្រីកគម្រោងឆាឈីងវគ្គទី២ នេះគឺដោយសារការសម្រេចបានជោគជ័យលើវគ្គទី១ ចាប់ពីដើមឆ្នាំ ២០១៩ ដល់ដើមឆ្នាំ ២០២២។ ក្នុងដំណាក់កាលទី១នេះ គម្រោងបានអនុវត្តនៅទីក្រុងភ្នំពេញ ខេត្តកណ្ដាល និងកំពង់ចាម ទៅលើសាលាបឋមសិក្សាគោលដៅចំនួន ១៥០។ ដំណាក់កាលនេះបានផ្ដល់ប្រយោជន៍ដល់សិស្សចំនួន ៣៩,៨៨៩នាក់ (សិស្សស្រីចំនួន ១០,៧០៤នាក់) គ្រូចំនួន ៥៨១នាក់ នាយកសាលាចំនួន ១៥០នាក់ អាណាព្យាបាលចំនួន ២៨៩នាក់ និងមន្រី្តរដ្ឋាភិបាលចំនួន ៦៩នាក់។

គម្រោងកុមារឆ្លាតអំពីលុយ ឆាឈីងដំណាក់កាលទី២នេះ នឹងបន្ដពង្រីកអត្ថប្រយោជន៍នេះទៅលើភាពជោគជ័យនៃដំណាក់កាលទី១ លើសាលាចំនួន១៥០ និងភាពជាម្ចាស់ពីសំណាក់ក្រសួង ដោយបន្ថែមនូវសាលាគោលដៅចំនួន១៥០ទៀត នៅក្នុងខេត្ត កំពង់ចាម កំពត កណ្ដាល សៀមរាប និងភ្នំពេញ។ លើសពីការពង្រីកគោលដៅសាលា គម្រោងនឹងរំពឹងបន្ថែមទៅលើគោលដៅសំខាន់មួយទៀត គឺការដាក់បញ្ជូលមេរៀនអក្ខរកម្មហិរញ្ញវត្ថុឆាឈីងនេះចូលទៅក្នុងកម្មវិធីសិក្សាផ្លូវការរបស់ក្រសួងអប់រំ ដើម្បីធានាវិសាលភាពនៃលទ្ធផលវិជ្ជមាននៃចំណេះដឹងនេះ។

ឯកឧត្តមបណ្ឌិត ចាន់ សុភា អគ្គលេខាធិការរងនៃក្រុមប្រឹក្សាជាតិកម្ពុជា ដើម្បីអភិវឌ្ឍយុវជន និងជាប្រធាននាយកដ្ឋានបឋមនៃក្រសួងអប់រំយុវជន និងកីឡា មានប្រសាសន៍ថា “តំណាងក្រសួងអប់រំ យុវជន និងកីឡា ខ្ញុំពិតជាមានសេចក្តីសោមនស្សរីករាយណាស់ដែលបានចូលរួមកម្មវិធីប្រកាសជាផ្លូវការនេះ ហើយខ្ញុំបង្ហាញនូវការគាំទ្រយ៉ាងពេញទំហឹងទៅលើគម្រោងកុមារឆ្លាតអំពីលុយ ឆាឈីងដំណាក់កាលទី២។ ឆ្លៀតក្នុងឱកាសនេះ ខ្ញុំសូមលើកទឹកចិត្តឲ្យដៃគូពាក់ព័ន្ធនានាធ្វើការរួមគ្នា ដោយភាពច្បាស់លាស់លើទំនួលខុសត្រូវ ប្រកបដោយវិជ្ជាជីវៈ ផ្តោតលើគោលដៅវែងឆ្ងាយជាផលប្រយោជន៍នៃកុមារ និងសង្គមកម្ពុជា។” ។

លោក Freddie Wong, នាយកស្ដីទីផ្នែកហិរញ្ញវត្ថុ និង Actuary តំណាងក្រុមហ៊ុនព្រូដិនសលកម្ពុជា មានប្រសាសន៍ថា “ការធានាសុវត្ថិភាពផ្នែកសុខភាព និងហិរញ្ញវត្ថុ សម្រាប់ប្រជាជនកម្ពុជា គឺជាគោលដៅចំបងនៃអាជីវកម្មយើង។ យុទ្ធសាស្ត្រមួយរបស់យើង គឺការបង្កើនអក្ខរកម្មហិរញ្ញវត្ថុ សម្រាប់ក្មេងៗជំនាន់ក្រោយ។ គោលដៅចំបងនៃយុទ្ធសាស្ត្រនេះគឺ ការធានាឲ្យពួកគាត់មានការយល់ដឹងច្បាស់លាស់អំពីការគ្រប់គ្រងលុយ តាំងពីវ័យក្មេង ដើម្បីឲ្យពួកគេធ្វើការសម្រេចចិត្តហិរញ្ញវត្ថុបានប្រសើរជាងមុន។ ខ្ញុំពិតជារីករាយណាស់ដែលឃើញកម្មវិធីឆាឈីង បានអនុត្តជោគជ័យពីសំណាក់កុមារកម្ពុជា និងឃើញកម្មវិធីនេះរីកចំរើនទៅមុខ”។

លោក ទេព ចាន់សំអុល នាយកប្រតិបត្តិនៃអង្គការមូលនិធិសិទ្ធិកុមារ បានបន្ថែមថា «ការអប់រំផ្នែកហិរញ្ញវត្ថុសម្រាប់កុមារនៅកម្ពុជា មានសារៈសំខាន់ណាស់ក្នុងការបំពេញចន្លោះអក្ខរកម្មហិរញ្ញវត្ថុ និងលើកស្ទួយការគ្រប់គ្រងហិរញ្ញវត្ថុឲ្យបានល្អនាពេលអនាគតក្នុងចំណោមកុមារអាយុចាប់ពី៧ ដល់១២ ឆ្នាំ។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រសួងអប់រំ យុវជន និងកីឡា ដែលបានផ្ដល់នូវកិច្ចសហការណ៍ក្នុងការអនុវត្ត និងពង្រីកគម្រោង។ ហើយយើងក៏សូមថ្លែងអំណរគុណដល់មូលនិធិព្រូដិនស៍ ក្នុងការជួយគាំទ្រទាំងផ្នែកបច្ចេកទេស និងថវិការសម្រាប់គម្រោងនៅប្រទេសកម្ពុជា។ ជំនួសឲ្យមូលនិធិសិទ្ធិកុមារ យើងខ្ញុំនឹងប្តេជ្ញាក្នុងការធានាដំណើរការកម្មវិធី ប្រកបដោយលទ្ធផល និងការផ្លាស់ប្ដូរវិជ្ជមាន ទៅលើអក្ខរកម្មហិរញ្ញវត្ថុនៅប្រទេសកម្ពុជា» ។

ឆាឈីង គឺជាកម្មវិធីអប់រំ និងទំនួលខុសត្រូវផ្នែកហិរញ្ញវត្ថុជាសកល សម្រាប់កុមារអាយុពី ៧ ដល់១២ឆ្នាំ។ កម្មវិធីនេះផ្ដោតទៅលើការបំពេញចន្លោះខ្វះខាតផ្នែកអក្ខរកម្មហិរញ្ញវត្ថុ ដោយការប្រើប្រាស់របៀបសិក្សាបែបរួមបញ្ជូល ដោយប្រើប្រាស់ឧបករណ៍ឌីជីថល និងរបៀបសិក្សាក្នុងសាលា។

អំពីក្រុមហ៊ុនព្រូដិនសលកម្ពុជា

ក្រុមហ៊ុន ព្រូដិនសល (ខេមបូឌា) ឡាយហ្វ៍ អឺសួរ៉ិនស៍ ម.ក (ហៅកាត់ថា ព្រូដិនសលកម្ពុជា) បានចាប់ផ្តើមប្រតិបត្តិការរបស់ខ្លួននៅ ខែមករា ឆ្នាំ២០១៣។ តាមរយៈការផ្តល់ជូននូវដំណោះស្រាយ នៃសេវាធានារ៉ាប់រងអាយុជីវិតដែល ស្របតាមតម្រូវការអតិថិជន ក៏ដូចជាការធ្វើសិក្ខាសាលានានា ស្តីពីសេវាធានារ៉ាប់រងអាយុជីវិតទៅកាន់សាធារណៈជន ព្រូដិនសលកម្ពុជា បាននិងកំពុងជួយប្រជាជនកម្ពុជា ក្នុងការការពារ និងគ្រប់គ្រងហិរញ្ញវត្ថុសម្រាប់ថ្ងៃអនាគតរបស់ពួកគាត់។ ក្រុមហ៊ុន ព្រូដិនសលកម្ពុជា ជាក្រុមហ៊ុនបុត្រសម្ព័ន្ធទាំងស្រុងនៃ ក្រុមហ៊ុន ព្រូដិនសល ភីអិលស៊ី (Prudential Plc) ដែលមានមូលដ្ឋាននៅចក្រភពអង់គ្លេស។ ក្រុមហ៊ុន ព្រូដិនសល ភីអិលស៊ី បានផ្តល់ជូននូវការធានារ៉ាប់រងសម្រាប់អាយុជីវិត និងសុខភាព និងការការពារទ្រព្យសម្បត្តិដោយផ្តោតលើតំបន់អាស៊ី និងអាហ្រ្វិក។ អាជីវកម្មនេះបានចូលរួមចំណែកជួយជីវិតមនុស្សគ្រប់គ្នាឱ្យមានភាពប្រសើរឡើង ដោយការធ្វើឱ្យគ្រប់គ្នាអាចមានលទ្ធភាពទទួលបានសេវាថែទាំសុខភាពដែលមានតម្លៃសមរម្យតាមរយៈការលើកកម្ពស់បរិយាប័ន្នហិរញ្ញវត្ថុ។

អំពីក្រុមហ៊ុនព្រូដិនសលភីអិលស៊ី

ក្រុមហ៊ុន ព្រូដិនសល ភីអិលស៊ី (Prudential plc) ផ្ដល់ការធានារ៉ាប់រងសម្រាប់អាយុជីវិត និងសុខភាព និងការការពារទ្រព្យសម្បត្តិនៅក្នុងទីផ្សារទាំង ១៣ នៅអាស៊ី និងអាហ្រ្វិក។ អាជីវកម្មនេះបានចូលរួមចំណែកជួយជីវិតមនុស្សគ្រប់គ្នាឱ្យមានភាពប្រសើរឡើង ដោយការធ្វើឱ្យគ្រប់គ្នាអាចមានលទ្ធភាពទទួលបានសេវាថែទាំសុខភាពដែលមានតម្លៃសមរម្យតាមរយៈការលើកកម្ពស់បរិយាប័ន្នហិរញ្ញវត្ថុ។ ព្រូដិនសល បានការពារ និងបង្កើនទ្រព្យសម្បត្តិ ក៏ដូចជាជម្រុញឱ្យពួកគេអាចសន្សំសម្រាប់គោលដៅ។ អាជីវកម្មនេះបានធានារ៉ាប់រងអាយុជីវិតសម្រាប់អតិថិជន ១៩ លាននាក់ និងមានការចុះបញ្ជីសំខាន់ពីរនៅលើផ្សារហ៊ុនហុងកុង (2378) និងផ្សារហ៊ុនឡុងដ៍ (PRU) ។ វាក៏មានការចុះបញ្ជីបន្ទាប់បន្សំនៅលើផ្សារហ៊ុនសិង្ហបុរី (K6S) និងការចុះបញ្ជីនៅផ្សារហ៊ុនញូវយ៉ក (PUK) ក្នុងទម្រង់នៃការទទួលប្រាក់បញ្ញើរបស់អាមេរិក និងជាធាតុផ្សំនៃសន្ទស្សន៍ Hang Seng Composite Index ផងដែរ។

ក្រុមហ៊ុនព្រូដិនសលមិនមានទំនាក់ទំនងជាមួយក្រុមហ៊ុនព្រូដិនសល Financial, Inc. ជាក្រុមហ៊ុនដែលមានទីតាំងអាជីវកម្មសំខាន់នៅក្នុងសហរដ្ឋអាមេរិក ឬជាមួយក្រុមហ៊ុន The Prudential Assurance Company Limited ដែលជាក្រុមហ៊ុនបុត្រសម្ព័ន្ធរបស់ M&G plc ដែលជាក្រុមហ៊ុនចុះបញ្ជីពាណិជ្ជកម្មនៅចក្រភពអង់គ្លេសឡើយ។

អំពីមូលនិធិព្រូដិនស៍

មូលនិធិព្រូដិនស៍ គឺជាមូលនិធិអភិវឌ្ឍន៍សហគមន៍របស់ ក្រុមហ៊ុនព្រូដិនសល នៅអាស៊ី និងអាហ្រ្វិក។ បេសកកម្មរបស់មូលនិធិ គឺធានានូវអនាគតរបស់សហគមន៍ តាមរយៈការលើកកម្ពស់ការអប់រំ សុខភាព និងសុវត្ថិភាព។ មូលនិធិនេះអនុវត្តកម្មវិធីថ្នាក់តំបន់ ក៏ដូចជាកម្មវិធីប្រចាំទីផ្សាររបស់ក្រុមហ៊ុនព្រូដិនសលមួយចំនួនទៀត ដោយសហការជាមួយអង្គការក្រៅរដ្ឋាភិបាល រដ្ឋាភិបាល និងវិស័យឯកជន ដើម្បីបង្កើនឥទ្ធិពលជាវិជ្ជមានពីកិច្ចខិតខំប្រឹងប្រែងរបស់ខ្លួន។ មូលនិធិព្រូដិនស៍ ប្រើប្រាស់ទស្សនៈវិស័យវែងឆ្ងាយ និងភូមិសាស្ត្រអាជីវកម្មរបស់ក្រុមហ៊ុនព្រូដិនសល ដើម្បីធ្វើឱ្យសហគមន៍ទាំងនោះ កាន់តែមានសុខសុវត្ថិភាព និងភាពធន់មាំជាងមុន។ មូលនិធិនេះគឺជាអង្គការសប្បុរសធម៌ ដែលបានចុះបញ្ជីនៅទីក្រុងហុងកុង។

សម្រាប់ព័ត៌មានបន្ថែម សូមចូលទៅកាន់ www.prudencefoundation.com សម្រាប់ព័ត៌មានបន្ថែម សូមទំនាក់ទំនង៖ លោក ហាហ្សាន់ អ៊ីលយ៉ាសគ្គិ ប្រធានផ្នែក កិច្ចការបរិស្ថាន សង្គម និងអភិបាលកិច្ច អ៊ីម៉ែល៖ Illyasak.hazan@prudential.com.kh