នេះគឺម្ចាស់នំសារ៉ាយ "ថៅកែណយ" គ្រួសារធ្លាក់ដល់បាត ជំពាក់គេរាប់លានដុល្លារ តែអាចដោះបាន ដោយសារអាជីវកម្មងាយៗ

2023-02-03 04:22:02
ព័ត៌មាន

2023-02-03 04:22:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ជឿថាស្ទើរគ្រប់គ្នា ស្គាល់ ឬធ្លាប់លឺការផ្សាយពាណិជ្ជកម្មពីនំសារ៉ាយ "ថៅកែណយ" ដែលជាផលិតផលពេញនិយមសម្រាប់ញុំាលេងមកពីប្រទេសថៃ។ ម្ចាស់អាហារក្រៀមមួយប្រភេទនេះ គឺលោក Itthipat Peeradechapan បច្ចុប្បន្នមានវ័យ ៣៨ឆ្នាំ ដែលអាចរកស៊ីមានបាន តាមរយៈការចាប់ផ្ដើមអាជីវកម្មធម្មតាៗ ងាយៗ តែឥឡូវពង្រីកដល់ច្រើនប្រទេសក្នុងសកលលោក។

នៅក្នុងវ័យជំទង់ ១៦ឆ្នាំ Itthipat Peeradechapan គឺក្មេងម្នាក់ញៀនការលេងហ្គេមយ៉ាងខ្លាំង។ តែ១ឆ្នាំក្រោយមក ក៏គាត់បានសម្រេចចិត្តបន្តការសិក្សានៅសកលវិទ្យាល័យសភាពាណិជ្ជកម្មនៃប្រទេសថៃ។ ក្នុងឆ្នាំដដែលនោះ អាជីវកម្មគ្រួសាររបស់គាត់បានជួបវិបត្តិហិរញ្ញវត្ថុ ហើយទីបំផុតបានប្រកាសក្ស័យធន និងជំពាក់បំណុលគេរហូតដល់ 10 លានដុល្លារអាមេរិក។ ដោយសារតែបែបនេះហើយ ទើបគាត់សម្រេចចិត្តឈប់រៀនទៅជួយគ្រួសារ។

ដោយសារជាអ្នកជំនាញហ្គេមម្នាក់ គាត់បានលក់ ID ហ្គេមរបស់គាត់បានប្រាក់១ចំនួន ហើយបានចាប់ផ្តើមគិតពីអ្វីដែលគាត់អាចធ្វើបានជាមួយនឹងប្រាក់ដែលរកបានពីការលក់គណនីហ្គេម ដើម្បីអាចជួយគ្រួសាររបស់គាត់ឱ្យនៅទំនេរ។

ដំបូងឡើយ គាត់ព្យាយាមលក់អាហារ និងកាហ្វេនៅមុខបរិវេណសាលា ហើយការបណ្តាក់ទុនផ្សេងទៀតរួមមានការវិនិយោគ និងលក់ម៉ាស៊ីនចាក់ស៊ីឌីថោក។ ប៉ុន្តែទោះបីជាមានការខិតខំប្រឹងប្រែងយ៉ាងណាក៏ដោយ ក៏ផែនការរបស់គាត់មិនបានសម្រេច ហើយគាត់បានបន្តខាតបង់ប្រាក់យ៉ាងច្រើន។

ទោះជាបែបនេះក្ដី នេះមិនបានរារាំងគាត់ពីការដើរទៅមុខនោះទេ។ ថ្ងៃមួយ គាត់បានទៅ China Town ក្នុងទីក្រុងបាងកកដើម្បីរកអ្វីម្យ៉ាង។ គាត់សង្កេតឃើញថា មនុស្សជាច្រើនចូលចិត្តញ៉ាំស្ករគ្រាប់ចៀននៅពេលពាក់កណ្តាលថ្ងៃ ហើយអាហារទាំងនេះនៅពេលនោះ គឺមានតែនៅក្នុងតំបន់នោះតែប៉ុណ្ណោះ។ ចំណុចនេះបានបំផុសគំនិតអាជីវកម្មដំបូងរបស់គាត់ដោយការលក់គ្រាប់កៅឡាក់លីងនៅក្នុងផ្សារទំនើបធំៗ។ ក្នុងរយៈពេល១ឆ្នាំកន្លះ គាត់បានបើកកន្លែងលក់កៅឡាក់ជាង 30 នៅក្នុងផ្សារទំនើបដ៏ធំបំផុតរបស់ប្រទេសថៃ TESCO និង Carrefour ដែលពេលនោះ Itthipat Peeradechapan ឬ Tob មានអាយុត្រឹមតែ 18 ឆ្នាំប៉ុណ្ណោះ។

ក្រេឌីត៖ paap-production

ទោះជាយ៉ាងណាក៏ដោយ នៅពេលដែល TESCO Lotus តែងតាំង CEO ថ្មីអ្វីៗត្រូវបានផ្លាស់ប្ដូរ ពោលគឺអាជីវកម្មលក់គ្រាប់កៅឡាក់កន្លែងជាង 25 នៃសាខារបស់គាត់ នាយកប្រតិបត្តិថ្មី មិនអនុញ្ញាតឱ្យគាត់លក់នៅក្នុងសាខា TESCO Lotus តទៅទៀតទេ ដោយសារតែផ្សែងពីការចៀនកៅឡាក់ បានរោលពាសពេញផ្សារ ពិដានហាង មានសភាពកខ្វក់។

ដូច្នេះ គាត់ក៏សម្រេចចិត្តលីងនៅខាងក្រៅផ្សារ ហើយឲ្យគេផ្ញើទៅហាង។ យ៉ាងណា ការលក់បានធ្លាក់ចុះយ៉ាងខ្លាំងជាង ៥០ ភាគរយ។ ដើម្បីបង្កើតការលក់ គាត់បានព្យាយាមលក់អាហារផ្សេងទៀតដូចជា ផ្លែឈើក្រៀម និងសារ៉ាយចៀន។ ប៉ុន្មានខែក្រោយមក គាត់បានកត់សម្គាល់ឃើញសារ៉ាយចៀនបានវ៉ាដាច់ការលក់គ្រាប់កៅឡាក់លីង ហើយក្លាយជាផលិតផលដែលលក់ដាច់បំផុតភ្លាមៗ។ ដូច្នេះហើយ ការផ្ដោតនៃការលក់សារ៉ាយសមុទ្រ ក៏បានចាប់ផ្តើមក្នុងវ័យ 19 ឆ្នាំរបស់គាត់។

ដើម្បីផលិតសារ៉ាយចៀនបន្ថែមទៀត គាត់បានជួលមនុស្សមួយក្រុមឱ្យធ្វើការនៅផ្ទះបាយនៅក្នុងផ្ទះរបស់គាត់។ ដើម្បីអាចពង្រីកសារ៉ាយចៀន គាត់បានសម្រេចចិត្តផ្លាស់ប្តូរផលិតផលរបស់គាត់ទៅ 7-Eleven ។ ដំបូងឡើយ 7-Eleven បានច្រានចោលសំណើរបស់គាត់ ដោយសារតែព័ត៌មានលម្អិតនៃការវេចខ្ចប់មិនល្អ។

ដើម្បីដោះស្រាយបញ្ហានេះ គាត់បានចំណាយពេលជាច្រើនខែក្នុងការកែប្រែការរចនាកញ្ចប់ ហើយនៅទីបំផុតបានបញ្ចុះបញ្ចូលអ្នកគ្រប់គ្រង 7-Eleven ឱ្យយល់ព្រមលក់ផលិតផលរបស់គាត់ជាមួយនឹងការរចនាថ្មីជាងនេះ។ ក្រុមការងារ 7-Eleven ក៏បានស្នើសុំទៅមើលរោងចក្ររបស់គាត់ដើម្បីធានាគុណភាពនៃអាហារ និងដើម្បីធានាថា សារ៉ាយសមុទ្ររបស់គាត់នឹងអាចផ្គត់ផ្គង់នៅក្នុងហាងចំនួន 3000 នៅទូទាំងប្រទេសថៃ។

ដោយមានកម្មករតែ៦នាក់ក្នុងផ្ទះបាយរបស់គាត់ គ្មានផ្លូវដែលគាត់អាចសម្រេចបាននោះទេ។ ដូច្នេះហើយ គាត់បានសម្រេចចិត្តលក់អាជីវកម្មលក់គ្រាប់កៅឡាក់លីង ដើម្បីផ្តល់មូលនិធិដល់ខ្សែសង្វាក់ផលិតកម្មសម្រាប់អាជីវកម្មសារ៉ាយបំពងរបស់គាត់ និងជួលកម្មករបន្ថែមទៀត។

មិនយូរប៉ុន្មានបន្ទាប់ពីការទស្សនារោងចក្រ 7-Eleven ដំបូងបានបញ្ជាទិញសារ៉ាយចៀនចំនួន 72,000 កញ្ចប់ក្នុងរយៈពេល 45 ថ្ងៃ។ ពីពេលនោះ អាជីវកម្មសារ៉ាយចៀនរបស់គាត់បានរីកចម្រើន ហើយពីរឆ្នាំក្រោយមក សារ៉ាយចៀនរបស់គាត់ត្រូវបាននាំចេញទៅកាន់ប្រទេសសិង្ហបុរី និងហុងកុង។

នៅអាយុ 26 ឆ្នាំ ផលិតផលរបស់គាត់បានពង្រីក ហើយឥឡូវនេះមានលក់នៅជាង 19 ប្រទេស រួមទាំងសហរដ្ឋអាមេរិក ចក្រភពអង់គ្លេស កាណាដា និងអូស្ត្រាលី។ គាត់បានក្លាយជាមហាសេដ្ឋីវ័យក្មេងបំផុតរបស់ប្រទេសថៃដែលមានទ្រព្យសម្បត្តិសុទ្ធចំនួន 1 ពាន់លានបាត (33 លានដុល្លារ) ។

"ផ្លូវទៅកាន់ភាពជោគជ័យរបស់គាត់មិនងាយស្រួលទេ ជាក់ស្ដែង Tob គាត់បានឆ្លងកាត់ឧបសគ្គរបស់គាត់យ៉ាងយឺតៗ តែមិនបោះបង់។ ហើយរឿងសំខាន់បំផុតមួយដែលត្រូវមានគឺផ្នត់គំនិតត្រឹមត្រូវ។ ដើម្បីធ្វើដូច Tob អ្នកត្រូវតែជឿជាក់លើខ្លួនឯងពីអ្វីដែលអ្នកចង់ធ្វើ ហើយយូរៗទៅភាពជោគជ័យនឹងមកតាមអ្នកដោយខ្លួនឯង៕"

ប្រភព៖ salesworks.asia ប្រែសម្រួល៖ ទារិកា