កម្ពុជា ត្រៀម​នឹង​ប្រារព្ធ​ពិធី​ដ៏​ធំ​ក្នុង​ពិធី​បុណ្យ​ចូល​ឆ្នាំ​ខ្មែរ ហៅ​ថា "សង្ក្រាន្ត" ដែល​ឆ្នាំ​នេះ ត្រូវ​នឹង​ខួប​១០​ឆ្នាំ នៃ​ការ​បង្កើត​ព្រឹត្តិការណ៍​ "សង្ក្រាន្ត" របស់​ខ្មែរ ដូច្នេះ​ហើយ តាម​ព័ត៌មាន ព្រឹត្តិការណ៍​នេះ​នឹង​មានកម្មវិធី​អស្ចារ្យ​ជា​ច្រើន ធៀប​នឹង​បណ្ដា​ឆ្នាំ​កន្លង​ទៅ ដើម្បី​ញុំាភាព​សប្បាយ​រីករាយ​របស់​ភ្ញៀវ​ទេសចរ​ទាំង​ជាតិ អន្តរជាតិ ព្រម​ទាំង​ក្នុង និង​ក្រៅ​ស្រុក។

នេះ​បើ​តាម​ការ​បង្ហើប​របស់ ក្រោមអធិបតីភាពឯកឧត្តម សុខ សង្វារ សមាជិកគណៈកម្មការកណ្តាល ស.ស.យ.ក ដែល​បាន​ធ្វើ​ជា​អធិបតីភាព រៀបចំពិធីក្រុងពាលី គម្រោង(ភូមិខ្ញុំ) ដែល​ជា​គម្រោង​មួយ​ក្នុង​កម្មវិធី "សង្ក្រាន្ត ២០២៣"។

ឯកឧត្តម ត្រូវ​បាន​ចាត់តាំង​ធ្វើជា​ប្រធានក្រុមការងារគម្រោង "ភូមិខ្ញុំ" ក្នុងព្រឹត្តិការណ៍អង្គរសង្គ្រានឆ្នាំ២០២៣។ ឯកឧត្ដម សុខ សង្វារបានបញ្ជាក់ឲ្យដឹងថា ឆ្នាំនេះ "ភូមិខ្ញុំ" គ្រោងរៀបចំអោយមាន៨ទស្សនីយភាពធំៗដូចជា៖ ១- ផ្ទះមរតកដូនតា ២- ផ្ទះនំខ្មែរ ៣- សាលាឆទាន ៤- ផ្សារខ្មែរ ៥- ឆាកធំ ៦- រោង DJ ៧- វត្ថុយក្ស និង ៨-រោងសប្បកម្ម។

ឯកឧត្ដមប្រធានគម្រាងបានមានប្រសាសន៍បន្តទៀតថា ឆ្លងតាមរយៈការដាក់បង្ហាញនូវគម្រោងធំៗខាងលើនេះត្រូវបានជួយលើកតម្កើនដល់វប្បធម៌ខ្មែរ ជាពិសេសជួយដល់សេដ្ឋកិច្ចបងប្អូនដែលរស់នៅខេត្តសៀមរាបផងដែរ មិនត្រឹមតែប៉ុណ្ណោះជួយថែរក្សាទំ​នៀមទំលាប់ខ្មែរ និងផ្តល់អោយមហាគ្រួសារខ្មែរទាំងមូលក្នុងឱកាសចូលឆ្នាំបានជួបជុំគ្នា សប្បាយជាមួយភ្ញៀវទេសចរជាតិ និងអន្តរជាតិ។

តាម​ផែន​ការ គម្រោង(ភូមិខ្ញុំ) នឹងត្រូវបើកបង្ហាញខ្លួនទទួលភ្ញៀវទេសចរជាតិ និងអន្តរជាតិអោយចូលទស្សនានៅថ្ងៃចូលឆ្នាំថ្មី ទី១៤-១៥-១៦ ខែមេសា នាពេលខាងមុខនេះ ហើយឆ្នាំនេះក៏ជាខួបទី១០ឆ្នាំ នៃការរៀបចំព្រឹត្តិការណ៍អង្គរសង្គ្រាន្តផងដែរ៕