ដល់ពេលហើយ! នេះល្បែងប្រជាប្រិយខ្មែរ ដែលលេងសប្បាយណាស់ក្រោមពន្លឺដួងខែដ៏ត្រចង់!

2023-04-03 09:14:46
ព័ត៌មាន

2023-04-03 09:14:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ល្បែងប្រជាប្រិយខ្មែរមានច្រើនណាស់ ហើយមួយៗសុទ្ធតែមានអត្ថន័យ និងខ្លឹមសារល្អៗគួរឲ្យស្ងើចសរសើរ។ មិនត្រឹមតែប៉ុណ្ណឹង សកម្មភាពនៃការលេងទៀតសោត គឺសុទ្ធសប្បាយៗ រឹតចំណងទាក់ទងរវាងគ្នា និងគ្នាបានយ៉ាងល្អថែមទៀតផង។

ល្បែងប្រជាប្រិយខ្មែរ ភាគច្រើនបានកកើតឡើងពីជីវិតប្រចាំថ្ងៃនៃប្រជាកសិករតាមសម័យកាលនីមួយៗ ដោយគ្មានកាលបរិច្ឆេទ ឬឈ្មោះអ្នកបង្កើត អ្នកផ្ដួចផ្ដើម និងពីប្រវត្តិច្បាស់លាស់នោះទេ គឺមានប្រភពចេញពីកម្លាំងពលកម្ម ការរស់នៅប្រចាំថ្ងៃរបស់ប្រជាពលរដ្ឋ ប្រជាកសិករ និងជាការចេះតៗគ្នាតែប៉ុណ្ណោះ។

ដូចពោលខាងលើ "ល្បែងប្រជាប្រិយខ្មែរ" មានច្រើនណស់ ដែលភាគច្រើនគឺសម្រាប់លេងកម្សាន្តនៅពេលមានពិធីបុណ្យទានម្តងៗ ជាពិសេសនៅក្នុងពិធីបុណ្យចូលឆ្នាំខ្មែរតែម្ដង។ យ៉ាងណា ការវិវត្តនៃសង្គម ពិសេសបច្ចេកវិទ្យា ធ្វើឲ្យបែបបទនៃការកម្សាន្តក៏ផ្លាស់ប្ដូរដែរ។យ៉ាងណាមិញ បច្ចុប្បន្ន ល្បែងប្រជាប្រិយខ្មែរមួយចំនួនស្ទើរតែមិនសូវបានគេស្គាល់ និងមិនសូវបានឃើញមានលេងផង។ ឥឡូវដល់វេលាសមគួរល្មមយើងនឹកគិតពីល្បែងប្រជាប្រិយខ្មែរយើងឡើងវិញ។ នៅពេលនេះ សូមរំលឹកប្រិយមិត្តពីល្បែងមួយដែលគេនិយមលេងនៅក្រោមពន្លឺដួងខែដ៏ត្រចង់ នោះគឺ៖

រូបភាពពីសៀវភៅ "ល្បែងប្រជាប្រិយខ្មែរ"

១. ល្បែងស្តេចចង់ ឬល្បែងអៀវ

តាមសៀវភៅ "ល្បែងប្រជាប្រិយខ្មែរ" ល្បែងស្តេចចង់ ជាល្បែងមួយយ៉ាងដែលពួកកុមារាកុមារីជំទង់ៗ គ្រប់ភូមិស្រុក ទូទាំងកម្ពុជរដ្ឋ តែងលេង នៅពេលទំនេរក្នុងវេលាយប់ខែភ្លឺ។ អ្នកលេងមានប្រុសមានស្រីជាច្រើននាក់ មិនកំណត់។ ពេលលេងគេចែកគ្នាជា ២ពួក ប្រុស ១ពួក ស្រី ១ពួក។ ក្នុងបណ្តាអ្នកទាំង ២ពួកនោះ គេតាំងប្រុស ឬស្រីម្នាក់ធ្វើជាស្តេច ឲ្យអង្គុយនៅទីមួយចំកណ្តាលទី លើកៅអី ឬលើវត្ថុអី្វមួយ មានត្បាល់ជាដើម។

កាលអ្នកធ្វើជាស្តេចអង្គុយលើទីមួយដ៏សមគួរហើយ ខាងស្រីគេ ឲ្យស្រីៗ ដើរចូលទៅខ្សឹបនឹងស្តេចថា ខ្លួនស្រឡាញ់ឈ្មោះណាមួយ ឧបមាថា ឈ្មោះ ក ឬ ខ ខ្សឹបហើយគេថយមកអង្គុយ ឬក៏មកឈរនៅកន្លែងដើមវិញ។

ខាងប្រុស គេឲ្យប្រុសម្នាក់ដើរចូលទៅរកស្តេចដែរ ប្រសិនជាមិនចំឈ្មោះដែលគេខ្សឹបទុកជាមុនទេក៏ហីទៅ តែបើប្រុសដែលមកនោះចំលើឈ្មោះដែលនារីគេបានខ្សឹបនោះមែន ស្តេចស្រែកថា “អៀវៗ” ហើយឲ្យនារីនោះជិះបុរស នោះតម្រង់ទៅរកកន្លែងគេ កំពុងជិះគេស្រែកថា “អៀវៗ” ហើយគេបញ្ជិះទៅចុះកន្លែងខាងនារី។

បន្តមកដល់ខាងប្រុសម្ដង ដោយគេឲ្យគ្នាគេម្នាក់ ចូលទៅខ្សឹប បើប្រុសនោះចូលទៅខ្សឹបថា “ខ្ញុំ” ស្រឡាញ់នាងណាមួយ ឧបមាថា “ខ” ខ្សឹបហើយគេថយទៅវិញ បើនារីម្នាក់នោះឈ្មោះ “ខ” ចូលទៅមែន ស្តេចស្រែកថា “អៀវៗ” ហើយឲ្យបុរសនោះ ជិះនារីនោះ ស្រែកថា “អៀវៗ” ដូចគ្នា។

បានសេចក្តីថា បើខាងណាចូលទៅខ្សឹបថា ខ្លួនស្រឡាញ់ឈ្មោះ “ក” ហើយ បែរជា ឈ្មោះ “ខ” ចូលមករកស្តេចវិញ នោះស្តេចមិនឲ្យអ្នកខ្សឹបជិះ ឬអៀវគេទេ អ្នកខ្សឹបនោះត្រូវថយទៅវិញ ហើយគេឲ្យម្ខាងចូលទៅខ្សឹបជាថ្មីទៀត ។ ចេះតែផ្លាស់គ្នាតាមរបៀបនេះរហូតដល់ពេលឈប់។ អ្នកដែលធ្វើជាស្តេចត្រូវមើលការខុសត្រូវក្នុងរឿងនេះ ដោយសច្ចៈ និងយុត្តិធម៌។

ល្បែងនេះស្រេចលើអ្នកធ្វើស្តេច បើអ្នកធ្វើស្តេចប្រកបដោយអគតិ ចង់ឲ្យអ្នកណាជិះអ្នកណា ក្រៅពីឈ្មោះ ដែលគេខ្សឹបក៏បាន គឺថា បើម្នាក់ចូលទៅខ្សឹបថាស្រឡាញ់ឈ្មោះ “ក” ហើយទោះបីឈ្មោះ “ខ” ចូលមក ស្តេចស្រែកថា “អៀវៗ” ទៅក៏ចេះតែបាន ព្រោះអ្នកចូលទៅក្រោយ មិនបានឮអ្នកមុនខ្សឹបថា ស្រឡាញ់ឈ្មោះ ណាៗ ទេ។ តែបើមានរបៀបលេងលំអៀងបែបនេះ អ្នកលេងណាដែលចាប់ថ្នាក់បាន តវ៉ាឡើង អាចសុំគេឲ្យប្តូរ អ្នកធ្វើស្តេចបាន ប្រសិនបើអ្នកធ្វើស្តេចប្រកបដោយសច្ចៈ និងយុត្តិធម៌ នោះការលេងនេះទៀងទាត់ណាស់។

ល្បែងនេះជាល្បែងកំសាន្តក៏មែន តែជាល្បែងហាត់ចិត្តមនុស្សឲ្យប្រកបដោយសច្ចៈ និងយុត្តិធម៌ មិនឲ្យ ប្រកបដោយអគតិ (សេចក្តីលំអៀង) ៤យ៉ាងគឺ៖

– ឆន្ទាគតិ លំអៀងព្រោះស្រឡាញ់ – ទោសាគតិ លំអៀងព្រោះខឹង – ភយាគតិ លំអៀងព្រោះខ្ខាច – មោហាគតិ លំអៀងព្រោះភន្ត័ច្រឡំ

ម្យ៉ាងទៀត ជាការបង្ហាត់ឲ្យមនុស្សចេះ ជ្រើសរើសតាំងគ្នាឲ្យធ្វើការជាតំណាង ភ្នែកច្រមុះខ្លួនផង គឺត្រូវចេះជ្រើសរើសរកអ្នកណា ដែលគេយល់ថាជាមនុស្សត្រឹមត្រូវបរិសុទ្ធ ធ្វើការបានល្អ តាមគន្លងធម៌ពិតៗ៕

អត្ថបទ៖ ទារិកា