ការដាច់ចរន្តអគ្គិសនី នៅទូទាំងប្រទេស ស្រីលង្កា ដែលបានប៉ះពាល់ដល់លំនៅដ្ឋាន អាជីវកម្ម និងសេវាសំខាន់ៗរាប់លានកន្លែង កាលពីថ្ងៃអាទិត្យ កន្លងទៅថ្មីៗនេះ បានបង្កឱ្យមានភាពចលាចល និងកំហឹងពីប្រជាពលរដ្ឋ។ យ៉ាងណាមិញ មូលហេតុដែលបានរកឃើញពិតប្រាកដនៃការដាច់ភ្លើងនេះ បានធ្វើឱ្យមនុស្សជាច្រើនភ្ញាក់ផ្អើលជាខ្លាំង គឺដោយសារតែ សត្វស្វាមួយក្បាល បានបង្កបញ្ហានៅស្ថានីយ៍បណ្តាញតំបន់ ជាយក្រុង កូឡុំបូ។

ហេតុការណ៍នេះបានកើតឡើង នៅពេលដែលសត្វស្វាមួយក្បាល បានចូលទៅក្បែរ ឧបករណ៍បំលែងបណ្តាញអគ្គិសនីមួយកន្លែង។ យោងតាមរដ្ឋមន្ត្រីក្រសួងថាមពល Kumara Jayakody បានឱ្យដឹងថា សកម្មភាពរបស់សត្វស្វានេះ បានបណ្តាលឱ្យមានផលរំខាន នៅក្នុងប្រព័ន្ធថាមពលក្នុងប្រទេស បណ្តាលឱ្យដាច់ចរន្តអគ្គិសនីទ្រង់ទ្រាយធំ។

ខណៈពេលថាមពលត្រូវបានស្តារឡើងវិញ នៅក្នុងតំបន់សំខាន់ៗមួយចំនួន យ៉ាងឆាប់រហ័ស រួមទាំងមន្ទីរពេទ្យ និងស្ថាប័នសំខាន់ៗ ប៉ុន្តែ ប្រជាពលរដ្ឋជាច្រើនបានបន្តរស់នៅដោយគ្មានអគ្គិសនីអស់ជាច្រើនម៉ោង។ ការដាច់ចរន្តអគ្គិសនីនេះ បានបង្កឱ្យមានការលាយឡំនឹងភាពកំប្លុកកំប្លែង និងការព្រួយបារម្ភក្នុងចំណោមប្រជាជនស្រីលង្កា។ អ្នកប្រើប្រាស់បណ្ដាញសង្គមបាននាំគ្នាប្រើប្រាស់បណ្ដាញសង្គមដើម្បីបង្ហាញពីភាពមិនសប្បាយចិត្តរបស់ពួកគេ ដោយខ្លះបង្កើតជា Memes កំប្លែងអំពីសត្វស្វា "កំហូច" ខណៈពេលដែលអ្នកផ្សេងទៀតបានលើកឡើងពីបញ្ហាធ្ងន់ធ្ងរអំពីភាពជឿជាក់នៃហេដ្ឋារចនាសម្ព័ន្ធថាមពលរបស់ប្រទេស។

"វាជារឿងគួរឱ្យអស់សំណើច ប៉ុន្តែវាក៏ជារឿងដែលគួរឱ្យភ័យខ្លាចផងដែរ ដែលសត្វស្វាមួយក្បាលអាចធ្វើឱ្យប្រទេសទាំងមូលដាច់ភ្លើងបានយ៉ាងងាយស្រួល" ប្រជាពលរដ្ឋម្នាក់ឈ្មោះ Ranjith បានប្រាប់ AFP ។ "វាបង្ហាញថា ប្រព័ន្ធអគ្គិសនីរបស់យើងមានភាពផុយស្រួយប៉ុណ្ណា"។

ក្រុមប្រឹក្សាអគ្គិសនី Ceylon (CEB) បានចេញសេចក្តីថ្លែងការណ៍សុំទោសចំពោះការរអាក់រអួលនេះ និងបានសន្យាថានឹងធ្វើការដើម្បីការពារកុំឱ្យឧប្បត្តិហេតុស្រដៀងគ្នានេះកើតឡើងម្តងទៀត។ ឧប្បត្តិហេតុនេះ បានបង្កឱ្យមានការពិភាក្សាជាថ្មីអំពីតម្រូវការដើម្បីធ្វើឱ្យប្រសើរឡើងនូវហេដ្ឋារចនាសម្ព័ន្ធថាមពលរបស់ ស្រីលង្កា និង ធានាបាននូវការផ្គត់ផ្គង់អគ្គិសនីដែលអាចទុកចិត្តបាន។ អ្នករិះគន់បានអះអាងជាយូរមកហើយថា ប្រព័ន្ធបញ្ជូនថាមពលរបស់ប្រទេសនេះ មានភាពហួសសម័យ និងងាយរងគ្រោះ ដែលធ្វើឱ្យវាមានភាពងាយរងគ្រោះចំពោះការរំខាន ទាំងដោយធម្មជាតិ និងដោយសារសត្វស្វា នេះជាដើម។ រដ្ឋាភិបាលត្រូវបានគេរំពឹងថា នឹងប្រឈមមុខនឹងការត្រួតពិនិត្យកាន់តែខ្លាំងឡើងជុំវិញការគ្រប់គ្រងវិបត្តិថាមពល និងផែនការដើម្បីកែលម្អភាពធន់នៃបណ្តាញអគ្គិសនីរបស់ប្រទេស៕