ក្រសួងអប់រំនៃប្រទេសថៃ បានប្រកាសជាផ្លូវការនៅថ្ងៃពុធ ទី៧ ខែឧសភា ឆ្នាំ២០២៥ ហាមឃាត់ការប្រើប្រាស់បារីអេឡិចត្រូនិច (vaping) នៅគ្រប់សាលារៀនដែលស្ថិតនៅក្រោមយុត្តាធិការរបស់ខ្លួន និងនៅគ្រប់ការិយាល័យរបស់ក្រសួង ដើម្បីទប់ស្កាត់ការកើនឡើងនៃការពេញនិយមជក់បារីអេឡិចត្រូនិចក្នុងចំណោមយុវជន។ នេះបើយោងតាមសេចក្តីប្រកាសរបស់អ្នកនាំពាក្យរដ្ឋាភិបាល។

យោងតាមសេចក្តីរាយការណ៍ ក្រសួងអប់រំបានណែនាំឱ្យអ្នកគ្រប់គ្រងគ្រប់កម្រិតត្រូវតាមដាន និងទប់ស្កាត់សិស្ស គ្រូបង្រៀន និងមន្ត្រីនានាមិនឱ្យប្រើប្រាស់ លក់ ឬកាន់កាប់បារីអេឡិចត្រូនិចនៅក្នុងបរិវេណសាលារៀន ឬការិយាល័យរបស់ក្រសួង។ បុគ្គលិកអប់រំ ឬអ្នកគ្រប់គ្រងសាលារៀន ឬការិយាល័យណាមួយដែលត្រូវបានរកឃើញថាមានជាប់ពាក់ព័ន្ធនឹងបារីអេឡិចត្រូនិចនឹងប្រឈមមុខនឹងវិន័យយ៉ាងតឹងរ៉ឹង។

កាលពីថ្ងៃទី១៤ ខែមីនា ឆ្នាំ២០២៥ ក្រសួងអប់រំថៃបានដាក់ចេញនូវវិធានការចំនួនបួន ដើម្បីទប់ស្កាត់ការប្រើប្រាស់បារីអេឡិចត្រូនិចនៅក្នុងសាលារៀន បន្ទាប់ពីមានការកើនឡើង ១៨.៦ ភាគរយនៃការញៀនបារីអេឡិចត្រូនិចក្នុងចំណោមយុវជន។ វិធានការទាំងនេះរួមមានការហាមឃាត់ទាំងស្រុងលើការប្រើប្រាស់បារីអេឡិចត្រូនិចនៅក្នុងសាលារៀន និងការិយាល័យរបស់ក្រសួងទូទាំងប្រទេស ព្រមទាំងការបង្កើនការយល់ដឹងអំពីគ្រោះថ្នាក់ និងផលវិបាកផ្លូវច្បាប់នៃការប្រើប្រាស់បារីអេឡិចត្រូនិចក្នុងចំណោមសិស្ស គ្រូបង្រៀន និងមន្ត្រី។

ការស្ទង់មតិដែលធ្វើឡើងដោយនាយកដ្ឋានគាំទ្រសេវាសុខភាព ក្រសួងសុខាភិបាលសាធារណៈ ក្រសួងអប់រំ វិទ្យាស្ថានយុវជនថៃ និងរដ្ឋបាលក្រុងបាងកកបានបង្ហាញពីការយល់ខុសជាច្រើនទាក់ទងនឹងបារីអេឡិចត្រូនិច។ លទ្ធផលបង្ហាញថា ៦១.២ ភាគរយនៃអ្នកចូលរួមស្ទង់មតិជឿថាបារីអេឡិចត្រូនិចជួយឱ្យឈប់ជក់បារី ខណៈ ៥១.១ ភាគរយគិតថានីកូទីនមានអត្ថប្រយោជន៍ចំពោះសុខភាព។ លើសពីនេះ ៥០.២ ភាគរយជឿថាបារីអេឡិចត្រូនិចមានគ្រោះថ្នាក់តិចជាងបារីធម្មតា និង ២៣.២ ភាគរយយល់ថាបារីអេឡិចត្រូនិចស្របច្បាប់នៅក្នុងប្រទេសថៃ។

ក្រសួងសុខាភិបាលសាធារណៈបានព្រមានថា ដោយសារតែការទទួលបានបារីអេឡិចត្រូនិចដោយងាយស្រួល និងកង្វះការយល់ដឹងក្នុងចំណោមកុមារ ជាង ១០០ នាក់បានវិវត្តទៅជាជំងឺរលាកសួតធ្ងន់ធ្ងរដោយសារការញៀនបារីអេឡិចត្រូនិចក្នុងឆ្នាំ២០២៤៕