_medium.jpg)
- 2017-07-06 23:00:00
- ព័ត៌មាន
យុវជនបោះបង់ចំណាកស្រុក ក្រោយទទួលបានការបណ្ដុះបណ្ដាលការងារ
- 2017-07-06 23:00:00
- ចំនួនមតិ 0 | ចំនួនចែករំលែក 0
យុវជនបោះបង់ចំណាកស្រុក ក្រោយទទួលបានការបណ្ដុះបណ្ដាលការងារ
ចន្លោះមិនឃើញ
យុវជនមួយចំនួន ដែលទទួលបានការបណ្ដុះបណ្ដាល ពីអង្គការភ្លែនអន្តរជាតិកម្ពុជា ពួកគេ ប្រែចិត្តពីការធ្វើចំណាកស្រុកទៅធ្វើពលករនៅស្រុកគេ មកធ្វើការនៅស្រុកកំណើតខ្លួនវិញ។
យុវតី ឡន ស្រីកា រស់នៅភូមិវត្ដ ឃុំត្បែង ស្រុកបន្ទាយស្រី ខេត្ដសៀមរាប បានឲ្យដឹងថា ខ្ញុំរៀនបានត្រឹមថ្នាក់ទី៩ ព្រោះកត្តាជីវភាព មិនបានបន្តការសិក្សាទៅមុខទៀត ក៏ឈប់រៀន ហើយមកជួយធ្វើស្រែឪពុកម្តាយ និងស៊ីឈ្នួលច្រូតស្រូវឲ្យគេ។
យុវតីវ័យ២២ឆ្នាំរូបនេះបន្ដថា ខ្ញុំទទួលបានការបណ្ដុះបណ្ដាលជំនាញផ្នែកប្រព័ន្ធទឹកស្អាតពីអង្គការភ្លែនអន្តរជាតិកម្ពុជា កាលពីអំឡុងពេលបីឆ្នាំមុន ក្រោយមកចូលធ្វើការងារជាភ្នាក់ងារចែកចាយទឹកស្អាតដល់ប្រជាពលរដ្ឋ នៅក្នុងស្រុកភូមិនេះ។ នាងធ្លាប់គិតពីការទៅស្វែងរកការងារ នៅស្រុកគេដែរ។ ប៉ុន្តែក្រោយពីបានរៀនជំនាញ និងទទួលបានការងារ បានប្រាក់ខែសមរម្យ នៅក្នុងស្រុកភូមិផង ក៏សម្រេចចិត្តមិនចង់ទៅបន្តទៅធ្វើការនៅឯណាទៀតទេ ។
យុវតីរូបនេះបន្តថា ខ្ញុំបានធ្វើការជំនាញផ្នែកប្រព័ន្ធទឹកស្អាតនេះមិនសូវបានប្រាក់ខែច្រើនប៉ុន្មាន តែខ្ញុំពិតជាសប្បាយចិត្ត ព្រោះបានធ្វើការនៅក្នុងស្រុកភូមិខ្លួនឯង ដែលខ្ញុំមិនសូវជាត្រូវចំណាយច្រើន ហើយប្រាក់ខែបើកមកសល់ និងអាចជួយដល់អ្នកភូមិ ប្រជាពលរដ្ឋឲ្យបានប្រើប្រាស់ទឹកស្អាតថែមទៀតផង។
មិនខុសគ្នាប៉ុន្មាននោះដែរ យុវជន ទឹម ពេទ្យ វ័យ២៨ឆ្នាំ បានបោះបង់ការសិក្សា បន្ទាប់ពីប្រឡងធ្លាក់បាក់ឌុប និងកំពុងធ្វើការនៅសហគមន៍ទឹកស្អាត អូ-វី ឃុំត្បែង ដែលស្ថានីយទឹកស្អាតនេះ ត្រូវបានកសាងឡើងដោយអង្គការភ្លែនអន្តរជាតិកម្ពុជា សហការជាមួយ ក្រសួងអភិវឌ្ឍន៍ជនបទ ក្រុមប្រឹក្សាឃុំសង្កាត់ និងអង្គការទឹកស្អាត ១ ០០១។
យុវជនរូបនេះបន្ដថា ខ្ញុំចង់បន្តការសិក្សាដែរ តែព្រោះជីវភាពគ្រួសារ ហើយប្រឡងធ្លាក់បាក់ឌុបផង ខ្ញុំក៏ឈប់រៀន ហើយនៅផ្ទះធ្វើស្រែ។ ខ្ញុំក៏ធ្លាប់ចង់ទៅធ្វើការចំណាកស្រុកជាមួយអ្នកភូមិនៅថៃដែរ ព្រោះឃើញគេទៅធ្វើការនៅទីនោះច្រើន។ ក្រោយមក ខ្ញុំក៏ទទួលបានការបណ្ដុះបណ្ដាលលើជំនាញផ្នែកផលិតទឹកស្អាត ហើយខ្ញុំក៏នៅធ្វើការនៅក្នុងភូមិតែម្ដងទៅ។
យុវជនរូបនេះបានលើកឡើងថា ប្រជាជននៅសហគមន៍ គួរងាកមកប្រើប្រាស់ទឹកស្អាតដែល អង្គការ និងប្រជាជនសហគមន៍ផលិតវិញ ទឹកស្អាតនេះបានទទួលស្គាល់គុណភាពពីក្រសួង អភិវឌ្ឍន៍ជនបទ និងមានការថែទាំល្អពីអ្នកជំនាញបែបវិទ្យាសាស្រ្ដ អាចបញ្ចៀសការកើតឡើងនៅជម្ងឺផ្សេង។ និងលក់ក្នុងមួយធុង(២០លីត្រ) ត្រឹម ១ ៣០០រៀលប៉ុណ្ណោះ។
លោក អ៊ឹម សុភាព មន្ត្រីជំនាញគម្រោងផ្នែកទឹកស្អាត និងអនាម័យ នៃអង្គការភ្លែនអន្ដរជាតិ ប្រចាំខេត្តសៀមរាបបានឲ្យដឹងថា គម្រោងទឹកស្អាតនៅស្រុកបន្ទាយស្រីនេះបានចាប់ផ្ដើមឡើងតាំងពីឆ្នាំ ២០១៤ ដោយបានបណ្ដុះបណ្ដាលយុវជនបោះបង់ការសិក្សានៅសហគមន៍ផ្ទាល់ឲ្យមានជំនាញផលិត និងថែទាំងទឹកស្អាត ដើម្បីផលិតទឹកស្អាតចែកជូនប្រជាពលរដ្ឋនៅសហគមន៍របស់ពួកគេ ។
លោកបន្ដថា គម្រោងទឹកស្អាតនេះ ក្រៅពីជួយឲ្យយុវជននៅសហគមន៍ទទួលបានជំនាញ និងការងារដែលមានប្រាក់ខែសមរម្យហើយ យើងក៏ចង់ផ្សព្វផ្សាយឲ្យប្រជាជនងាកមកប្រើប្រាស់ទឹកស្អាតឲ្យបានគ្រប់ៗគ្នាដែរ ដោយពីមុនកាលពីមិនទាន់មានទឹកស្អាតប្រើប្រជាជនបានប្រើប្រាស់ទឹកអណ្ដូង ដែលមិនមានអនាម័យល្អ ហើយមានប្រជាពលរដ្ឋខ្លះតែងតែមានបញ្ហារាគរុះច្រើន៕
