បេងមាលា ប្រាសាទបាក់បែក តែទាក់ចិត្តទេសចរណ៍ ខ្ទង់ម៉ឺននាក់ចូលទស្សនា

2017-08-28 02:55:34
ព័ត៌មាន

2017-08-28 02:55:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទបេងមាលា នាពេលបច្ចុប្បន្នមានសភាពទ្រុឌទ្រោម ហើយតួប្រាសាទជាច្រើនកន្លែងបានដួលរលំរាបដល់ដី និងមានដើមឈើចម្រុះដុះរុំព័ទ្ធផងដែរ។ ក៏ប៉ុន្ដែមន្ដ្រីជំនាញ បានឲ្យដឹងថា ក្នុងមួយខែៗមានភ្ញៀវទេសចរបរទេសច្រើនម៉ឺននាក់ចូលទស្សនាផ្ដិតយករូបភាពប្រាសាទនេះ។

លោក ឈាន រដ្ឋា ប្រធានស្ដីទី នៃនាយកដ្ឋានអភិរក្សប្រាសាទក្រៅឧទ្យានអង្គររបស់អាជ្ញាធរជាតិអប្សរា បានឲ្យដឹងថា បើយោងទៅតាមទេសភាពរបស់ប្រាសាទបេងមាលានាពេលនេះ វាហាក់ដូចជាការច្របាច់បញ្ចូលគ្នារវាងសំណង់ប្រវត្តិសាស្ត្រ និងធម្មជាតិ បង្កើតបានជាទស្សនីយភាពថ្មីមួយសម្រាប់អន្ទងដួងចិត្តភ្ញៀវទេសចរចូលទស្សនាកម្សាន្ត។

លោក ឈាន រដ្ឋា

លោកមានប្រសាសន៍ថា ចំនួនភ្ញៀវទេសចរដែលមកទស្សនាប្រាសាទប្រាសាទបេងមាលា ក្នុងខែខ្សត់ភ្ញៀវមានប្រមាណ ១ម៉ឺននាក់ក្នុងមួយខែ ហើយក្នុងខែសម្បូរភ្ញៀវមានជាង ៣ម៉ឺននាក់ ក្នុងនោះ ៩៥%ជាជនជាតិចិន។

ប្រាសាទបេងមាលា ត្រូវបានសាងសង់ ឡើងក្នុងអំឡុងចុងសតវត្សទី ១១ និងដើមសតវត្សទី ១២ ក្នុងរាជព្រះបាទសូរ្យវរ្ម័នទី២ ដើម្បីឧទ្ទិសដល់ព្រះវិស្ណុក្នុងព្រហ្មញ្ញសាសនា។ ប្រាសាទនេះមានទីតាំងស្ថិតនៅភូមិបេងមាលា ឃុំបេងមាលា ស្រុកស្វាយលើ ខាងកើតជើងភ្នំគូលែន និងមានចម្ងាយប្រហែល ៨០គីឡូម៉ែត្រពីតំបន់ប្រាសាទអង្គរ។

ប្រវត្តិវិទូមួយចំនួនបានលើកឡើងថា ប្រាសាទបេងមាលាត្រូវបានសាងសង់ឡើង ដោយប្រើប្រាស់ប្លង់មេតែមួយជាមួយប្រាសាទអង្គរវត្ត ហើយការសាងសង់ប្រាសាទនេះឡើងក៏ដើម្បីសាកល្បង មុននឹងសាងសង់ប្រាសាទអង្គរវត្តផងដែរ។

ទោះបីជាយ៉ាងណាក៏ដោយ លោក ឈាន រដ្ឋា បញ្ជាក់ឲ្យដឹងថា ប្រាសាទបេងមាលាមិនបានបន្សល់ទុកនូវសិលាចារឹកណាមួយ ដែលបញ្ជាក់ពីកាលបរិច្ឆេទសាងសង់នោះទេ ទើបវានៅតែជាចម្ងល់សម្រាប់អ្នកបុរាណវិទ្យាថាតើរវាងប្រាសាទអង្គរវត្ត និងប្រាសាទបេងមាលាមួយណាសាងសង់មុន។

គួរបញ្ជាក់ថា ប្រាសាទបេងមាលា កំពុងស្ថិតក្នុងបញ្ជីបេតិកភណ្ឌបម្រុង សម្រាប់ដាក់បញ្ចូលជាបេតិកភណ្ឌ ពិភពលោក។ លោករដ្ឋាឲ្យដឹងបន្ថែមថា ប្រាសាទនេះកំពុងស្ថិតក្រោមការអភិរក្ស និងជួសជុលដោយអាជ្ញាធរជាតិអប្សរា។ ទន្ទឹមនេះ អាជ្ញាធរអប្សរាក៏កំពុងសហការជាមួយនឹងភាគីចិនលើការស្រាវជ្រាវប្រមូលទិន្នន័យ ដើម្បីសិក្សាពីលទ្ធភាព នៃការជួសជុលផ្លូវចូលខាងកើតនៃប្រាសាទនេះនៅពេលខាងមុខផងដែរ៕