- 2018-09-27 03:59:03
- ព័ត៌មាន
ក្រុមអ្នកជំនាញរកឃើញក្បាលនាគដ៏ធំមួយនៅតំបន់ប្រាសាទបន្ទាយឆ្មារ
- 2018-09-27 03:59:03
- ចំនួនមតិ 0 | ចំនួនចែករំលែក 0
ក្រុមអ្នកជំនាញរកឃើញក្បាលនាគដ៏ធំមួយនៅតំបន់ប្រាសាទបន្ទាយឆ្មារ
ចន្លោះមិនឃើញ
ក្រុមមន្ត្រីជំនាញជួសជុលក្តាបែននៃប្រាសាទឆ្មារ បានជីកប្រទះឃើញក្បាលនាគដ៏ធំមួយ ដែលត្រូវបានកប់នៅក្នុងដីនៅតំបន់ប្រាសាទបន្ទាយឆ្មា ខេត្តបន្ទាយមានជ័យ។ ប្រាសាទបន្ទាយឆ្មាត្រូវបានកសាងឡើង ដើម្បីឧទ្ទិសថ្វាយដល់បុត្ររបស់ព្រះមហាក្សត្រ ព្រះបាទជ័យវរ្ម័នទី៧ ដែលបានសោយទិវង្គត ក្នុងការច្បាំងជាមួយនគរចម្ប៉ា និងកសាងនាចុងសតវត្សទី១២ ដើមសតវត្សទី១៣។
លោកឧត្ដមសេនីយ៍ទោ លី ឡាយ ប្រធាននាយកដ្ឋាននគរបាលការពារបេតិកភណ្ឌបានថ្លែងថា ក្រុមមន្ត្រីជំនាញផ្នែកជួសជុលក្តាបែន នៃប្រាសាទបន្ទាយឆ្មារ ដែលឧបត្ថម្ភថវិកាដោយលោកជំទាវ ម៉ៅ ម៉ាល័យ កែគឹមយ៉ាន កាលរសៀលថ្ងៃទី ២៥ ខែកញ្ញា ឆ្នាំ២០១៨ បានធ្វើកំណាយឃើញក្បាលនាគ ដែលកប់ក្នុងដីជម្រៅ ១ម៉ែត្រ ។ ក្បាលនាគមានកម្ពស់ ១,១៥ ម៉ែត្រ ទទឹង ០,៨០ម៉ែត្រ កម្រាស់ ០,៣៥ម៉ែត្រ គឺជាក្បាលនាគទី៤ ដែលត្រូវបានរកឃើញ កាលពីឆ្នាំ ២០០៩ ហើយកម្លាំងនគរបាលក៏បានយកមករក្សាទុកនៅប៉ុស្តិលេខ១ នៃអង្គភាព និងត្រូវប្រគល់ជូនសារមន្ទីរនៅពេលក្រោយ។
“ក្បាលនាគនេះនៅស្អាតជាងក្បាលនាគ៣ ទៀតដែលបានរកឃើញ ហើយក្បាលនាគដែលរកឃើញនេះ អាចថាក្រុមចោរលួច យកទៅមិនបានក៏កប់ទុកនៅទីតាំងខាងលើតែម្តង។ ការងារបន្ទាប់ គឺក្រសួងជាអ្នកចាត់ចែងថា ត្រូវបញ្ជូនមកសារមន្ទីរនៅភ្នំពេញ ឬនៅខេត្ត”។
លោកឧត្ដមសេនីយ៍ទោបានបន្ថែមថា ក្រុមអ្នកជំនាញផ្នែកជួសជុលបង្ហាញអារម្មណ៍រីករាយជាខ្លាំង បន្ទាប់ពីរកឃើញក្បាលនាគដ៏ធំនេះ ហើយមានជំនឿជឿជាក់ថា ប្រទេសកម្ពុជានឹងសុខសប្បាយត្រជាក់ត្រជំ ដូចគ្នាទៅនឹងគ្រឿងអលង្ការមាស ដែលត្រូវបានបញ្ជូនមកពីប្រទេសអង់គ្លេសកាលពីពេលថ្មីៗកន្លងមកនេះ។ “អញ្ចឹងក្នុងជំនឿខ្មែរ របស់របរ ដែលបែកបាក់ត្រូវបានប្រមូល និងរកឃើញវិញ តំណាងឱ្យប្រជាជាតិយើងនឹងសុខសាន្ត ត្រជាក់ត្រជំ”។
ការរកឃើញក្បាលនាគដ៏ធំ នេះអាចចាត់ទុកថា ជាការរកឃើញទ្រង់ទ្រាយធំមួយពីក្រុមអ្នកជំនាញ និងបានប្រគល់ឱ្យកម្លាំងនគរបាលការពារបេតិកភណ្ឌយកមករក្សាទុក។ នេះបើតាមលោក លី ឡាយ ប្រធាននាយកដ្ឋាននគរបាលការពារបេតិកភណ្ឌ៕
រូបថត៖ ផ្ដល់ឲ្យ
