ដំណាក់កាលសំខាន់ៗ មុននឹងបានឡើងជិះយន្តហោះ សម្រាប់អ្នកគ្មានបទពិសោធន៍ (វីដេអូ)

2019-04-24 00:33:00
ព័ត៌មាន

2019-04-24 00:33:00
ចំនួនមតិ 0 | ចំនួនចែករំលែក 0

ចន្លោះមិនឃើញ

និយាយដល់ការជិះយន្តហោះ គ្នាយើងភាគច្រើនអាចមានការបារម្ភ និងមិនដឹងថាគួរធ្វើអ្វីខ្លះ សម្រាប់អ្នកគ្មានបទពិសោធន៍ទាល់តែសោះ ឬត្រូវជិះលើកទីមួយ ហើយគ្មានគ្នាទៅជាមួយ។ សូម្បីតែបងកញ្ញាក៏ធ្លាប់មានអារម្មណ៍បែបនេះដូចគ្នា ទើបថ្ងៃនេះបងកញ្ញានឹងបង្ហាញដំណាក់កាលសំខាន់ៗដែលគ្នាយើងគួរដឹង ទម្រាំបានឡើងដល់កៅអីយន្តហោះ ហើយកុំមានការព្រួយបារម្ភអី។

១. ពិនិត្យមើលឯកសារសំខាន់ដែលត្រូវប្រើ

មុនពេលមកដល់ ឬពេលដល់ព្រលានយន្តហោះ ត្រូវប្រាកដថា លិខិតឆ្លងដែន និងសំបុត្រយន្តហោះ ព្រោះបើគ្មានរបស់ទាំងពីរនេះ អ្នកមិនអាចឡើងលើយន្តហោះបានទេ។

២. ស្វែងរកព័ត៌មានចេញដំណើរ

ពេលឈានជើងដល់មាត់ទ្វារស្ថានីយចេញដំណើរអន្តរជាតិ និងក្នុងស្រុក យើងត្រូវស្វែងរកអេក្រង់ព័ត៌មានចេញដំណើរដែលធម្មតាមាននៅពីមុខកន្លែង Check-in ដើម្បីដឹងថាជើងហោះហើររបស់យើងត្រូវដល់ម៉ោង Check-in ហើយឬនៅ។

លើតារាងព័ត៌មានចេញដំណើរនេះមាន៦ផ្នែកធំៗ គឺ៖

១. ឈ្មោះក្រុមហ៊ុនអាកាសចរណ៍ដែលយើងបានកក់ការហោះហើរ

២. លេខជើងហោះហើរ

៣. ប្រទេសគោលដៅដែលយើងនឹងត្រូវចុះនៅពេលខាងមុខ

៤. ម៉ោងដែលត្រូវចេញដំណើរ

៥. តុដែលត្រូវ Check-in (ជាធម្មតាមានលើសពី១តុ)

៦. ព័ត៌មានបញ្ជាក់ថា ជើងហោះហើរយើងត្រូវដល់ម៉ោង Check-in ឬត្រូវឡើងយន្តហោះហើយ

៣. យកវ៉ាលី និងប៉ាស្ព័រទៅ Check-in

បន្ទាប់ពីដឹងថាជើងហោះហើរត្រូវដល់ម៉ោង Check-in ហើយ យើងត្រូវប៉ាស្ព័រ និងសំបុត្រយន្តហោះទៅតុ Check-in ដើម្បីទទួលបាន Boarding Pass ហើយយកវ៉ាលីទាំងធំនិងតូចទៅថ្លឹងដើម្បីផ្ញើទៅមុន។ ជាទូទៅ ការកំណត់ទម្ងន់វ៉ាលីដែលផ្ញើគឺខុសៗគ្នាទៅតាមក្រុមហ៊ុនអាកាសចរណ៍នីមួយៗ។ ឧទាហរណ៍ ក្រុមហ៊ុនអាកាសចរណ៍ Malindo ទម្ងន់វ៉ាលីដែលកំណត់គឺមិនឱ្យលើសពី៣០គីឡូ ហើយកាតាប ឬវ៉ាលីតូចដែលដាក់តាមខ្លួនគឺ៧គីឡូ។

សម្រាប់អ្នកដែលធ្វើដំណើរតាមយន្តហោះ ដំបូងគួរដឹងផងដែរពីរបស់មួយចំនួនដែលមិនអាចដាក់ក្នុងវ៉ាលីផ្ញើទៅមុនបាន ដូចជារបស់មុតស្រួច ថ្មសាក Power Bank ជាដើម ព្រោះវាអាចមានគ្រោះថ្នាក់ដែលជាការហាមឃាត់របស់ព្រលានយន្តហោះ។

ចុចអាន៖ ម៉ាឡេស៊ីអញ្ជើញអ្នកសារព័ត៌មាន និង Blogger ពី១០ប្រទេសទៅភ្លក់អាហារប្រចាំតំបន់ច្រើនកន្លែង

៤. យក Boarding Pass ទៅដកពន្ធ៧ដុល្លារមកវិញ

ចំណុចនេះសំខាន់! មានអ្នកមិនដឹងច្រើន ជាពិសេសអ្នកទើបមានបទពិសោធន៍ដំបូងតែម្ដង ព្រោះគ្មានបុគ្គលិកព្រលានណាប្រាប់យើងឡើយ។ ជាគោលការណ៍ សម្រាប់អ្នកកាន់ប៉ាស្ព័រកម្ពុជាអាចយក Boarding Pass និងប៉ាស្ព័រទៅដកពន្ធ៧ដុល្លារមកវិញ ដែលកន្លែងដកពន្ធនោះ គឺនៅខាងក្រោយជណ្ដើរឡើងទៅខាងលើតែម្ដង។

៥. បន្តដំណើរទៅផ្នែកអន្តោប្រវេសន៍ និងស្កេនរបស់របរ

ក្រោយពីដកពន្ធ៧ដុល្លារបានហើយ យើងត្រូវឡើងជណ្ដើរយន្តទៅខាងលើ ដើម្បីឱ្យផ្នែកអន្តោប្រវេសន៍ត្រួតពិនិត្យ និងដាក់ស្កេនរបស់របរតាមខ្លួន មុននឹងបានចូលទៅក្នុងបន្ត។ សម្រាប់ការស្កេនក្នុងដំណាក់កាលនេះ យើងត្រូវដោះស្បែកជើង នាឡិកាដៃ កាបូប កាមេរ៉ា កុំព្យូទ័រ និងរបស់ផ្សេងទៀតដែលមានក្នុងកាបូបដាក់ក្នុងកន្ត្រក ហើយរុញចូលម៉ាស៊ីនស្កេន។ សម្រាប់យើងខ្លួនឯងត្រូវដើរចូលក្លោងទ្វារស្កេនមួយតង់ទៀត ទើបចេញមកយករបស់របរបន្តទៀត។

ដំណាក់កាលនេះ ត្រូវដឹងថា មិនអាចយកទឹកឬវត្ថុរាវលើសពី១០០ម.ល ចូលបានទេ។ ដូច្នេះសម្រាប់ស្រីៗដែលត្រូវប្រើឡេ សាប៊ូទឹក ទឹកអប់ មិនអាចយកឱ្យលើសពី១០០ម.ល ឡើយ តែសម្រាប់ទឹក អាចដាក់ប៊ីដុងទឹកដើម្បីច្រកនៅផ្នែកខាងក្នុងបាន។

៦. ស្វែងរក Gate ដើម្បីរង់ចាំឡើងយន្តហោះ

នៅលើ Boarding Pass មានបញ្ជាក់លេខ Gate ដែលយើងត្រូវអង្គុយរង់ចាំ Check-in ឡើងលើយន្តហោះ។ ក្រោយចេញពីកន្លែងស្កេន យើងត្រូវស្វែងរកព័ត៌មាន និងការបង្ហាញទិសដៅ Gate នីមួយៗ ហើយទៅកាន់ទីនោះ រង់ចាំឡើងយន្ត។ មិនថាដំណាក់កាលណាទេ សម្រាប់ Boarding Pass និងប៉ាស្ព័រត្រូវដាក់ឱ្យនៅជាមួយគ្នា ព្រោះវាជារបស់ចាំបាច់ណាស់។

៧. ឡើងលើយន្តហោះ

ពេលដល់ម៉ោង Check-in ឡើងលើយន្តហោះ យើងត្រូវស្វែងរកលេខកៅអីចូលអង្គុយ ហើយដាក់កាតាប ឬវ៉ាលីតូចដែលយកតាមខ្លួននោះ នៅខាងលើ (អាចឱ្យបុគ្គលិកលើយន្តហោះជួយសម្រាប់រឿងនេះ)។ បន្ទាប់មកទៀត គឺដាក់ខ្សែក្រវាត់ និងត្រងត្រាប់ការណែនាំពីបុគ្គលិកអាកាសចរណ៍ជាការស្រេច។

ចង់ដឹងព័ត៌មានលម្អិត សូមមើលវីដេអូខាងក្រោម៖