- 2019-05-24 07:36:03
- ព័ត៌មាន
ជីវិតតស៊ូ ពីកូនអ្នកក្រម្ដាយបេះបន្លែលក់ ក្លាយជាអគ្គនាយកក្រុមហ៊ុនដ៏ធំមួយ
- 2019-05-24 07:36:03
- ចំនួនមតិ 0 | ចំនួនចែករំលែក 0
ជីវិតតស៊ូ ពីកូនអ្នកក្រម្ដាយបេះបន្លែលក់ ក្លាយជាអគ្គនាយកក្រុមហ៊ុនដ៏ធំមួយ
ចន្លោះមិនឃើញ
ក្រោមមេឃតែមួយមែនពិត ប៉ុន្តែវាសនាមនុស្សមិនដូចគ្នាទេ ព្រោះអ្នកខ្លះបានកើតមកលើគំនរទ្រព្យសម្បត្តិរួចទៅហើយ ចំណែកអ្នកខ្លះទៀតកើតមកក្នុងត្រកូលគ្រួសារក្រខ្សត់ ត្រូវប្រឹងប្រែងគ្រប់បែបយ៉ាង ទើបអាចរស់បានសមរម្យក្នុងសង្គម។ ជាក់ស្ដែងលោក ផន វណ្ណិត អគ្គនាយកក្រុមហ៊ុនអចលនទ្រព្យរាជសន្តុសិត បានឆ្លងកាត់ការលំបាក តស៊ូរៀនសូត្រទាំងពេលខ្លះគ្មានបាយក្នុងពោះ រហូតមានជំនួញក្នុងដៃអាចដឹកនាំមនុស្សរាប់រយនាក់។
ចាប់កំណើតក្នុងគ្រួសារកសិករក្រខ្សត់៖
ជីវិតពិតរបស់លោក ផន វណ្ណិត ស្ទើរតែមិនជឿថាអាចមានដល់សព្វថ្ងៃឡើយ ព្រោះលោកបើកភ្នែកឃើញពន្លឺថ្ងៃមក មិនដែលស្គាល់ភាពស្រណុកសុខស្រួលនោះទេ។ លោកជាកូនទី២ ក្នុងត្រកូលគ្រួសារកសិករដ៏ក្រខ្សត់នៅភូមិក្រូច ឃុំកន្សោមអក ស្រុកកំពង់ត្របែក ខេត្តព្រៃវែង។ ដោយសារជីវភាពមានការលំបាកខ្លាំង ឪពុករបស់លោក បានចាកចេញពីខេត្តព្រៃវែង ទៅខេត្តស្ទឹងត្រែង ដើម្បីរកចំណូលគ្រាន់ចិញ្ចឹមកូនតូចៗ ខណៈដែលម្ដាយរបស់លោក ត្រូវបេះបោចបន្លែលក់ទាំងមានជំងឺ យកប្រាក់ឱ្យកូនរៀន។
នៅអាយុបានប្រហែលពីរខួប ម្ដាយរបស់លោក ផន វណ្ណិត បានធ្វើចំណាកស្រុកទៅខេត្តស្ទឹងត្រែង ដោយសង្ឃឹមថាអាចរស់ជុំគ្រួសារអាចមានអនាគតប្រសើរជាងមុន។ ជីវិតនៅទីនោះ ក៏ហាក់មិនប្រសើរឡើយ ព្រោះធ្វើចម្ការគ្រាន់តែមួយរស់ប៉ុណ្ណោះ។ ក្នុងចំណោមបងប្អូនទាំង ៤នាក់ មានតែលោក ផន វណ្ណិត ប៉ុណ្ណោះ ដែលបានតស៊ូរៀនសូត្របន្តបន្ទាប់ ដោយសារជាប់ចិត្តនឹងការសិក្សា ហើយសង្ឃឹមថាអាចកែប្រែជីវិតបាន។ ចំណែកបងប្អូន ៣នាក់ទៀត មិនបានឆ្លងការសិក្សាខ្ពង់ខ្ពស់ដល់ថ្នាក់សាកលវិទ្យាល័យឡើយ។
នៅអាយុ ១៣ឆ្នាំ លោក ផន វណ្ណិត បានបួសជាសាមណេរ ហើយក៏បានចាប់ផ្ដើមរៀនបន្តនៅខេត្តស្ទឹងត្រែង ដែលជាទឹកដីម្ដាយលោកកំពុងផ្ញើប្រាណ។ ប៉ុន្តែក្រោយមក លោកត្រូវលាចាកម្ដាយ ទៅរៀននៅខេត្តក្រចេះវិញ ព្រោះនៅខេត្តស្ទឹងត្រែងកន្លែងដែលលោករស់នៅ មិនមានសាលារៀនខ្ពស់ឡើយ។ បែកពីម្ដាយ អារម្មណ៍កំព្រាពិបាកថ្លែង ប៉ុន្តែដាក់ចិត្តផ្ញើខ្លួនស្វែងរកវិជ្ជានៅពុទ្ធិកអនុវិទ្យាល័យរហូតទទួលជោគជ័យ និងបានបន្តមកសិក្សានៅពុទ្ធិកវិទ្យាល័យរាជធានីភ្នំពេញបន្តទៀត។
នៅឆ្នាំ២០០៦ លោក ផន វណ្ណិត មានវាសនាល្អ ត្រូវបានគេបញ្ជូនទៅបន្តវិជ្ជានៅប្រទេសឥណ្ឌា រួចក៏ប្រឹងរៀនសូត្រនៅទីនោះ រហូតដល់ចប់ថ្នាក់បរិញ្ញាបត្រ និងអនុបណ្ឌិតនៅឆ្នាំ២០១១។ ជោគជ័យលើការរៀនសូត្រជាពេលវេលាដ៏រីករាយក្នុងជីវិត គិតថាអាចជួយម្ដាយឱ្យមានជីវភាពល្អប្រសើរជាងមុន ប៉ុន្តែពេលនោះ ក៏ជាពេលដែលម្ដាយចាប់ផ្ដើមធ្លាក់ខ្លួនឈឺ មានជំងឺមកបៀតបៀនពេញរាងកាយ។
ត្រលប់មកទឹកដីកម្ពុជាវិញ លោក ផន វណ្ណិត បានព្យាយាមប្រមូលយកប្រាក់ដែលខ្លួនមានទាំងប៉ុន្មាន ជួយព្យាបាលម្ដាយ និងតាមមើលថែម្ដាយតាំងពីខេត្តស្ទឹងត្រែង រហូតដល់រាជធានីភ្នំពេញ។ ជារឿងដ៏សង្វេគបំផុត នៅថ្ងៃទី៩ ខែមេសា ឆ្នាំ២០១១ ម្ដាយរបស់លោក ផន វណ្ណិត ក៏បានលាចាកលោក មិនទាន់ស្គាល់ភាពស្រណុកសុខស្រួល បាយឆ្ងាញ់ម្ដងណាឡើយ ហើយខំប្រឹងធ្វើការ មិនខ្វល់នឹងជំងឺខ្លួនឯង។
ចាប់ផ្ដើមការងារ រកប្រាក់ចិញ្ចឹមខ្លួនឯង៖
លោក ផន វណ្ណិត បានសឹកវិញនៅឆ្នាំ២០១១ ដោយគ្មានប្រាក់ ឬទ្រព្យសម្បត្តិអ្វីជាប់ខ្លួនឡើយ គឺមានតែចំណេះវិជ្ជាមួយមុខគត់ ដែលអាចជួយលោកបាន។ ចាប់ផ្ដើមដំបូង លោក ផន វណ្ណិត បានបង្រៀននៅសាលា Newton Thilay ដោយសន្សំលុយទិញបានម៉ូតូមួយគ្រឿងជិះ។ ក្រោយមក នៅអំឡុងខែតុលាឆ្នាំ២០១១ លោកក៏បានដាក់ពាក្យជាសាស្ត្រាចារ្យបង្រៀននៅសាកលវិទ្យាល័យបញ្ញាសាស្ត្រ និងបញ្ញាជាតិ ដោយទទួលបានប្រាក់ខែសមរម្យ អាចទំនុកបម្រុងខ្លួនឯងបាន ព្រមទាំងរៀបការជាមួយអ្នកស្រី ជា សុឡាឌី។
ជីវិតជាសាស្ត្រាចារ្យ បានធ្វើឱ្យ លោក ផន វណ្ណិត រៀនសូត្រកាន់តែច្រើនឡើង និងស្វែងយល់ពីសង្គមកម្ពុជាកាន់តែខ្លាំង។ លោក ផន វណ្ណិត តែងយកបទពិសោធន៍ដែលខ្លួនធ្លាប់ជួបប្រទះមកចែករំលែកដល់សិស្ស ព្រមទាំងបង្រៀនដោយយកចិត្តទុកដាក់ខ្ពស់ ធ្វើឱ្យសិស្សទាំងអស់គោរពស្រលាញ់លោកយ៉ាងខ្លាំង។ លើសពីនេះ លោកតែងដឹកនាំនិស្សិត ចូលរួមការងារសង្គមផ្សេងៗទៀតជាច្រើន ដែលធ្វើឱ្យមនុស្សជាច្រើនទទួលស្គាល់គុណតម្លៃរបស់លោក។ ក្រោយមក លោក ផន វណ្ណិត ក៏ត្រូវបានសាកលវិទ្យាល័យនានា ទាក់ទងបង្រៀនជាបន្តបន្ទាប់ ហើយក៏មានក្រុមហ៊ុនទាក់ទងឱ្យធ្វើជាអ្នកប្រឹក្សាយោបល់ ដោយទទួលបានប្រាក់ខែកាន់តែច្រើន។ ទោះបែបនេះក្ដី លោក ផន វណ្ណិត គិតថា ជីវិតមិនអាចនៅដដែលរហូតទេ គឺត្រូវធ្វើអ្វីដែលថ្មីជានិច្ច លោកក៏បានគិតពីការរកស៊ីវិញម្ដង។
ចាប់ផ្ដើមជីវិត ក្នុងវិស័យអចលនទ្រព្យ៖
តាមពិតទៅ លោក ផន វណ្ណិត មានចំណាប់អារម្មណ៍លើវិស័យអចលនទ្រព្យតាំងពីឆ្នាំ២០១១ ហើយចាប់ផ្ដើមទិញដីដំបូងនៅម្ដុំចោមចៅ ផ្លូវជាតិលេខ៣ ដើម្បីទុកជាទ្រព្យជាប់ខ្លួន។ បន្ទាប់មកទៀត រាល់ថ្ងៃឈប់សម្រាក លោកតែងធ្វើដំណើរទៅជាយក្រុង ពិសេសម្ដុំតំបន់ភ្នំរាប រហូតដល់គ្រួសារឆ្ងល់ថា ហេតុអ្វីបានជាលោកចេះតែទៅទីនោះ ប៉ុន្តែលោកមានគោលដៅច្បាស់សម្រាប់ខ្លួនឯងរួចទៅហើយ។
នៅឆ្នាំ២០១៦ លោក ផន វណ្ណិត បានសម្លឹងឃើញពីវិស័យអចលនទ្រព្យមានសន្ទុះកាន់តែខ្លាំង ក៏ចាប់ផ្ដើមដាក់ចិត្តប្រឡូកដោយមិនរួញរា។ នៅខែតុលា ឆ្នាំ២០១៦ ដដែល លោកបានឃើញការិយាល័យពុះដីឡូត៍មួយនៅតាមបណ្ដោយផ្លូវទំនប់កប់ស្រូវ ប្រកាសលក់ដីឡូត៍បង់រំលស់ លោកក៏សម្រេចចិត្តទៅទិញ ២ឡូត៍ និងសុំគេធ្វើជាបុគ្គលិកផ្នែកលក់។ ដោយឱកាសមកដល់ ហើយជួបប្រធានរដ្ឋបាលជាអ្នកធ្លាប់បួសដូចគ្នាផងនោះ លោកក៏បានក្លាយជាបុគ្គលិកផ្នែកលក់ម្នាក់។
មិនបង្អង់យូរ ក្នុងរយៈពេលប៉ុន្មានខែដំបូង លោក ផន វណ្ណិត បានរៀនស្វែងយល់ពីភូមិសាស្ត្រ ការធ្វើប្លង់ ឡើងឡូត៍ និងការពន្យល់អតិថិជន ដោយមិនទាន់គិតពីផលចំណេញមកវិញឡើយ។ ត្រឹមពេលដ៏ខ្លី លោក ផន វណ្ណិត បានជោគជ័យយ៉ាងខ្លាំង ដោយមានអតិថិជនទុកចិត្ត និងទិញតាមលោកជាច្រើន ដោយមិនជួបបញ្ហាអ្វីឡើយ។ ប្រាក់កម្រៃរបស់លោក បានទទួលចាប់ពីខ្ទង់រយដុល្លារ ដល់ពាន់ដុល្លារ និងឈានដល់ម៉ឺនដុល្លារក្នុងមួយខែ។ ទោះបែបនេះក្ដី លោកនៅតែមិនបោះបង់ការប្រឹងប្រែង ហើយព្យាយាមសិក្សាបន្ថែមទៀត ពីរបៀបធ្វើជំនួញលើវិស័យអចលនទ្រព្យ ដែលកំពុងមានសន្ទុះខ្លាំង។
នៅខែឧសភា ឆ្នាំ២០១៨ លោក ផន វណ្ណិត ក៏សម្រេចចិត្ត ចាប់ផ្ដើមជំនួញដោយខ្លួនឯង ដោយបើកក្រុមហ៊ុនឈ្មោះ រាជសន្តុសិត។ មានជំនួញផ្ទាល់ខ្លួន និងមានឈ្មោះជាអគ្គនាយកមែនពិត ប៉ុន្តែលោក ផន វណ្ណិត នៅតែវប្បធម៌រស់នៅដោយជួយអ្នកដទៃ ព្រមទាំងបង្ហាញផ្លូវអ្នកដែលដើរជាមួយលោកជានិច្ច។ អគ្គនាយកក្រុមហ៊ុនវ័យក្មេងរូបនេះ គឺជាមនុស្សម្នាក់ដែលហ្មត់ចត់លើការងារ ហើយមានចំណេះដឹងផ្នែកអចលនទ្រព្យយ៉ាងទូលំទូលាយ ដើម្បីចែករំលែកទៅកាន់បុគ្គលិកក្នុងក្រុមហ៊ុន។
អ្នកដែលស្គាល់លោកពីមុនមក មានការជឿទុកចិត្តខ្លាំង ក៏បានមករួមដំណើរជាមួយក្រុមហ៊ុនរបស់លោកបន្តបន្ទាប់រហូតដល់រាប់រយនាក់។ សព្វថ្ងៃក្រុមហ៊ុន រាជសន្តុសិត របស់លោក ផន វណ្ណិត បានរីកចម្រើនយ៉ាងឆាប់រហ័ស ដោយលោកមានលទ្ធភាពទិញដីជាច្រើនគម្រោង ហើយលក់ដាច់អស់ត្រឹមពេលយ៉ាងខ្លី ក៏ព្រោះតែសេចក្ដីទុកចិត្ត និងភាពល្បីល្បាញតគ្នា។ ពេលនេះ លោក ផន វណ្ណិត បានបើកសាខាមួយចំនួនបន្ថែមទៀត ដើម្បីបម្រើសេចក្ដីត្រូវការរបស់អតិថិជន។
មេរៀនជីវិតពីលោក ផន វណ្ណិត៖
លោក ផន វណ្ណិត តែងគិតថា ភាពជោគជ័យមិនមែនកើតឡើងដោយចៃដន្យនោះទេ គឺវាកើតចេញពីការសេពគប់មិត្តត្រូវ គិតត្រូវ និងធ្វើត្រូវ។ លោកបានស្វែងយល់ពីអ្វីដែលអ្នកដទៃគិតមិនដល់ ហើយបង្កើតឱកាសសម្រាប់ខ្លួនឯង ដោយមិនដេករង់ចាំឱកាសឡើយ។ ភាពជោគជ័យកន្លងមក គឺដោយសារលោកគិតលឿន ធ្វើលឿន ហានប្រថុយនូវហានិភ័យ ដើម្បីកុំឱ្យឱកាសល្អកន្លងហួស។
លោក ផន វណ្ណិត បានបញ្ជាក់ថា បើលោកមិនបានទិញដីឡូត៍ដំបូងក្នុងឆ្នាំ២០១១ នោះទេ លោកក៏មិនអាចមានថ្ងៃនេះដែរ។ ដូចនេះ គ្រប់គ្នាត្រូវហ៊ានធ្វើអ្វីដែលថ្មីជានិច្ច មិនគួរធ្វើអ្វីដដែលៗជាទម្លាប់ប្រចាំថ្ងៃនោះឡើយ ព្រោះការធ្វើអ្វីដដែលៗ លទ្ធផលក៏មិនខុសពីមុនឡើយ។ បើអ្នកចង់បានអ្វីថ្មី ត្រូវបោះបង់ទម្លាប់ធម្មតា ហើយហានធ្វើអ្វីដែលថ្មីដូចគ្នា៕