ស្ពានឈើថ្មើរជើងប្រវែងជិត១គីឡូម៉ែត្រ ត្រូវបានសាងសង់ចូលប្រាសាទដ៏ចំណាស់មួយរបស់ខ្មែរ

2019-08-29 08:53:10
ព័ត៌មាន

2019-08-29 08:53:10
ចំនួនមតិ 0 | ចំនួនចែករំលែក 0

ចន្លោះមិនឃើញ

"ស្ពានភ្ជាប់និស្ស័យបារាយណ៍ មេបុណ្យ" ជាឈ្មោះស្ពានឈើប្រវែង ៨០០ម៉ែត្រ ទទឹង ១,៥ ម៉ែត្រ សាងសង់ចូលទៅកាន់ប្រាសាទបន្ទាយឆ្មារ ស្ថិតនៅភូមិបន្ទាយឆ្មារកើតឃុំបន្ទាយឆ្មារស្រុកថ្មពួកខេត្តបន្ទាយមានជ័យ និងត្រូវបានសម្ពោធដាក់ឱ្យប្រើប្រាស់ថ្ងៃទី២៩ ខែសីហា នេះ។

លោក ហេង សុភក្តិ មេឃុំបន្ទាយឆ្មារឱ្យដឹងថា ស្ពានឈើនេះបានចំណាយពេលសាងសង់ពី២ខែ ចំណាយទឹកប្រាក់ សម្ភារៈនិងកម្លាំងយ៉ាងច្រើនជាអំណោយ ឯកឧត្ដម ឧប្បនាយករដ្ឋមន្ត្រី កែ គឹមយ៉ាន និងលោកជំទាវ។ លោកថា ស្ពាននេះ ភ្ជាប់ពីខ្នងបារាយណ៍ទិសខាងលិចម្ដុំស្រះស្រង់ទៅកើត គឺឆ្លងចូលកាត់បារាយណ៍ ទើបឡើងលើទួលប្រាសាទកំពែងទី១ រួចចុះកាត់កសិណ ទើបឡើងចូលដល់ប្រាសាទមេបុណ្យ ដែលស្ថិតនៅកណ្ដាលដូចកោះមួយ។ នៅកណ្ដាលប្រាសាទ ក៏បានស្ថាបនាផ្លូវឈើថ្មើរជើងខ្វាត់ខ្វែងទៀត ព្រមទាំងតាំងទីអាសន:សម្រាប់ភ្ញៀវអុចធូបទៀនបួងសួងសុំសេចក្ដីសុខចម្រើន ។

លោកបានបន្ថែមថា ចំពោះមូលហេតុប្រសិទ្ធនាមឈ្មោះ "ស្ពានភ្ជាប់និស្ស័យបារាយណ៍ មេបុណ្យ"

ទី១ រំលឹកដល់បេតិកភណ្ឌប្រាសាទមេបុណ្យ កសាងនៅចុងស.វទី១២ រជ្ជកាលព្រះបាទជ័យវរ្ម័នទី៧ ដែលទ្រង់ឧទ្ទិសថ្វាយដល់ព្រះវរ:រាជមាតារបស់ព្រះអង្គ។
ទី២ ដើម្បីរំលឹកអនុស្សាវរីយ៍ និងភ្ជាប់និស្ស័យជាមួយសម្តេចតេជោហ៊ុន សែន នាយករដ្ឋមន្ត្រីកម្ពុជា ដែលបានផ្ដល់ស្រះទឹកយក្សធំៗកាលពីឆ្នាំ២០១៥ និងទទួលវត្តមាន របស់សម្តេចនាយករដ្ឋមន្ត្រីចំនួន២លើក ។
ទី៣ គឺភ្ជាប់និស្ស័យជាមួយឯកឧត្ដម កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ និងលោកជំទាវម៉ៅ ម៉ាល័យ កែ គឹមយ៉ាន ដែលបានដឹកនាំនិងជួយស្តារនិងអភិវឌ្ឍន៍ខេត្តបន្ទាយមានជ័យ និងដោយឡែកនៅឃុំបន្ទាយឆ្មារស្រុកថ្មពួកនេះ ។

ស្ពានឈើនេះ ត្រូវបានសាងសង់ពីឈើក្រាក់ចម្រុះរួមមាន គគីរ កកោះ ឈើក្រំ ត្រាច ទ្រាស ផ្ចឹក រាំង ជាដើម ហើយគ្រាន់តែថ្ងៃដំបូង ដែលស្ពានឈើថ្មើរដ៏វែងនេះសម្ពោធដាក់អោយប្រើប្រាស់ ក៏មានភ្ញៀវទេសចរ ពីគ្រប់ទិស មកទស្សនា ធ្វើដំណើរថ្មើរជើង ស្រូបខ្យល់អាកាសបរិសុទ្ធ និងចូលទៅគោរពសក្ការ:នៅប្រាសាទមេបុណ្យ ។

លោក យឿង ឈៀ មេក្រុមជាងឈើនៅឃុំបន្ទាយឆ្មារឱ្យដឹងដែរថា សំណង់ស្ពានឈើដ៏វែងនេះ ត្រូវសាងសង់ដោយជាងជិត១០នាក់ ប្រើពេលជិត៣ខែ ។ ឯស្ថាបត្យកម្ម និងសំណង់ស្ពានឈើបានផ្ដល់គំរូ ដោយក្រសួងវប្បធម៍ និងក្រសួងទេសចរណ៍៕