- 2019-12-02 04:49:40
- ព័ត៌មាន
ស្ទឹងត្រែងរៀបចំចុះបញ្ជីទួលប្រាសាទ និងស្រះទឹកបុរាណបន្ថែមទៀតនៅឆ្នាំក្រោយ
- 2019-12-02 04:49:40
- ចំនួនមតិ 0 | ចំនួនចែករំលែក 0
ស្ទឹងត្រែងរៀបចំចុះបញ្ជីទួលប្រាសាទ និងស្រះទឹកបុរាណបន្ថែមទៀតនៅឆ្នាំក្រោយ
ចន្លោះមិនឃើញ
មន្ទីរវប្បធម៌ និងវិចិត្រសិល្បៈខេត្តស្ទឹងត្រែងរៀបចំចុះបញ្ជីទួលប្រាសាទកំណប់និងស្រះទឹកបុរាណបន្ថែមទៀត ដើម្បីអភិរក្សមរតកនេះទុកឱ្យកូនចៅជំនាន់ក្រោយបានស្គាល់ និងឈានទៅបង្កើតជារមណីយដ្ឋានវប្បធម៌ទេសចរណ៍ នៅឆ្នាំ២០២០ ខាងមុខនេះ។
លោកស្រី ញើត សារឿន ប្រធានមន្ទីរវប្បធម៌ និងវិចិត្រសិល្បៈខេត្តបានបញ្ជាក់ថា នៅលើទឹកដីខេត្តនេះ មានតំបន់ប្រាសាទចំនួន៧កន្លែង បានចុះបញ្ជីជាផ្លូវ ការរួចរាល់ហើយ ដូចជាប្រាសាទបា ដើម- ប្រាសាទបាចុង- ប្រាសាទ៩ល្វែង- ប្រាសាទគូ- ប្រាសាទភ្នំធាតុ -ប្រាសាទព្រះគោ និងប្រាសាទទួលប្រាសាទជាដើម។
លោកស្រីបន្តថា ក្រុមការងារពាក់ព័ន្ធបានឯកភាពគ្នាចុះបញ្ជីប្រាសាទទួលកំណប់មួយទៀតដើម្បី អភិរក្សទុក ព្រោះជាមរតកដូនតានៅសេសសល់ពីសម័យដើម ។ដូច្នេះមន្ទីរវប្បធម៌បានសហការជាមួយអភិបាលស្រុកដើម្បីកំណត់ តំបន់ចំណុចនិយាមការ ឱ្យបានជាក់លាក់ ចុះបញ្ជី និងសំណូមពរ ឱ្យលោកអភិបាលស្រុកទាំងអស់ជួយដោះស្រាយជាមួយប្រជាពលរដ្ឋដើម្បីផលប្រយោជន៍ជាតិទាំងអស់គ្នា។
លោក សុវណ្ណ ពិសេដ្ឋ អភិបាលស្រុកសេសាន បានគាំទ្រចំពោះកិច្ចសហការនេះ ព្រោះការ អភិរក្សបានផ្ដល់នូវសក្ដានុពលថ្មីមួយទៀត ដោយបង្កលក្ខណៈឱ្យផ្នែកជំនាញរៀបចំជាតំបន់ រមណីយដ្ឋានទេសចរណ៍បែប វប្បធម៌ សម្រាប់ភ្ញៀវមកទស្សនានៅក្នុងភូមិនេះ។អាជ្ញាធរបានពិគ្រោះជាមួយម្ចាស់ដីនៅជាប់តំបន់មួយចំនួនរួចហើយ ដើម្បីឱ្យពួកគាត់បរិច្ចាគផ្ទៃដីមួយចំនួនធ្វើជាតំបន់អភិរក្សប្រាសាទបានកំណត់ថា អាជ្ញាធរនឹងស្នើសុំដីទំហំ៥០ម៉ែត្រ៤ជ្រុងចេញពីចំណុចអាក់ប្រាសាទ។
លោក សំចាន់ ថន ប្រជាពលរដ្ឋរស់ភូមិ ហាង សាវ៉ាត ក្នុងស្រុកសេសាន ខេត្តស្ទឹងត្រែងបានឱ្យដឹងថា លោកមិនជំទាស់និងការស្នើសុំនេះទេ តែចង់ស្នើឱ្យអាជ្ញាធរពាក់ព័ន្ធជួយដោះស្រាយផ្នែកកម្លាំងពលកម្មណាមួយឱ្យសមស្របជូនមកគាត់ជាកសិករផង។
ចំណែកលោក ខៅ ម៉ន មេភូមិហាងសាវ៉ាត បានគាំទ្រការស្នើសុំពីអាជ្ញាធរ និងស្នើឱ្យពលរដ្ឋគិតដល់ផលប្រយោជន៍ឱ្យបានច្រើន ព្រោះបើមានការរៀបចំជារមណីយដ្ឋានទេសចរណ៍វប្បធម៌ មានភ្ញៀវមកទស្សនាច្រើន បងប្អូនអាចរកប្រាក់ចំណូលបានជាអចិន្ត្រៃយ៍ពីការលក់ដូរ ហើយនៅភូមិក៏មានភាពអភិវឌ្ឍរីកចម្រើនបន្ថែមទៀត៕