- 2020-12-28 02:45:29
- ព័ត៌មាន
អត្ថន័យចម្លាក់ អាទិទេពសម័យអង្គរនៅទឹកធ្លាក់មួយកន្លែង ដែលគេទើបប្រទះឃើញ
- 2020-12-28 02:45:29
- ចំនួនមតិ 0 | ចំនួនចែករំលែក 0
អត្ថន័យចម្លាក់ អាទិទេពសម័យអង្គរនៅទឹកធ្លាក់មួយកន្លែង ដែលគេទើបប្រទះឃើញ
ចន្លោះមិនឃើញ
រមណីយដ្ឋានធម្មជាតិ បែបប្រវត្តិសាស្ត្រមួយកន្លែងនៅខេត្តព្រះសីហនុកំពុង ទាក់ទាញចំណាប់អារម្មណ៍ពីអ្នកលេងបណ្ដាញសង្គមកម្ពុជា ក្រោយរូបរាងជាច្រើនសន្លឹកត្រូវបានចែករំលែកតៗគ្នាយ៉ាងភ្លូកទឹកភ្លូកដី។
រមណីយដ្ឋាននេះមានឈ្មោះថាប្រាសាទបន្ទាយទ័ព ស្ថិតនៅក្នុងស្រុកព្រៃនប់ ខេត្តព្រះសីហនុ មានទេសភាពស្អាត រួមផ្សំជាមួយខ្យល់អាកាស ទឹកធ្លាក់ធម្មជាតិ អ្វីដែលពិសេសបំផុតនោះគឺមានរូបចម្លាក់ដែលទំនងជាការដាប់ថ្មី បង្ហាញពីអាទិទេព និងរឿងទេវកថាក្នុងព្រហ្មញ្ញសាសនា។
ចម្លាក់នៅទីនោះមានដូចជា សិវលិង្គ, គោនិន្ទជាយានជំនិះរបស់ព្រះសិវៈ ឬព្រះឥសូរ។ ចម្លាក់អណ្ដើកឈ្មោះកូម៌ក្នុងទេវកថាកូរសមុទ្រទឹកដោះ ជាអវតារដែលព្រះវិស្ណុទ្រង់បានបែងភាគឲ្យមុជចុះទៅទ្រភ្នំមន្ទរៈ គ្រាដែលភ្នំមន្ទរៈ ត្រូវផ្អៀងពេលដំណើរការកូរទឹកសមុទ្រ។
ក្នុងនោះគេក៏ឃើញមានដែរចម្លាក់ព្រះវិស្ណុផ្ទំ ឬវិស្ណុអនន្តសាយិន (Visnu Anantasāyin) គេប្រទះឃើញជាច្រើននៅក្នុងចម្លាក់ខ្មែរចាប់តាំងពីមុនសម័យអង្គរ រហូតដល់សម័យអង្គរ។ គេនិទានថាមានគ្រោះមហន្តរាយបានចាប់ផ្តើមដោយសាររាំងស្ងួតដ៏វែងមួយ ភ្លៀងក៏ឈប់ធ្លាក់ ដែលបណ្តាលមកពីខ្វះធម៌នៅក្នុងលោក ហើយលោកទាំងមូលចាប់ផ្តើមឆេះ គ្រប់សត្វទាំងអស់ត្រូវស្លាប់នឹងភ្លើងឆេះ។
ក្នុងពេលនោះ ព្រះវិស្ណុមានភ្នែកមួយពាន់ជើងមួយពាន់ បានសម្រេចចិត្តផ្ទុំកណ្តាលសមុទ្រ។ ព្រះវិស្ណុផ្ទំលើនាគអនន្ត-សេសដែលមានជីវិតអមតៈក្បាលមួយពាន់។ ព្រះវិស្ណុភ្ញាក់ពីផ្ទំដោយមហិទ្ធិឫទ្ធិអាត្ម័នរបស់ព្រះអង្គ ទ្រង់បានឃើញពិភពលោក ក្នុងខណៈនោះព្រះអង្គបានធ្វើបាដិហារ្យដើម្បីបង្កើតជីវិតនានា ផ្កាឈូកបានផុសឡើងចេញពីផ្ចិតដោយក្នុងផ្កាឈូកមានព្រះព្រហ្មមុខបួន ដែលនឹងមកត្រួតត្រានូវការបង្កើតលោកថ្មី។
ក្រៅពីនោះគេឃើញមានចម្លាក់សត្វដំរី ចម្លាក់លិង្គ និងយោនី តំណាងឲ្យការបង្កើតលោក ចម្លាក់ព្រះសិវៈ និងមហេសី នាងឧមាគង់លើគោនិន្ទជាយានជំនិះ ដែលចម្លាក់ទាំងអស់ចម្លងចេញពីសិល្បៈសម័យអង្គរ នៅតាមតំបន់ផ្សេងគ្នាដូចជានៅក្បាលស្ពាន, ស្ទឹងលិង្គ១ពាន់ជាដើម៕
