- 2021-01-16 07:09:46
- ព័ត៌មាន
យ៉ាងតិច ៣០ប្រទេស បានប្រើប្រាស់ ឬ គ្រោងនឹងទិញវ៉ាក់សាំងកូវីដ-១៩ពីចិន
- 2021-01-16 07:09:46
- ចំនួនមតិ 0 | ចំនួនចែករំលែក 0
យ៉ាងតិច ៣០ប្រទេស បានប្រើប្រាស់ ឬ គ្រោងនឹងទិញវ៉ាក់សាំងកូវីដ-១៩ពីចិន
ចន្លោះមិនឃើញ
កាលពីអធ្រាត្រថ្ងៃទី១៥ ខែមករា ២០២១ ប្រមុខរាជរដ្ឋាភិបាលកម្ពុជា សម្ដេចនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលសាធារណរដ្ឋប្រជាមានិតចិននឹងផ្ដល់វ៉ាក់សាំងកូវីដ-១៩ ម៉ាកស៊ីណូហ្វាមមកដល់កម្ពុជាក្នុងពេលឆាប់ៗ។ ជាមួយគ្នានេះដែរ Sabay ចង់នាំមកជូនប្រិយមិត្តឲ្យដឹងជ្រាបពីប្រទេស ដែលបានប្រើប្រាស់ ឬ គ្រោងនឹងទិញវ៉ាក់សាំងកូវីដ-១៩ពីស្រុកចិន។
គិតត្រឹមថ្ងៃទី១៦ ខែមករា បើតាមការចងក្រងទិន្នន័យរបស់ Sabay បានឲ្យដឹងថា យ៉ាងតិចមានប្រទេសចំនួន ៣០ ជុំវិញពិភពលោកបានចាក់សាកល្បង អនុញ្ញាតឲ្យប្រើប្រាស់ និងគ្រោងនឹងទទួលបានវ៉ាក់សាំងកូវីដ-១៩ពីក្រុមហ៊ុនផ្សេងៗរបស់ចិន ដែលមានដូចជា SinoPharm, SinoVac, Cansino និងវ៉ាក់សាំងពីក្រុមហ៊ុន Anhui Zhifei Longcom។
តំបន់អាស៊ីអាគ្នេយ៍
នៅក្នុងតំបន់នេះដែរ ចំណោមប្រទេសចំនួន ១១ (អាស៊ាន បូកនឹងទីម័រខាងកើត) មានប្រទេស ៨ហើយដែលព្រមព្រៀងទទួលវ៉ាក់សាំងពីចិន ដែលការព្រមទទួលនេះធ្វើឡើងក្រោយពេលលោករដ្ឋមន្ត្រីការបរទេស វ៉ាង យី ធ្វើទស្សនកិច្ចនៅតំបន់អាស៊ីអាគ្នេយ៍កាលពីពេលថ្មីៗនេះ [1] [2] [3]។ ប្រទេសដែលមិនទាន់ ឮថាទទួលពីចិននោះមានដូចជា វៀតណាម ប្រ៊ុយណេ និងទីម័រខាងកើត។
តំបន់អាស៊ីទក្សិណ
ចំណោមប្រទេសអាស៊ីខាងត្បូងទាំងអស់មានប្រទេស ២ ប៉ាគីស្ថាន និងស្រីលង្កា នឹងប្រើប្រាស់វ៉ាក់សាំងរបស់ចិន [4] [5]។
តំបន់មជ្ឈិមបូព៌ា និងអាហ្វ្រិកខាងជើង
៧ ប្រទេសពីតំបន់នេះ រួមមាន រាជាណាចក្រអារ៉ាបរួម (អារ៉ាបអេមីរ៉ាត់) បារ៉ែន ហ្សកដានី អារ៉ាប៊ីសាអ៊ូឌីត អេហ្ស៊ីប ម៉ារ៉ុក និងអាល់ហ្សេរី។ ប្រទេសអារ៉ាបទាំងនេះជាប្រទេសដែលអនុញ្ញាតឲ្យមានការសាកល្បងប្រើប្រាស់វ៉ាក់សាំងប្រទេសចិន ហើយក៏អនុញ្ញាតឲ្យប្រើប្រាស់មុនគេផងដែរ។
តំបន់អឺរ៉ុប
បើយោងតាមការចុះផ្សាយរបស់សារព័ត៌មានចិន Global Times បានឲ្យដឹងថា ប្រទេសអ៊ុយក្រែន និងទួរគី បានធ្វើការកុម្មង់ពីប្រទេសចិន។ កាលពីប៉ុន្មានថ្ងៃមុននេះ ហុងគ្រីក៏អនុញ្ញាតឲ្យប្រើប្រាក់វ៉ាក់សាំងចិនទូទាំងប្រទេសរបស់ខ្លួន ចំណែកឯរុស្ស៊ីវិញ ស្ថិតក្នុងចំណោមប្រទេសដំបូងៗ ដែលធ្វើការសាកល្បងវ៉ាក់សាំងស្រុកចិន។
តំបន់អាមេរិកឡាទីន
នៅតំបន់ឡាទីន មានប្រទេសចំនួន ៥ ដែលបានប្រើប្រាស់ និងត្រៀមនាំចូលវ៉ាក់សាំងពីចិន ក្នុងនោះមានដូចជា ប្រេស៊ីល (ប្រើសាកល្បង) អាហ្សង់ទីន ឈីលី ប៉េរូ និងម៉ិកស៊ីកូ។
តំបន់អាហ្វ្រិក
ប្រទេសតំបន់អាហ្វ្រិកច្រើនតែមានគម្រោងប្រើប្រាស់វ៉ាក់សាំងក្នុងគម្រោង COVAX របស់អង្គការសុខភាពពិភពលោក តែក្រោយពីលោកវ៉ាង យី ធ្វើទស្សនកិច្ចកាលពីដើមឆ្នាំ២០២១នេះ មានប្រទេសមួយចំនួនដូចជា អេត្យូពី អាហ្វ្រិកខាងត្បូង និងនីហ្សេរីយ៉ា បានធ្វើការចរចាក្នុងការនាំចូល ខណៈកោះស៊ីស្ហែល (Seychelles) បានអនុញ្ញាតឲ្យប្រើប្រាស់វ៉ាក់សាំងចិនហើយ [6] [7] [8]៕