- 2021-08-16 04:22:40
- ព័ត៌មាន
ផ្តើមពីសន្តិសុខ និងអ្នករត់ម៉ូតូឌុប ការតស៊ូជួយឲ្យលោក បាន ម៉ូវ ក្លាយជាអគ្គនាយកក្រុមហ៊ុនដ៏ធំមួយ
- 2021-08-16 04:22:40
- ចំនួនមតិ 0 | ចំនួនចែករំលែក 0
ផ្តើមពីសន្តិសុខ និងអ្នករត់ម៉ូតូឌុប ការតស៊ូជួយឲ្យលោក បាន ម៉ូវ ក្លាយជាអគ្គនាយកក្រុមហ៊ុនដ៏ធំមួយ
ចន្លោះមិនឃើញ
ដូចដែលយើងបានដឹងស្រាប់ហើយថា ភាពជោគជ័យរបស់មនុស្សម្នាក់ៗតែងតែកើតឡើងក្នុងទម្រង់ និងបរិបទផ្សេងៗគ្នា ដោយអ្នកខ្លះជោគជ័យក្នុងការងារ ហើយអ្នកខ្លះទៀតជោគជ័យក្នុងអាជីវកម្ម ការផ្តល់សេវាកម្ម ការរកស៊ី ឬពាណិជ្ជកម្មជាដើម។
ជាមួយគ្នានេះ ការបង្កើតអាជីវកម្មមួយបាន និងទទួលបានភាពជោគជ័យមិនមែនអាស្រ័យតែទៅលើការមានដើមទុនច្រើននោះឡើយ ប៉ុន្តែ ក៏អាស្រ័យទៅលើឱកាស ការតស៊ូមិនបោះបង់ មានចិត្តអំណត់ និងកត្តាទីផ្សារផងដែរ។
តួយ៉ាងដូចជាលោក បាន ម៉ូវ បានឆ្លងកាត់ជីវិតជូរចត់បែបពនេចរជាច្រើនដំណាក់កាល និងបានកំព្រារឪពុកតាំងពីតូច មុនឹងក្លាយជាក្លាយអគ្គនាយកក្រុមហ៊ុនដ៏ធំមួយដែលមានឈ្មោះថា អូគិថាណា ដែលជាក្រុមហ៊ុនផលិតទឹកបរិសុទ្ធ និងផលិតផលថែរក្សាសម្ផស្ស អូគិថាណា ដែលត្រូវបានផលិតដោយផ្ទាល់នៅក្រុមហ៊ុនរបស់លោកតែម្តង។
នៅពេលដែល Sabay ចោទសួរពីជីវប្រវត្តិដែលធ្លាប់បានឆ្លងកាត់កន្លែងមក បុរសវ័យ៣៩ឆ្នាំរូបនេះ បាននិយាយទាំងមុខស្ងួតថា៖ «ខ្ញុំគឺជាកូនកំព្រារឪពុក ហើយដោយសារតែខ្ញុំមានបងប្អូនដល់ទៅ១០នាក់ ខ្ញុំក៏ត្រូវទៅរស់នៅជាមួយនឹងសាច់ញាតិរបស់ខ្ញុំតាំងពីតូច ហើយក៏មិនសូវទទួលបានភាពកក់ក្តៅពីម្តាយផងដែរ»។
លោកបាន ម៉ូវ មានស្រុកកំណើតនៅភូមិសៀមពាយ ឃុំព្រះដំរី ស្រុកស្ទោង ខេត្តកំពង់ធំ ប៉ុន្តែ ដោយសារតែកត្តាជីវភាព បានបង្ខំឲ្យលោកទៅរស់នៅជាមួយនឹងបងប្អូនតាំងពីតូចរហូតដល់បញ្ចប់ការសិក្សាទុតិយភូមិនៅទីនោះ ប៉ុន្តែ លោកមិនមានលទ្ធភាពបន្តសិក្សានៅមហាវិទ្យាល័យឡើយ។
ស្ថិតក្នុងទឹកមុខស្រងូតស្រងាត់ ម្ចាស់ក្រុមហ៊ុនរូបនេះ ដែលមានប្អូនបង្កើតរហូតដល់ទៅ១០នាក់នោះ បានប្រាប់បន្តថា៖ «បន្ទាប់ពីបញ្ចប់ថ្នាក់បាក់ឌុប ខ្ញុំបានចូលខ្លួនទៅបម្រើកងទ័ព្ទនៅតាមព្រំដែនខេត្តព្រះវិហារ ក្នុងឆ្នាំ២០០៨ និងបានរៀបការនៅទីនោះ ប៉ុន្តែ ជីវិតខ្ញុំ និងភរិយារបស់ខ្ញុំតែងតែងជួបភាពបរាជ័យជានិច្ច មិនថា អាជីពការងារ ឬអាជីវកម្មឡើយ»។
ដោយសារតែជួបបញ្ហាលំបាកក្នុងជីវភាព បន្ទាប់ពីជួបភាពបរាជ័យជាបន្តបន្ទាប់ លោកបាន ម៉ូវ រួមទាំងភរិយារបស់លោកក៏បានសម្រេចចិត្តផ្លាស់ប្តូរមករស់នៅទីក្រុងភ្នំពេញ ក្នុងឆ្នាំ២០១៥ ដោយសង្ឃឹមអាចនឹងមានជីវភាពធូរធា ក៏ដូចអាចមានទីលំនៅច្បាស់លាស់។
ប៉ុន្តែ អ្វីៗមិនដូចជាការរំពឹងទុកឡើយ ពោលគឺអាចនិយាយបានថា ជីវិតរបស់លោកហាក់កាន់តែត្រដាបត្រដួសជាងមុនទៅទៀត ដោយសារតែលោកត្រូវដើរស៊ីឈ្នួលគេជាច្រើនកន្លែង ដើម្បីបំពេញ និងផ្តត់ផ្គង់ជីវភាពប្រចាំថ្ងៃរបស់លោក។
លោកបាន ម៉ូវ បាននិយាយក្នុងសម្តីបែបស្រទន់ថា៖ «ពេលមកដល់ភ្នំពេញភ្លាមៗ ខ្ញុំបានធ្វើការងារជាសន្តិសុខយាមសាលារៀនឲ្យគេ ហើយពេលទំនេរ ខ្ញុំរត់ម៉ូឌុប និងដើរស៊ីឈ្នួលគេធ្វើសំណង់ជាដើម។ និយាយឲ្យខ្លីទៅគឺថា ដើរធ្វើការឲ្យគេដើម្បីដូរបាយសម្រាប់ខ្ញុំផ្ទាល់ រួមនឹងភិរយារបស់ខ្ញុំ។ នៅចន្លោះឆ្នាំ២០១៥ ដល់ទៅ២០១៧ ខ្ញុំពិតជាជួបការលំបាកក្នុងជីវភាព»។
យ៉ាងណាក៏ដោយ ជីវិតរបស់លោកបានចាប់ផ្តើមមានការប្រែប្រួលវិញក្នុងឆ្នាំ២០១៨ ក្រោយពីលោកបានមើលឃើញពីឱកាសទីផ្សារដ៏ធំមួយ តាមរយៈការបើកសិប្បកម្មផលិតទឹកបរិសុទ្ធអូគិថាណា ប៉ុន្តែ កាលនោះ លោកមិនមានដើមទុនច្រើនឡើយ ដោយលោកបានខ្ជីលុយសាច់ញាតិ និងម្តាយរបស់លោកសរុបបាន២០០០ដុល្លារ ដើម្បីបើកអាជីវកម្មរបស់លោក។
ភាពជោគជ័យក្នុងអាជីវកម្មលក់ទឹកបរិសុទ្ធ មិនបានទទួលផលភ្លាមៗឡើយ ដោយសារតែលោកបានប្រឈមមុខនឹងការបញ្ហា ក៏ដូចជាឧបសគ្គជាច្រើនក្នុងការរកស៊ី ប៉ុន្តែ ការព្យាយាមមិនបោះបង់ និងការពុះពារគ្រប់ឧបសគ្គ បានជួយឲ្យលោកទទួលបានជោគជ័យខ្លាំងក្នុងឆ្នាំ២០១៩ បន្តរហូតមកដល់សត្វថ្ងៃនេះ។
លោកបាន ម៉ូវ បានប្រាប់ Sabay ទាំងទឹកមុខញញឹមថា៖ «ចំណុចដែលធ្វើឲ្យខ្ញុំជោគជ័យកាលនោះ ទី១ គឺឱកាសទីផ្សារនៅទូលាយ ហើយមួយទៀតគឺការព្យាយាមជម្នះរាល់ឧបសគ្គនានា ការអត់ធ្មត់ជានិច្ច និងការតាំងចិត្ត ការស្វែងយល់ពីអាជីវកម្ម និងទីផ្សារ។ ពិតណាស់ យើងជួបការលំបាកច្រើន ដោយសារតែយើងមានដើមទុនតិច ប៉ុន្តែ អ្វីដែលសំខាន់នោះគឺខ្លួនយើងតែម្តង»។
បច្ចុប្បន្ន ក្រៅពីមានសិប្បកម្មផលិតទឹកបរិសុទ្ធអូគិថាណា ដោយខ្លួនឯង និងដើមទុនមិនតិចជាង១លានដុល្លារអាមេរិក លោកក៏បានផ្តល់សេវាដំឡើងម៉ាស៊ីនផលិតទឹកបរិសុទ្ធ និងលក់កម្មសិទ្ធិបញ្ញាលើអាជីវកម្មរបស់លោកផងដែរ ដោយគិតមកត្រឹមពេលនេះ លោកលក់សិទ្ធិ និងដំឡើងម៉ាស៊ីន ផលិតទឹកបរិសុទ្ធច្រើនជាង១០០កន្លែងរួចមកហើយទូទាំងកម្ពុជា។
មិនត្រឹមតែប៉ុណ្ណោះ លោកក៏បានចាប់យកអាជីវកម្មថ្មីមួយផ្សេងទៀត គឺការផលិត និងលក់ផលិតផលថែរក្សាសម្ផស្សអូគិថាណា ដែលរួមមាន ហ្វូមព្រហ្មចារី សាប៊ូដុសខ្លួន សាប៊ូកក់សក់ និងសាប៊ូដុសមុខ ជាដើម ខណៈដែលផលិតផលទាំងនេះ ផលិតចេញពីសារធាតុផ្សំពីធម្មជាតិសុទ្ធសាធពីស្នាដៃកូនខ្មែរ។
ទាក់ទងនឹងផលិតផលថ្មីនេះ លោកបាន ម៉ូវ បានឲ្យដឹងថា៖ «ការផ្តួចផ្តើមឲ្យមានការបង្កើតអាជីវកម្មនេះឡើង ព្រោះខ្ញុំមើលឃើញពីឱកាស និងទីផ្សារ ពិសេសខ្ញុំចង់លើកស្ទួយផលិតផលខ្មែរយើង និងបង្ហាញថា ខ្មែរយើងក៏មានសមត្ថភាពក្នុងការផលិតផលិតផលដែលមានគុណភាពខ្ពស់ដូចប្រទេសគេផងដែរ។ មិនត្រឹមតែប៉ុណ្ណោះ នេះក៏ជាការបង្កើតទីផ្សារការងារមួយសម្រាប់ប្រជាកសិករ និងប្រជាកម្ពុជាយើងផងដែរ»។
ជាចុងក្រោយ លោកបានផ្តល់សារផ្ញាំផ្ញើរថា ការបើកអាជីវកម្មមួយឲ្យទទួលជោគជ័យទៅបាន មិនមែនផ្តោតសំខាន់តែលើដើមទុនឡើយ ប៉ុន្តែ ចំណុចសំខាន់នោះគឺការខិតខំព្យាយាម អត់ធ្មត់ និងការមានចិត្តស្មោះត្រង់ទាំងជាមួយនឹងអតិថិជន និងក្រុមការងារ៕
ដើម្បីដឹងកាន់តែច្បាស់ និងសាកសួរព័ត៌មាននានា សូមចូលទៅកាន់ Facebook ផ្លូវការ៖ Okithana
ឬ តាមរយៈលេខទូរស័ព្ទ៖ 081 945 507, 066 749 899, 069 749 899
