នៅថ្ងៃនេះមានដំណឹងថា NATO ដាក់ពង្រាយប្រព័ន្ធការពារដែនអាកាសការពាររដ្ឋសមាជិកថែមទៀតហើយ!

2022-05-11 02:08:11
ព័ត៌មាន

2022-05-11 02:08:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រួយបារម្ភពីរីករាលដាលនៃសង្គ្រាមរុស្សីលុកលុយលើអ៊ុយក្រែន ដែលអាចឈានទៅប៉ះពាល់ដល់បណ្ដាប្រទេសជាសមាជិករបស់ខ្លួន អង្គការមហាអំណាចយោធា Nato បានប្រកាសដាក់ពង្រាយប្រព័ន្ធការពារដែនអាកាសទៅព្រំដែនប្រទេសជាសមាជិក។

ទំព័រហ្វេសប៊ុកផ្លូវការរបស់ Nato បានឲ្យដឹងថា ការលុកលុយរបស់រុស្ស៊ីលើអ៊ុយក្រែន បានបង្កើនតម្រូវការសម្រាប់ជំហរការពារដ៏រឹងមាំ។ ដូច្នេះហើយ កងកម្លាំងការពារដែនអាកាស និងមីស៊ីលមកពីប្រទេសហូឡង់ និងអាល្លឺម៉ង់ ត្រូវបានដាក់ពង្រាយប្រព័ន្ធមីស៊ីលពីដីទៅអាកាស Patriot ទៅកាន់ប្រទេសស្លូវ៉ាគី ដែលជាប់ព្រំដែនអ៊ុយក្រែន។

ការណ៍នេះ គឺដើម្បីពង្រឹងសមត្ថភាពការពារនៅភាគខាងកើតនៃសម្ព័ន្ធមិត្តណាតូ។ ប្រព័ន្ធការពារដែលមានមូលដ្ឋានលើដីទាំងនេះនឹងជួយការពារព្រំដែនរបស់ណាតូ ការពារស្លូវ៉ាគី ពីការគំរាមកំហែងដោយមីស៊ីល។

Nato បញ្ជាក់ថា ប្រព័ន្ធ Patriot នឹងរួមចំណែកធ្វើឲ្យកាន់តែប្រសើរឡើងដល់ប្រព័ន្ធការពារដែនអាកាស និងមីស៊ីលរួមបញ្ចូលគ្នា របស់ណាតូ លើកកម្ពស់បណ្តាញឧបករណ៍ចាប់សញ្ញា និងគ្រប់គ្រង ការពារគ្រឿងយោធោបករណ៍។

ជាមួយគ្នា សម្ព័ន្ធមិត្ តបានធ្វើការហ្វឹកហ្វឺនរួមគ្នាជាមួយនឹងប្រព័ន្ធនេះតាំងពីខែមេសា ដែលមានកងកម្លាំងមានមូលដ្ឋាននៅលើដី និងយន្តហោះចម្បាំង ដើម្បីបង្កើនប្រសិទ្ធភាពនៃការការពារខ្លួនរបស់ Nata ក៏ដូចជារដ្ឋសមាជិក។

ក្រៅពីការពង្រឹកប្រព័ន្ធការពារខ្លួន Nato ក៏ពង្រឹងសមត្ថភាពឆ្លើយតបផងដែរ ដែលអង្គការមហាអំណាចយោធា ថ្មីៗនេះទើបបានបញ្ចេញរបាយការណ៍មួយថា ខ្លួនមានយន្តហោះចម្បាំងជាការចូលរួមចំណែករបស់រដ្ឋសំខាន់ជាសមាជិកដល់ទៅ ៣០គ្រឿង ដែលត្រៀមជានិច្ច និងអាចចេញសកម្មភាពឆ្លើយតបពេលណាក៏បាន ក្នុងបុព្វហេតុការពារបណ្ដារដ្ឋជាសមាជិកពីហានិភ័យណាមួយ។

ចាប់តាំងពីការកើតឡើងនូវការលុកលុយរបស់រុស្សីមកលើអ៊ុយក្រែនមក បានបង្កឲ្យមានការព្រួយបារម្ភសម្រាប់រដ្ឋជាសមាជិក Nato មួយចំនួនដែលមានព្រំដែនជាប់អ៊ុយក្រែន ដែលអាចថា សង្គ្រាមអាចរាលដាលទៅដល់ទឹកដីរបស់ខ្លួន។ ស្ថានភាពនេះ Nato បានពង្រឹងទាំងប្រព័ន្ធការពារខ្លួន និងសមត្ថភាពឆ្លើយតប ព្រមជាមួយការផ្ញើសារជារឿយៗថា ខ្លួននឹងធ្វើសកម្មភាពភ្លាមប្រសិនបើរដ្ឋជាសមាជិកណាមួយរបស់ខ្លួន រងការវាយប្រហារ៕