- 2022-06-12 02:48:42
- ព័ត៌មាន
ខួបឯករាជ្យហ្វីលីពីនលើកទី ១២៤ ដាក់បង្ហាញមកុដធ្វើដោយកម្ពុជាតម្លៃ ១៨ម៉ឺនដុល្លារ
- 2022-06-12 02:48:42
- ចំនួនមតិ 0 | ចំនួនចែករំលែក 0
ខួបឯករាជ្យហ្វីលីពីនលើកទី ១២៤ ដាក់បង្ហាញមកុដធ្វើដោយកម្ពុជាតម្លៃ ១៨ម៉ឺនដុល្លារ
ចន្លោះមិនឃើញ
សភាពាណិជ្ជកម្មហ្វីលីពីនប្រចាំនៅកម្ពុជា បានសហការជាមួយភាគីកម្ពុជា រៀបចំកម្មវិធីធំមួយដើម្បីអបអរថ្ងៃពិសេសរបស់ខ្លួន ប៉ុន្តែបានដាក់បង្ហាញមកុដបវកញ្ញាច្នៃដោយកម្ពុជាមានតម្លៃដល់ទៅ ១៨ម៉ឺនដុល្លារអាមេរិក។
កម្មវិធីនេះត្រូវបានប្រសិទ្ធនាមថា កម្មវិធីរាត្រី MAHALIKA ឬ MAHALIKA Night។លោកស្រី BENILDA FERNANDO ប្រធានសភាពាណិជ្ជកម្មហ្វីលីពីនប្រចាំនៅកម្ពុជា បានមានប្រសាសន៍ថា លោកស្រីមានមោទកភាពដែលបានរៀបចំព្រឹត្តិការណ៍នេះឡើងជាមួយកម្ពុជា បង្ហាញពីចំណងទាក់ទងរវាងប្រទេសទាំងពីរ។ ជាក់ស្ដែង នេះក៏ជាពិធីដើម្បីអបអរខួបលើកទី ៦៥ នៃមិត្តភាពរវាងព្រះរាជាណាចក្រកម្ពុជា និងសាធារណរដ្ឋហ្វីលីពីនផងដែរ និងសង្ឃឹមថាវានឹងមានជារៀងរាល់ឆ្នាំ។
កម្មវិធីរាត្រី MAHALIKA មានកម្មវិធី២ធំៗទៀត នោះគឺជាការអបអរខួបបុណ្យឯករាជ្យភាពលើកទី ១២៤របស់ហ្វីលីពីន។ មួយកម្មវិធីទៀត គឺជាការដាក់បង្ហាញមកុដបវរកញ្ញា Miss Universe ដែលផលិតឡើងក្រោមការឧបត្ថម្ភរបស់ហាងពេជ្រ CSNJ Samnag Jewelry។
មកុដមានតម្លៃដល់ទៅ ១៨ម៉ឺនដុល្លារអាមេរិក ធ្វើឡើងពីពេជ្រ និងត្បូងរតនគីរីរបស់ខ្មែរ ទុកសម្រាប់បំពាក់ជូនជយលាភី Miss Universe Cambodia 2022 ។ លោក ជិន សំណាង នាយកគ្រប់គ្រងហាងពេជ្រខាងលើ បានប្រាប់ឲ្យដឹងថា លោកបានចំណាយពេលជាង ៣ខែសម្រាប់តម្លើងមកុដមួយនេះឡើង ក្នុងហេតុផលចង់លើកមោទកភាពរបស់បេក្ខភាពរបស់កម្ពុជា។
លោកលើកឡើងថា រៀងរាល់ឆ្នាំលោកតែងតាមដានកម្មវិធីប្រកួតបវរកញ្ញានានា ហើយក្នុងចិត្តរំពឹងចង់ឃើញមោទកភាពរបស់កម្ពុជា ប៉ុន្តែឆ្នាំណាលឺតែបេក្ខនារីប្រទេសផ្សេង។ ដោយឡែកឆ្នាំនេះ លោកបានឃើញពីការរីកចម្រើននៃសមត្ថភាពរបស់បេក្ខនារីកម្ពុជា។ ដូច្នេះហើយ លោកសង្ឃឹមថា ពួកគេនឹងធ្វើបានល្អ។
ជាអ្នកលើកទឹកចិត្តម្នាក់ លោកសម្រេចចូលរួមឧបត្ថម្ភបង្កើតមកុដដ៏មានតម្លៃនេះឡើង សម្រាប់បំពាក់ជូនបេក្ខភាពជយលាភីតំណាងកម្ពុជា ទៅចូលរួមប្រកួតលើឆាកអន្តរជាតិបន្តទៀត។ “ប្អូនៗត្រូវប្រឹងឲ្យអស់លទ្ធភាព ទី១ដើម្បីខ្លួនឯង ដើម្បីគ្រួសារ និងទី៣ដើម្បីមុខមាត់ប្រទេសជាតិផង"។ លោក ជិន សំណាង ថ្លែង។
លោកជំទាវ ហ៊ុន ស៊ីណាន ដែលធ្វើអធិបតី បានកោតសរសើរពីសមត្ថភាពរបស់បេក្ខភាពកម្ពុជាដូចគ្នា ហើយថា លោកជំទាវសូមលើកទឹកចិត្ត ឲ្យក្មួយៗបេក្ខភាពប្រឹងប្រែងឲ្យអស់លទ្ធភាពដើម្បីមោទកភាពរបស់ជាតិយើង។
ជាមួយគ្នានឹងការអបអរពិធីពិសេសរបស់ហ្វីលីពីន និងការដាក់បង្ហាញមកុដ កម្មវិធីក៏មានការបង្ហាញបេក្ខភាព Miss Universe Cambodia ទាំង ២០រូប និងការសម្ដែងពិសេសរបស់ក្រុមសិល្បករហ្វីលីពីនផង៕