ធ្លាប់ជាក្មេងរៀបបន្ទប់ និងប្រមូលលុយរៀនភាសាអង់គ្លេស ក្លាយជា CEO នៅក្រុមហ៊ុនអចលនទ្រព្យ

2017-07-28 02:15:01
ព័ត៌មាន

2017-07-28 02:15:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ដើមចេញពីមហិច្ឆតាចង់ក្លាយជាអ្នកធ្វើការធំតាំងពីនៅក្មេង ខណៈរស់នៅក្នុងគ្រួសារកសិករស្ទើរគ្មានលុយរៀនផង បានប្រែក្លាយវាសនារបស់ខ្លួនពីក្មេងអ្នករៀបចំបន្ទប់ និងប្រមូលលុយពេលរៀនគួរភាសាអង់គ្លេស នោះ ក្លាយទៅជាCEO និងជាអ្នកវិភាគលើវិស័យអចលនទ្រព្យដ៏ល្បីល្បាញមួយរូបនៅក្នុងសង្គមសព្វថ្ងៃ។

មានមាឌធំដំបង និង សម្បុរខ្មៅស្រអែម លោក ច្រឹក សុខនីម បានចំណាយពេលធ្វើការវិភាគលើវិស័យអចលនទ្រព្យអស់រយៈពេលជិត ១០ឆ្នាំ ហើយបានក្លាយជាអគ្គនាយកក្រុមហ៊ុន Century 21 Mekong ដែលជាក្រុមហ៊ុនធ្វើការងារជំនាញខាងអចលនទ្រព្យនៅប្រទេសកម្ពុជា។ ដ្បិតតែបណ្ដាញសារព័ត៌មានបានអញ្ជើញ និងធ្វើបទសម្ភាសន៍ញឹកញាប់ជាមួយលោកទាក់ទងវិស័យអចលនទ្រព្យនៅកម្ពុជាក្ដី ក៏ប៉ុន្តែ មនុស្សតិចតួចបានដឹងអំពីជីវប្រវត្តិរបស់លោក។ តើលោក ច្រឹក សុខនីម គឺជានរណា?

ប្រវត្តិសង្ខេបលោក ច្រឹក សុខនីម

លោក ច្រឹក សុខនីម បានកើតនៅថ្ងៃទី ០៤ ខែឧសភា ឆ្នាំ ១៩៧៩ នៅខេត្តកំពង់ចាម ដែលមានបងប្អូនចំនួន ២នាក់ (ប្រុសទាំងពីរ) ដោយសុខនីម ជាកូនច្បងនៅក្នុងគ្រួសារ។ សុខនីម មានឪពុកឈ្មោះ ឃិន ស៊ុនឡេង បច្ចុប្បន្នវ័យ ៥៧ឆ្នាំ ជាអ្នកស្រុកក្នុងខេត្តកំពង់ចាម និងមានមុខរបរជាកសិករ ឯម្ដាយឈ្មោះ សុខ គីមនី អាយុ ៥៧ឆ្នាំ មានស្រុកកំណើតនៅស្រុកព្រៃឈរ ខេត្តកំពង់ចាម មានមុខរបរលក់ដូរចាប់ហួយតិចតួចនៅមុខផ្ទះ។

លោក ច្រឹក សុខនីម បានរៀបការនៅឆ្នាំ ២០០៧។ លោកមានដំណក់ឈាមកូនប្រុសម្នាក់ជាមួយអ្នកស្រី ហ៊ាង ឆវី ដែលបច្ចុប្បន្នកូនប្រុសនេះមានឈ្មោះ ច្រឹក ដេវីដ អាយុ ៨ឆ្នាំ។

កាលនៅក្មេង និង មហិច្ឆតា

តាំងពីនៅតូច កុមារ សុខនីម មានចំណង់ចំណូលចិត្តស្រាវជ្រាវ និង ប្រឹក្សាយោបល់ឲ្យអ្នកដទៃ។ កុមារា រូបនេះ ក៏តែងចិញ្ចឹមចិត្តចង់ធ្វើការងារធំៗ ទៅថ្ងៃអនាគតផងដែរ។ «កាលនៅក្មេងខ្ញុំចង់ធ្វើការធំៗ ល្អៗ ខ្ញុំឃើញគេទីនុយស្អាតៗ ខ្ញុំមានអារម្មណ៍ថា គេមានចំណេះដឹងរកលុយបាន។ ខ្ញុំឃើញគេអីចឹង! ខ្ញុំគោរពគេ ក្រោយមកខ្ញុំជួបអ្នកចេះដឹង គេបានណែនាំខ្ញុំឲ្យរៀនសូត្រ បើចង់បានអនាគតដូចគេនោះ »។ លោក សុខនីម និយាយ។

លោក ច្រឹក សុខនីម ទទួលបានការសិក្សានៅ៖

ឆ្នាំ ១៩៨៥-១៩៩០ រៀននៅសាលាបឋមសិក្សាព្រៃទទឹង
ឆ្នាំ ១៩៩០-១៩៩៥ រៀននៅអនុវិទ្យាល័យព្រៃទទឹង
ឆ្នាំ ១៩៩៥-១៩៩៨ រៀននៅវិទ្យាល័យនរោត្តម និងបញ្ចប់ថ្នាក់បាក់ឌុបក្នុងឆ្នាំ ១៩៩៨។
ឆ្នាំ ១៩៩៩-២០០១ រៀននៅសាលាបច្ចេកវិទ្យាវិជ្ជាជីវៈព្រះកុសុមៈ ដែលបច្ចុប្បន្នប្ដូរមកជា វិទ្យាស្ថានពហុបច្ចេកវិទ្យាព្រះកុសុមៈ។ លោកបានចាប់ជំនាញលើវិស័យសំណង់រៀនចន្លោះពីម៉ោង ៧ព្រឹក ដល់ម៉ោង ៥ល្ងាច។
ឆ្នាំ៖ ១៩៩៩-២០០៣ រៀននៅសាកលវិទ្យាល័យន័រតុន ឯកទេស ធនាគារ និង ហិរញ្ញវត្ថុ។
ឆ្នាំ ២០០០-២០០២ ទទួលបានអាហារូបករណ៍ភាសាអង់គ្លេសនៅ CUS រៀនថ្ងៃសៅរ៍ និង អាទិត្យ។
ឆ្នាំ ២០១០ បានបញ្ចប់ថ្នាក់បរិញ្ញាបត្រជាន់ខ្ពស់ ផ្នែកគ្រប់គ្រងពាណិជ្ជកម្ម នៅសាកលវិទ្យាល័យ ន័រតុន។

ពេលវេលាដ៏ស្មុគស្មាញ ក្រោយប្រលងជាប់បាក់ឌុប អំឡុងឆ្នាំ ១៩៩៨

វ័យ ១៩ឆ្នាំ យុវជន ច្រឹក សុខនីម បានរៀនចប់ថ្នាក់បាក់ឌុប នៅអំឡុងឆ្នាំ ១៩៩៨។ ក្រោយពីជាប់បាក់ឌុបភ្លាមយុវជនរូបនេះ ពុំមានលុយរៀនបន្តមហាវិទ្យាល័យទេ ដូច្នេះ គេបានបង្ខំចិត្តចាកចេញពីស្រុកកំណើតនៅឯខេត្តកំពង់ចាម មកស្នាក់នៅវត្ត នាគវ័ន្ត កុដិលេខ ២៦ ជាទីសំចត ដើម្បីដាក់ពាក្យប្រលងតាមមហាវិទ្យាល័យផ្សេងៗនៅក្នុងរាជធានីភ្នំពេញ។ យ៉ាងតិច ៧ មហាវិទ្យាល័យ លោកបានដាក់ពាក្យប្រលងសុំអាហារូបករណ៍ ប៉ុន្តែ ជាលទ្ធផលធ្លាក់ទាំងអស់។ ម៉្លោះហើយយុវជនរូបនេះអស់សង្ឃឹមមិនរង់ចាំលទ្ធផលការដាក់ពាក្យប្រលង ២កន្លែងទៀតទេ ដោយបានត្រលប់ទៅស្រុកកំណើតវិញ។ មួយរយៈក្រោយមកទើបមានមិត្តភ័ក្ដិបានឃើញឈ្មោះជាប់នៅ សាលាបច្ចេកវិទ្យាវិជ្ជាជីវៈព្រះកុសុមៈ និងជាប់អាហារូបករណ៍ភាសាអង់គ្លេស ហើយបានផ្ដល់ដំណឹងឲ្យលោក ក៏ត្រលប់មកភ្នំពេញវិញ។

បន្ទាប់ពីត្រឡប់ទៅស្រុកកំណើតបាន ៦-៧ ខែ អំឡុងពេលអស់សង្ឃឹមថានឹងបានរៀនបន្តមហាវិទ្យាល័យនោះ ក៏បានត្រឡប់មកវិញ ក្រោយពីទទួលដំណឹងប្រលងជាប់សាលាពីរ។ មិនយូរប៉ុន្មាន យុវជន ច្រឹក សុខនីម បានរកឃើញឪពុកធំ (អុំប្រុសរស់នៅអាមេរិក) ហើយគាត់មានបំណងចង់ជួយ ដូច្នេះ ឪពុកធំ បានជួយឲ្យរៀនមហាវិទ្យាល័យមួយទៀតនៅសាកលវិទ្យាល័យន័រតុន ផ្នែកធនាគារ និងហិរញ្ញវត្ថុ ដែលជាចំណង់ចំណូលចិត្តតាំងពីនៅតូចមកម្ល៉េះ។ ក្នុងពេលតែមួយ យុវជន សុខនីម រៀនពីរ បីកន្លែង ប៉ុន្តែឆ្លាស់ម៉ោងគ្នា។

រៀនច្រើនបែបនេះ ធ្វើឲ្យការសិក្សាធ្លាក់ចុះដែរទេ? មិនធ្លាក់ចុះទេ ផ្ទុយទៅវិញនៅឯសាកលវិទ្យាល័យលោកច្រឹក សុខនីម បានជាប់លេខ ២ លេខ ៣ ស្ទើររៀងរាល់ឆមាស ហើយបានបញ្ជូនលិខិតសរសើរផ្សេងៗ ឲ្យឪពុកធំផងដែរ។ «កាលនៅសិក្សាថ្នាក់វិទ្យាល័យខ្ញុំមិនសូវបានលេខល្អប៉ុន្មានទេ ប៉ុន្តែក៏មិនអន់ តែនៅមហាវិទ្យាល័យខ្ញុំបានពិន្ទុល្អ ព្រោះខ្ញុំខំប្រឹងរៀននូវជំនាញដែលខ្ញុំស្រលាញ់។ មួយទៀតភាសាអង់គ្លេសរបស់ខ្ញុំអំណោយផលតាំងពីនៅវិទ្យាល័យ ពេលខ្ញុំរៀបបន្ទប់ និងប្រមូលលុយរៀនគួរនោះ។»

ជីវិតរស់នៅក្នុងវត្ត

នៅអំឡុងពេលសិក្សា លោកបានស្នាក់នៅវត្ត នាគវ័ន្ត ជិត ១០ឆ្នំា ហើយមានកង់ជាមធ្យោបាយសម្រាប់ធ្វើដំណើរទៅសិក្សា។ «ខ្ញុំពេលមកនៅវត្តធូរចំណាយច្រើន គ្រាន់តែមិនដឹងបាយទឹកច្បាស់លាស់។ ការរស់នៅក្នុងវត្តប្រឈមខ្លះដែរ ព្រោះមានអ្នកខ្លះកោតសរសើរ មានខ្លះមិនកោតសរសើរ ពេបជ្រាយយើងខ្លះ តែខ្ញុំមិនខ្វល់ទេ រឿងហ្នឹង។ ម្ដងម្កាលខ្ញុំអស់សង្ឃឹម ប៉ុន្តែ ខ្ញុំតែងតែរកអ្នកប្រឹក្សាយោបល់ផងដែរ»។

ការងារស្ម័គ្រចិត្ត និង ការស្វែងរកបទពិសោធន៍

នៅអំឡុងពេលសិក្សា យុវជន ច្រឹក សុខនីម បានឆ្លៀតទៅធ្វើការងារស្ម័គ្រចិត្តនៅអង្គការ អភិវឌ្ឍន៍កសិកម្មកម្ពុជា ក្រោយមកទៀតបានជាប់ជាបុគ្គលិកនៅក្រុមហ៊ុនប្រេងឥន្ធនៈ កាល់តិច ហើយបានប្រាក់ខែលើកដំបូងបំផុតនៅក្នុងជីវិត អំឡុងវ័យ ២១-២២ ឆ្នាំ។ «ប្រាក់ខែដំបូងខ្ញុំសប្បាយចិត្តណាស់ បានប្រាក់ខែ ២៥០ដុល្លារ ជំនាន់ហ្នឹង! ច្រើនដែរ គ្រាន់តែបានប្រាក់ខែភ្លាម ខ្ញុំទាញប្អូនមករស់នៅភ្នំពេញជាមួយ ហើយជួយផ្គត់ផ្គង់ឲ្យរៀនសូត្រដល់ចប់ និងបានការងារមកដល់សព្វថ្ងៃ។ ប្រាក់ខែដំបូងខ្ញុំក៏បានទិញរបស់ល្អៗឲ្យអ្នកម្ដាយនៅឯស្រែ ជាពិសេសខ្ញុំចូលចិត្តទិញគ្រឿងសមុទ្រផ្ញើទៅគាត់»។

តាមពិតទៅមុនធ្វើការស្ម័គ្រចិត្តនេះ យុវជន ច្រឹក សុខនីម បានឆ្លៀតរកប្រាក់ចំណូលបានខ្លះៗរួចទៅហើយដែលធ្វើជាគ្រូភាសាអង់គ្លេស ព្រោះលោកគឺជាសិស្សពូកែភាសាអង់គ្លេសស្រាប់។ អំឡុងការសិក្សា យុវជនរូបនេះមិនមានប្រាក់ផ្គត់ផ្គង់គ្រប់គ្រាន់ពីម្ដាយ ឪពុក ផ្ញើពីស្រុកកំណើត ដូចកូនមួយចំនួនឡើយ ដោយយ៉ាងច្រើនបានត្រឹម ២០ដុល្លារក្នុង១ខែ។ ដូច្នេះ ចង់មិនចង់ យុវជន ច្រឹក សុខនីម បានឆ្លៀតបង្រៀនគួរភាសាអង់គ្លេស ធ្វើការងារស្ម័គ្រចិត្ត និងបានការងារដំបូងនៅក្រុមហ៊ុនកាល់តិច បន្ទាប់មកបានធ្វើការនៅធនាគារ អេអិនហ្សិតរ៉ូយ៉ាល់ ។

នៅឆ្នាំ២០០៨-២០១៤ លោកបានចូលបម្រើការងារនៅ Vtrust property ជាបុគ្គលិកលក់គម្រោង ដីឡូត៍ ដោយសារការងារល្អ ២ឆ្នំាក្រោយមកបានតួនាទី ជាអនុប្រធាននៅ Vtrust Property។

នៅឆ្នាំ ២០១៥ លោកបានសម្រេចលាឈប់ពីតំណែងអនុប្រធានខាងលើ បានបើកក្រុមហ៊ុនមួយឈ្មោះថា Century 21 Mekong មកដល់ពេលបច្ចុប្បន្ន។ ក្រុមហ៊ុននេះបើកដំបូងដោយមានតែមនុស្ស ៣នាក់ (៣ នាក់ចូលហ៊ុនគ្នា) ដោយបានទិញ Frainchise ពីបរទេស រហូតមកដល់ពេលនេះ មានបុគ្គលិកសរុបជិត ៥០នាក់ហើយ។

បើទោះបីជាជីវិតរីកធំធាត់ឥតឈប់ឈរពីថ្ងៃទៅមួយថ្ងៃរហូតបានក្លាយជា CEO នៅក្រុមហ៊ុនអចលនទ្រព្យ ដែលមានដើមទុនរាប់ម៉ឺនដុល្លារក៏ដោយ ក៏លោកច្រឹក សុខនីម ប្រកាសថា នេះទើបសម្រេចបាន ៣០% ប៉ុណ្ណោះ នៃក្ដីស្រមៃរបស់ខ្លួន។ «សមិទ្ធផលពេលនេះ ខ្ញុំសម្រេចបានត្រឹម ៣០% នៃគោលបំណងព្រោះត្រឹមជាភ្នាក់ងារអចលនទ្រព្យ ខណៈក្ដីស្រមៃរបស់ខ្ញុំ នៅពេលខាងមុខ ខ្ញុំចង់ក្លាយជាក្រុមហ៊ុនទិញលក់ អចលនទ្រព្យធំមួយ នៅប្រទេសកម្ពុជា ខណៈយើងមានភាពចាស់ទុំលើវិស័យនេះរួចទៅហើយ ហើយខ្ញុំបានសាកល្បងរកស៊ីតិចៗ ឃើញថា ជោគជ័យ»។

លោក ច្រឹក សុខនីម ក៏បានឲ្យដឹងដែរថា កត្តាដែលនាំឲ្យជោគជ័យមកដល់សព្វថ្ងៃនេះ មិនមែនជារឿងចៃដន្យនោះទេ អ្វីៗកើតឡើងដោយការខិតខំប្រឹងប្រែងពីមួយដំណាក់កាលទៅមួយដំណាក់កាល ដោយចាប់ផ្ដើមប្រឹងប្រែងរៀនសូត្រ ធ្វើការងារច្រើន ពីអ្នកស្ម័គ្រចិត្ត មកជាបុគ្គលិក និងឈានមកជាអ្នកគ្រប់គ្រងសព្វថ្ងៃ។ «កត្តាជំរុញឲ្យខ្ញុំជោគជ័យ គឺមកពីខ្ញុំដើរធ្វើការច្រើន ហើយខ្ញុំរៀនបន្ថែមរហូត ជាពិសេសខ្ញុំចូលចិត្តអានសៀវភៅបែបគ្រប់គ្រង ជំនួញ និង សៀវភៅពាក់ព័ន្ធនឹងវិស័យអចលនទ្រព្យ។»

អត្ថបទ៖ ប៊ិន ប៊ុណ្ណា