- 2018-01-23 04:41:26
- សេដ្ឋកិច្ច
បើមានប្រាក់ខែ៥០០ដុល្លារ ចាយតាមក្បាច់ទាំង៦នេះ ធានាថាសល់កប់ក្ដោង
- 2018-01-23 04:41:26
- ចំនួនមតិ 0 | ចំនួនចែករំលែក 0
បើមានប្រាក់ខែ៥០០ដុល្លារ ចាយតាមក្បាច់ទាំង៦នេះ ធានាថាសល់កប់ក្ដោង
ចន្លោះមិនឃើញ
ប្រាក់ខែ ៥០០ដុល្លារ ក្នុងប្រទេសកម្ពុជាអាចនិយាយថា ល្មមសមរម្យជាមួយការចំណាយ ហើយក៏អាចបែងចែកបានច្រើនល្មមគួរសមដែរ។ ថ្ងៃនេះ Sabay សូមប្រាប់ពីគន្លឹះចាយលុយដ៏ល្អបំផុត សម្រាប់អ្នកមានប្រាក់ខែ ៥០០ដុល្លារ។
១. បង្កើតកុងធនាគារយ៉ាងតិចឲ្យបានពីរ
ប្រាក់ខែ ៥០០ដុល្លារអាចនិយាយបានថា គួរសមល្មមអាចដកសន្សំបានខ្លះ ហើយមិនគួរទុកក្នុងកុងធនាគារតែមួយនោះទេ។ ត្រូវដឹងថា កាលណាលុយប្រាក់ខែទុកក្នុងកុងតែមួយ មិនយូរនឹងឆាប់ប្រាកដជាដកខ្សុយៗ គ្មានគិតច្រើននោះទេ។ គន្លឹះដ៏ល្អបំផុតប្រសិនបើចង់សល់លុយ ត្រូវដកលុយពាក់កណ្ដាលឬស្មើ ២៥០ដុល្លារទៅដាក់សន្សំក្នុងកុងថ្មីមួយទៀត ហើយហាមប៉ះពាល់ដាច់ខាត។ ចំណែកពាក់កណ្ដាលទៀតទុកក្នុងកុងចាស់ សម្រាប់ការចាយវាយប្រចាំថ្ងៃ និងទុកសន្សំខ្លះដែរ។
បើធ្វើបែបនេះបាន ទោះចាយលុយអស់ក្នុងកុងសម្រាប់ចាយវាយប្រចាំថ្ងៃ តែយ៉ាងហោចណាស់ក៏មានកុងមួយទៀតដែរ មិនមែនដូចរាល់ដងតែអស់ពីកុងហើយ គឺអស់ហ្មត់គ្មានសល់។
២. កុំទម្លាប់ដកលុយច្រើនៗដាក់ក្នុងកាបូប
កុំរៀនទម្លាប់ដាក់លុយទាំងរយដុល្លារក្នុងកាបូប កុំទម្លាប់ធ្វើខ្លួនហ៊ឺហាដូចអ្នកមាន។ ទម្លាប់ដ៏ប្រសើរបំផុតគួរសាគួរ៥០ដុល្លារបានហើយក្នុងកាបូប។ ទម្លាប់ដ៏អាក្រក់មួយរបស់មនុស្ស កាលណាមានលុយច្រើនក្នុងដៃដកចាយផុយៗតែម្ដង និងតែងយកលេសមួយថា «លុយពិបាករកសឹងអី ចាយឲ្យសប្បាយចិត្តខ្លះ វាគ្មានអីទាស់ខុសទេ»។ វិធីសាស្ត្រដ៏ល្អនោះ គឺសារ៉េសារ៉ងយ៉ាងម៉េចចាយលុយ ៥០ដុល្លារនោះ យ៉ាងតិចណាស់ក៏បាន១០ថ្ងៃដែរ។
ដូច្នេះសរុបមួយខែអាចចាយអស់ត្រឹម ១៥០ដុល្លារ បូកជាមួយថ្លៃផ្ទះថាអស់ ៥០ដុល្លារទៀត ថាអស់២០០ដុល្លារជាងចុះ។ ដូចនេះបើប្រាក់ខែ ៥០០ដុល្លារ យ៉ាងហោចណាស់ក៏សល់ ៣០០ដុល្លារដែរ។
៣. រៀនប្រកែកខ្លះៗទៅរឿងផឹកស៊ីជុំមិត្តភក្ដិ
ជឿអត់? បើទោះជាប្រាក់ខែខ្ទង់ពាន់ដុល្លារក៏ដោយ កុំថាឡើយត្រឹម ៥០០ដុល្លារ បើឧស្សាហ៍ជួបជុំលិច កើត ជើង ត្បូងរាល់ថ្ងៃកុំសង្ឃឹមសល់លុយឲ្យសោះ មានតែខ្ចីគេថែមផង។ ដូចពាក្យចាស់តែងពោលថា «ថោកអីហ្នឹងដៃ ថ្លៃអីហ្នឹងមាត់» រៀនប្រកែក រៀនដោះសាខ្លះទៅ ហើយក៏គ្មាននរណាហ៊ានទៅអូសយើងដល់ផ្ទះដែរ។
៤. កុំទម្លាប់ទិញសម្ភារៈនិយមដោយបង់រំលស់
រឿងចង់បានរបស់ទំនើបប្រើ ដូចជាម៉ូតូ ទូរសព្ទដៃ ទាំងមិនទាន់មានលុយគ្រប់ហើយទៅបង់រំលស់ក៏ជាការបង្កើតបំណុលឲ្យខ្លួនឯងដែរ។ ការបង្កើតបំណុល នឹងបន្ថែមដល់ការចំណាយប្រចាំខែរបស់ខ្លួនក្នុងចំណោមការចំណាយជាច្រើនដូចជា ថ្លៃទឹកភ្លើង ថ្លៃផ្ទះ ថ្លៃហូបចុក ចាក់សាំង។ ដូច្នេះទូទាត់ទៅមួយខែៗអស់លុយរលីង។ជម្រើសល្អបំផុត គួរចែកលុយមួយកញ្ចប់តូចដាក់កូនជ្រូកសម្រាប់សន្សំទិញរបស់ ដោយមិនចាំបាច់ធ្វើកូនបំណុលគេ ហើយថែមទាំងសប្បាយចិត្តទៀត។
៥. គៀងគរលុយកាក់ក្រៅផ្លូវការចូលកូនជ្រូក
មកដល់ចំណុចនេះ គឺអាចត្រូវរឿងមនុស្សភាគច្រើន ឲ្យតែពេលបានលុយធីប ឫលុយក្រៅផ្លូវការផ្សេងៗច្រើនយកទៅចាយព្រូសៗ គ្មានទុកទេ ព្រោះគិតថាមិនមែនលុយប្រាក់ខែ។ ប៉ុន្តែបើគំនិតអ្នកមានវិញ ឲ្យតែលុយមិនថា មកពីប្រភពណាគេអាចសន្សំបានទាំងអស់ហ្នឹង។ គួររៀនទុកដាក់លុយកាក់ឲ្យបានត្រឹមត្រូវ មិនថាលុយនោះបានមកពីណាក៏ដោយ កុំទម្លាប់ចាយបង្ហូរដូចទឹក។
៦. ដាក់គោលដៅម្ដងមួយជំហ៊ានៗ
កាលណាមានប្រាក់ខែច្រើនហើយ គួរចាប់ផ្ដើមដាក់គោលដៅ បើគិតតែសន្សំៗគ្មានប្រើការអីក៏មិនសូវទទួលបានផលដែរ។ ប្រាក់សន្សំជំហ៊ានដំបូងតើគិតយកទៅធ្វើអី ចង់បានម៉ូតូទំនើប? កូនឡានមួយ? ហើយជំហ៊ានបន្ទាប់ទៀតចង់បានអី ចង់ទៅចូលហ៊ុនរកស៊ី? ចង់ទិញដីបង់រំលស់? សំណួរទាំងនេះសុទ្ធតែត្រូវសួរខ្លួនឯងទាំងអស់ បើសិនចង់ក្លាយជាអ្នកចាយលុយដ៏ពូកែម្នាក់៕
