រឿងរ៉ាវ១០យ៉ាង សាមញ្ញសម្រាប់កូរ៉េខាងត្បូង តែគួរឲ្យភ្ញាក់ផ្អើលចំពោះពិភពលោក

2018-08-02 03:01:35
ព័ត៌មាន

2018-08-02 03:01:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងត្បូង គឺជាប្រទេសមួយដែលពោរពេញដោយបច្ចេកវិទ្យាទំនើប និងប្រពៃណីអាស៊ីចាស់ៗ រួមបញ្ចូលគ្នាយ៉ាងល្អប្រសើរ។

ខាងក្រោមនេះគឺជារឿងរ៉ាវ ១០យ៉ាង សាមញ្ញបំផុតសម្រាប់កូរ៉េខាងត្បូង តែគួរឲ្យភ្ញាក់ផ្អើលចំពោះពិភពលោកទាំងមូល៖

#១ ការជួយរបស់រដ្ឋាភិបាលដល់ស្ត្រីមានផ្ទៃពោះ

ស្ត្រីមានផ្ទៃពោះទាំងអស់នៅក្នុងប្រទេសកូរ៉េខាងត្បូង ទទួលបានកាតឥណទានពិសេសពីរដ្ឋាភិបាល។ កាតនេះមានទឹកប្រាក់ ៥០០ដុល្លារ។ ពួកគេអាចចំណាយប្រាក់នេះ លើការព្យាបាលផ្នែកវេជ្ជសាស្ត្រ និងឱសថចាំបាច់ទាំងអស់។ ដូចគ្នានេះដែរ ពួកគេអាចទទួលបានសេវាកម្មដឹកជញ្ជូនសាធារណៈដ៏មានផាសុកភាព។ កន្លែងអង្គុយសម្រាប់ស្ត្រីមានផ្ទៃពោះនៅលើរថភ្លើងក្រោមដី ត្រូវបានសម្គាល់ដោយពណ៌ផ្កាឈូក។ លើសពីនេះទៅទៀត មានកន្លែងចតរថយន្តពិសេសសម្រាប់ស្ត្រីមានផ្ទៃពោះទៀតផង។

#២ ស្ទើរតែគ្រប់ចំណតឡានក្រុង មានផ្ទាំងព័ត៌មានមួយ ដែលបង្ហាញតារាងពេលវេលារថយន្តជាក់ស្ដែងនៅលើវា

ឡានក្រុងទាំងអស់នៅទីនោះគឺ ថ្មី និងបំពាក់ដោយម៉ាស៊ីនត្រជាក់។ អ្នកបើកបរពាក់ឯកសណ្ឋានជាមួយស្រោមដៃពណ៌ស និងវ៉ែនតា។ ឡានក្រុងដំណើរការ ២៤ម៉ោងក្នុងមួយសប្តាហ៍ ។

#៣ វាជារឿងធម្មតាក្នុងការភ្លក់អាហារនៅផ្សារទំនើប

នៅក្នុងផ្សារទំនើបភាគច្រើននៃប្រទេសកូរ៉េខាងត្បូង អាហារគ្មានកំណត់ត្រូវបានដាក់សម្រាប់ភ្លក់។ គ្មាននរណាម្នាក់គ្រប់គ្រងថា តើអតិថិជនអាចភ្លក់អាហារបានប៉ុន្មាន មុនពេលទិញ ឬមិនទិញឡើយ។

#៤ ជនជាតិកូរ៉េ ចូលចិត្តជូន និងទទួលអំណោយដែលស្រួលប្រើ

អំណោយប្រពៃណីសម្រាប់ការជប់លៀងនៅផ្ទះ គឺជាក្រដាសអនាម័យសម្រាប់ប្រើក្នុងបន្ទប់ទឹក។ ជនជាតិកូរ៉េជឿថា ប្រវែងនៃក្រដាស តំណាងឲ្យការរស់នៅកាន់តែយូរ។ ជនជាតិកូរ៉េ ពិតជាចូលចិត្តអំណោយដែលស្រួលប្រើ ជាពិសេសរបស់ដែលអាចបរិភោគបាន។

#៥ សិស្សសាលាមត្ដេយ្យនីមួយៗ ប្រើឯកសណ្ឋានដែលមានពណ៌ច្បាស់លាស់ ដើម្បីកុំឲ្យវង្វេងនៅក្នុងហ្វូងមនុស្ស ក្នុងអំឡុងពេលដើរលេងនៅក្នុងទីក្រុង។

#៦ ពួកគេមិនបរិភោគសាច់ឆ្កែឡើយ

មនុស្សជំនាន់ក្រោយស្ទើរតែទាំងអស់ មិនដែលសាកល្បងសាច់ឆ្កែទេ។ ម្ហូបកូរ៉េសម័យទំនើប មានសុខភាពល្អណាស់។ ជាធម្មតា ពួកគេបរិភោគសាច់អាំង (គ្មានប្រេង) បន្លែ និងរុក្ខជាតិជាច្រើន និង បាយ។ ទោះជាយ៉ាងណា ជនជាតិកូរ៉េក៏ចូលចិត្តកាហ្វេដែរ។

#៧ សិស្សវិទ្យាល័យសិក្សារហូតដល់ពាក់កណ្តាលអាធ្រាត្រ

កុមារកូរ៉េខាងត្បូង ត្រូវរៀនច្រើនណាស់។ សិស្សបឋមសិក្សាត្រូវរៀនពីម៉ោង ៩ ព្រឹក រហូតដល់ម៉ោង ៦ ល្ងាច។ សិស្សអនុវិទ្យាល័យ ត្រឡប់មកផ្ទះវិញនៅម៉ោង ១០ យប់។ ចំណែកឯសិស្សវិទ្យាល័យ ពេលខ្លះត្រូវរៀនរហូតដល់ម៉ោង ១រំលងអាធ្រាត្រ។ បណ្ណាល័យសាលាបើក ២៤ម៉ោងក្នុងមួយសប្តាហ៍។

#៨ គូស្នេហ៍ចូលចិត្តសំលៀកបំពាក់ស្រដៀងគ្នា (ឈុតគូស្នេហ៍)

គូស្នេហ៍ជនជាតិកូរ៉េខាងត្បូងនីមួយៗ ដែលកំពុងស្រលាញ់គ្នា អាចឲ្យអ្នកផ្សេងទៀតនៅក្បែរខ្លួន ដឹងថាពួកគេនៅជាមួយគ្នា តាមរយៈការស្លៀកសំលៀកបំពាក់ស្រដៀងគ្នា។ សំលៀកបំពាក់ និងស្បែកជើងសម្រាប់គូស្នេហ៍ជាច្រើន ត្រូវបានដាក់លក់សម្រាប់យុវវ័យ និងមនុស្សវ័យផ្សេងទៀតដែលមានស្នេហា។

#៩ ការដឹងគុណដ៏ល្អបំផុតចំពោះគ្រូបង្រៀន គឺការជូនកាហ្វេ ឬស្ករគ្រាប់

អំណោយដ៏ធំសម្រាប់គ្រូបង្រៀន ឬមន្ត្រីសាធារណៈ ត្រូវបានចាត់ទុកថាជាសំណូក។ ឪពុកម្ដាយ និងកូនៗ ដែលចង់បង្ហាញពីការដឹងគុណដល់គ្រូបង្រៀន តែងតែជូននូវស្ករគ្រាប់ ឬកាហ្វេជាដើម។

#១០ មិនសូវសម្បូរធុងសំរាម តែសម្បូរបង្គន់សាធារណៈ

នៅទីនោះមិនសូវមានធុងសំរាមឡើយ ដោយសារតែជនជាតិកូរ៉េខាងត្បូង មានសណ្ដាប់ធ្នាប់ល្អណាស់។ ផ្ទុយទៅវិញ នៅទីនោះសម្បូរទៅដោយបង្គន់សាធារណៈ នៅតាមស្ថានីយរថភ្លើងក្រោមដី និងតាមឧទ្យាននីមួយៗ។ បង្គន់អនាម័យនៅទីនោះ គឺស្អាតខ្លាំងណាស់ ហើយបែងចែកដាច់ដោយឡែកពីគ្នា សម្រាប់មនុស្សប្រុស , ជនពិការ និង មនុស្សស្រី។ នៅក្នុងបន្ទប់ទឹកសម្រាប់មនុស្សស្រី មានតុពិសេសសម្រាប់ផ្លាស់ប្ដូរកន្ទបកូនក្មេងទៀតផង៕