- 2019-07-30 02:17:30
- ព័ត៌មាន
ការវះកាត់បេះដូង នៅមន្ទីរពេទ្យគន្ធបុប្ផាភ្នំពេញ នឹងបើកដំណើរលើកដំបូង នៅដើមខែក្រោយនេះ
- 2019-07-30 02:17:30
- ចំនួនមតិ 0 | ចំនួនចែករំលែក 0
ការវះកាត់បេះដូង នៅមន្ទីរពេទ្យគន្ធបុប្ផាភ្នំពេញ នឹងបើកដំណើរលើកដំបូង នៅដើមខែក្រោយនេះ
ចន្លោះមិនឃើញ
អគារវះកាត់បេះដូង នៃមន្ទីរពេទ្យគន្ធបុប្ផាភ្នំពេញនឹងបើកសម្ពោធដាក់ឱ្យដំណើរការលើកដំបូងនៅថ្ងៃទី១ ខែសីហា ឆ្នាំ២០១៩ ខាងមុខនេះ ក្រោមព្រះរាជវត្តមានដ៏ខ្ពង់ខ្ពស់បំផុត ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រ។ នេះបើតាមប្រសាសន៍លោកវេជ្ជបណ្ឌិត គី សន្ទី ប្រធានមន្ទីរពេទ្យគន្ធបុប្ផាភ្នំពេញបានថ្លែងប្រាប់ Sabay ។
លោកវេជ្ជបណ្ឌិតបានបន្ថែមថា អគារវះកាត់បេះដូងនេះសាងសង់ឡើង លើដីអតីតមន្ទីរពេទ្យគន្ធបុប្ផាទី១ ជិតវត្តភ្នំ មានទទឹងប្រហែល ៤០ម៉ែត្រគុណ ៥០ម៉ែត្រ កម្ពស់៣ ជាន់ ក្នុងទិសដៅជួយសង្គ្រោះដល់អាយុជីវិតកុមារមកពីគ្រប់ទិសទី ដែលមានបញ្ហាបេះដូង និងប្រព័ន្ធប្រសាទ។ អាគារថ្មីនេះ មានបន្ទប់ ចំនួន៦ និងអាចដាក់គ្រែបានចំនួន ២០០កន្លែង។ ការវះកាត់បេះដូង និងប្រព័ន្ធប្រសាទបានដំណើរការជិត ១០ឆ្នាំមកហើយ នៅមន្ទីរពេទ្យជ័យវរ្ម័នទី៧។ ប៉ុន្តែដោយសារតម្រូវការមានការកើនឡើង ទើបមូលនិធិគន្ធបុប្ផាស្វីសសម្រេចបង្កើតទីតាំងបន្ថែមមួយទៀតនៅភ្នំពេញ ដោយចំណាយថវិកាអស់ប្រមាណ ៨ លានដុល្លារអាមេរិក។
ថវិកាទាំងអស់បានមកពីមូលនិធិគន្ធបុប្ផាស្វីស មូលនិធិគន្ធបុប្ផាកម្ពុជា និងបានមកពីព្រះរាជទាន១លានដុល្លារអាមេរិកពីព្រះមហាក្សត្រកម្ពុជា និងសម្ដេចម៉ែ។ "អញ្ចឹងយើងមានពីរកន្លែងគួបគ្នា គឺមន្ទីរពេទ្យគន្ធបុប្ផាភ្នំពេញ និងនៅមន្ទីរពេទ្យជ័យវរ្ម័នទី៧ ខេត្តសៀមរាប ដើម្បីជួយសង្គ្រោះអាយុជីវិតកុមារ ព្រោះថា កន្លងមកដូចថា ទារកខ្លះកើតមកភ្លាមមានបញ្ហាប្រហោងបេះដូង អញ្ចឹងយើងចាំចាច់ត្រូវបញ្ជូនតាមឡាន ព្យាបាលនៅសៀមរាប ប៉ុន្តែចាប់ពីខែក្រោយទៅមិនចាំបាច់បញ្ជូនទៅសៀមរាបទៀតទេ គឺធ្វើការវះកាត់នៅភ្នំពេញតែម្ដង។អញ្ចឹងក្នុងមួយឆ្នាំៗយើងមានរាប់ពាន់ដែលត្រូវវះកាត់ បើរង់ចាំយូរធ្វើឱ្យកុមារកាន់តែធំ បេះដូងកាន់តែរីក សរសៃឈាមសួតកាន់តែក្រិន នោះយើងវះកាត់លែងកើតហើយ”។
លោកវេជ្ជបណ្ឌិតបានបន្ថែមថា អគារថ្មីនេះក៏មានការវះកាត់ប្រព័ន្ធប្រាសាទ វះកាត់ផ្នែកឆ្អឹង និងការសង្គ្រោះបន្ទាន់ទារក និងអាចមានបើកផ្នែកផ្សេងបន្ថែមទៀតទៅថ្ងៃខាងមុន ប៉ុន្តែជាជំហានដំបូងគឺ វះកាត់បេះដូងកុមារ ដោយមានក្រុមគ្រូពេទ្យឯកទេសមកជួយបង្រៀនពីខេត្តសៀមរាប ខណៈការវះកាត់គឺអាចវះបានកុមារម្នាក់ ក្នុងមួយថ្ងៃ។ "អញ្ចឹងការវះកាត់ដំបូងគឺយើងចាប់ផ្តើមដំបូងមួយថ្ងៃមួយ ព្រោះថា ការវះកាត់បេះដូងមានលក្ខណៈស្មុគស្មាញណាស់មិនដូចការវះកាត់ផ្នែកផ្សេងឡើយ”។
មន្ទីរពេទ្យគន្ធបុប្ផា ខេត្តសៀមរាប បានដំណើរការជិត ១០ ឆ្នាំមកនោះ កំពុងផ្ដល់សេវាវះកាត់បេះដូង ក្នុងមួយសប្ដាហ៍ វះបានបីនាក់ ដោយវេជ្ជបណ្ឌិតខ្មែរសុទ្ធសាធ និងទទួលបានជោគជ័យច្រើន ដោយសារក្រុមគ្រូពេទ្យបានទទួលការបណ្ដុះបណ្ដាលត្រឹមត្រូវ និងមានសមត្ថភាពអាចវះកាត់បានកាន់តែប្រសើរជាងមុន។ នេះបើតាមប្រសាសន៍លោកវេជ្ជបណ្ឌិត គី សន្ទី ។ មន្ទីរពេទ្យ គន្ធបុប្ផា មានវត្តមាននៅអំឡុងទសវត្សឆ្នាំ ១៩៧០ ហើយត្រូវបានបិទទ្វារទៅវិញនៅ ពេលខ្មែរក្រហមឡើងកាន់អំណាច និង បានចាប់ដំណើរការឡើងវិញនៅឆ្នាំ នាំ ១៩៩២ ក្រោមព្រះ រាជ្យតម្រិះរបស់ព្រះបរមរតនកោដ្ឋ ព្រះបាទសម្ដេច ព្រះនរោត្ដម សីហនុ អតីតព្រះមហាក្សត្រខ្មែរ និងលោកវេជ្ជបណ្ឌិត Beat Richner ជនជាតិស្វីសជាស្ថាបនិក៕
