- 2018-02-12 02:37:23
- ព័ត៌មាន
ទម្រាំបានផ្កាអង្គាសីលមកលក់ម្តងៗ ត្រូវចូលព្រៃមិនចេះជិត
- 2018-02-12 02:37:23
- ចំនួនមតិ 0 | ចំនួនចែករំលែក 0
ទម្រាំបានផ្កាអង្គាសីលមកលក់ម្តងៗ ត្រូវចូលព្រៃមិនចេះជិត
ចន្លោះមិនឃើញ
ប្រជាពលរដ្ឋមួយចំនួនដែលប្រកបរបរលក់ដើមផ្កាអង្គាសីលមុនថ្ងៃចូលឆ្នាំចិនលើកឡើងថាបច្ចុប្បន្នមិនងាយរកបានទេដោយថាតំបន់ដែលធ្លាប់មានផ្កាប្រភេទនេះបានក្លាយជាដីចម្ការ និងម្យ៉ាងត្រូវរើសរកដើមណាដែលអាចចេញផ្កាច្រើនផង។
អ្នកស្រី ចាន់ ស្រីមួយ រស់នៅស្រុកឈូក ខេត្តកំពត ដែលបានប្រកបបរបរលក់ដើមផ្កាអង្គាសីល លើកឡើងថាអ្នកស្រី និងសមាជិកគ្រូួសារផ្សេងទៀតតែងចូលព្រៃនៅតំបន់ភ្នំជិតៗផ្ទះដើម្បីកាត់ដើមផ្កាយកមកលក់មុនថ្ងៃចូលឆ្នាំចិនចូលមកដល់។
អ្នកស្រីបន្តថាទម្រាំដល់ថ្ងៃចូលឆ្នាំចិនអ្នកស្រីអាចទៅរកដើមផ្កាអង្គាសីលមកលក់បានពីប្រាំទៅប្រាំមួយដង។ អ្នកស្រីឲ្យដឹងទៀតថាឆ្នាំនេះកាន់តែពិបាកជាងឆ្នាំមុនៗក្នុងការរកដើមផ្កាអង្គាសីលដោយថាត្រូវចូលទៅកាន់ព្រៃភ្នំជ្រៅជាងមុន ដែលមានចំងាយកាន់តែឆ្ងាយ រហូតដល់២០គីឡូម៉ែត្រពីភូមិ។
អ្នកស្រីបន្ថែមថាៈ «ពេលទៅដល់ក៏មិនមែនកាប់យកៗដែរ ត្រូវដើររកដើមណាដែលមានចេញផ្កាទើបកាប់យក...មិនស្រួលកាប់ទេកាលមុនសម្បូរ តែឥឡូវ ដើរប៉ះ១០ ដើមមិនទាន់កាប់បានមួយដើមផង ឥឡូវដីគេវាតដាំដំណាំចង់អស់ហើយ ចូលព្រៃជ្រៅ»។
ដើម្បីបានផ្កាអង្គាសីលមកលក់ អ្នកស្រីថា ត្រូវចំណាយពេលជិតមួយថ្ងៃគឺ ចេញពីផ្ទះនៅពេលព្រលឹមនិងត្រឡប់វិញនៅពេលរសៀល ហើយថាក្នុងមួយជើងអាចលក់បានប្រាក់ចន្លោះពី៦ម៉ឺន ទៅ៧ម៉ឺនប៉ុណ្ណោះ។
ពលរដ្ឋខ្មែរជាប់សែស្រឡាយចិនម្នាក់ អ្នកស្រី ស៊ីវ ចេង មានប្រសាសន៍ថាមុនថ្ងៃបុណ្យចូលឆ្នាំចិនចូលមកដល់ពលរដ្ឋខ្មែរជាប់សែស្រឡាយចិនទិញដើមផ្កាអង្គាសីលដាក់ផ្ទះ ដោយមានជំនឿថា បើកាលណាផ្កាអង្គាសីលចេញផ្កាល្អក្នុងថ្ងៃចូលឆ្នាំនឹងអាចរកស៊ីមានបាន តែបើមិនចេញផ្កាទេ អាចជាប្រផ្នូលថា រាសីធ្លាក់ចុះ។
ត្រង់ចំណុចនេះហើយ អ្នកលក់ផ្កាអង្គាសីលដូចជាអ្នកស្រី ចាន់ ស្រីមួយ ចាត់ទុកថាការដើរកាប់ផ្កាអង្គាសីលពិបាកមួយកម្រិតទៀត។ មិនត្រឹមតែពិបាករកទេ តែថាត្រូវរកដើមផ្កាណាដែលមានស្នាមពកៗច្រើន ដែលមានន័យថាអាចនឹងមានផ្កាចេញច្រើន៕
