- 2018-02-15 07:12:17
- សេដ្ឋកិច្ច
មកដឹងពីតម្រូវការសាច់មាន់ និងជ្រូក ក្នុងឱកាសបុណ្យចូលឆ្នាំចិន មានប៉ុន្មានដែរ?
- 2018-02-15 07:12:17
- ចំនួនមតិ 0 | ចំនួនចែករំលែក 0
មកដឹងពីតម្រូវការសាច់មាន់ និងជ្រូក ក្នុងឱកាសបុណ្យចូលឆ្នាំចិន មានប៉ុន្មានដែរ?
ចន្លោះមិនឃើញ
ការប៉ាន់ប្រមាណមួយបានឱ្យដឹងថា តម្រូវការសាច់មាន់ និងសាច់ជ្រូកក្នុងឱកាសបុណ្យចូលឆ្នាំចិន-វៀតណាមនៅរាជធានីភ្នំពេញអាចអាចមាននិន្នាការកើនឡើងរង្វង់ជាង ៣០%។ ការកើនឡើងនេះ ដោយសារតែប្រជាពលរដ្ឋខ្មែរ ដែលមានសែស្រឡាយកាត់ចិនត្រូវចំអិនម្ហូបអាហារសែនដូនតា ខណៈប្រាក់ចំណូលប្រជាពលរដ្ឋមានខ្ពស់ជាងមុន។
លោក សេន សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទបានថ្លែងថា ថ្ងៃធម្មតាតម្រូវការផ្គត់ផ្គង់មាន់នៅរាជធានីភ្នំពេញមានប្រមាណ១០ម៉ឺនក្បាល ជ្រូកចន្លោះពី ១ ៨០០ក្បាល ទៅជាង ២ ០០០ក្បាល។ ដូច្នេះតម្រូវការអាចមានកំណើនរង្វង់ជាង ៣០% ខណៈប្រជាពលរដ្ឋនៅរាជធានីភ្នំពេញភាគច្រើននឹងរៀបចំពិធីសែនចូលឆ្នាំចិន។
«ខ្ញុំមិនអាចបញ្ជាក់ឱ្យលំអិតជាងនេះទេ ដោយសារយើងអត់បានធ្វើសន្ទស្សន៍ពីឆ្នាំទៅ គ្រាន់តែប៉ាន់ប្រមាណថាអាចមានការកើនឡើងរង្វង់ជាង៣០% ព្រោះអ្នកនៅភ្នំពេញភាគច្រើនបានរៀបចំពិធីសែនចូលឆ្នាំចិន»។
លោកបានឱ្យដឹងថា ផលិតកម្មសត្វជ្រូកនៅក្នុងប្រទេសសព្វថ្ងៃមិនអាចបំពេញតម្រូវការអ្នកទិញនោះទេ ដែលនេះទាមទារ ឱ្យមានការនាំចូលពីបណ្តាប្រទេសជិតខាង។ លើសពីនេះបើទោះបីមានការនាំចូល ប៉ុន្តែការពិនិត្យលើគុណភាពសាច់ គឺត្រូវបានអនុវត្តយ៉ាងត្រឹមត្រូវ និងម៉ត់ចត់តាមគោលការណ៍របស់រាជរដ្ឋាភិបាល ក្នុងការធានាសុវត្ថិភាពជូនប្រជាពលរដ្ឋ។
របាយការណ៍របស់អគ្គនាយកដ្ឋានសុខភាពសត្វ និងផលិតកម្មសត្វនាឆ្នាំ ២០១៧ផលិតកម្មសាច់ជ្រូកមាន ជាង ៣លានក្បាល ដោយក្នុងនោះដែរផលិតកម្មក្នុងស្រុកបានប្រមាណជាង២លានក្បាល។ តម្រូវការសាច់នៅកម្ពុជាត្រូវបានប៉ាន់ស្មានថា ប្រហែល៣សែនតោន ក្នុងមួយឆ្នាំនេះ រហូតដល់ឆ្នាំ ២០២០។ នេះបើតាមលោក វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់និងនេសាទបានថ្លែងនៅវេទិកាស្តីពីកសិកម្មរុក្ខាប្រមាញ់និងនេសាទកាលពីពេលថ្មីៗនេះ។
ទោះយ៉ាងណាក៏ដោយ លោករដ្ឋមន្រ្តីបានបន្ថែមថា ស្ថានភាព នេះបញ្ជាក់យ៉ាងច្បាស់ថា តម្រូវការសាច់សត្វ មានគុណភាពខ្ពស់ បាននិងកំពុងជំរុញឲ្យមានការផ្លាស់ប្ដូរ បែបផែនផលិតកម្មសត្វ ពីការចិញ្ចឹមសម្រាប់ម្ហូបអាហារគ្រួសារ ទៅជាផលិតកម្មសម្រាប់ពាណិជ្ជកម្មតាមតម្រូវទីផ្សារវិញ។
ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា កំណើនប្រាក់ចំណូលប្រចាំឆ្នាំជាមធ្យម សម្រាប់ពលរដ្ឋម្នាក់ក្នុងប្រទេសកម្ពុជាកើនពី ៧៦០ដុល្លារ ក្នុងឆ្នាំ ២០០៨ ដល់ជាង ១ ៤០០ដុល្លារ អាមេរិកក្នុងឆ្នាំ ២០១៧ ដែលធ្វើឲ្យកម្ពុជាបានឆ្លងផុតពីចំណាត់ថ្នាក់ជាប្រទេសចំណូលទាបក្លាយជាប្រទេសមានចំណូលមធ្យមកម្រិតទាប ហើយកំពុងខិតខំសម្រេចឲ្យបាននូវ ទស្សនវិស័យធំៗ នៃការអភិវឌ្ឍបន្តទៀត៕
