សំខាន់! ជាប្រទេសប្រើប្លាស្ទិកច្រើនបំផុតមួយលើលោក កម្ពុជា អាចនឹងហាមឃាត់ប្រើប្រាស់ប្លាស្ទិកនៅតំបន់អង្គរ

2018-06-30 09:56:16
ព័ត៌មាន

2018-06-30 09:56:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ការហាមឃាត់នាពេលអនាគតលើសំណល់ប្លាស្ទិកនៅតំបន់អង្គរដ៏ល្បីល្បាញបំផុតក្នុងពិភពលោករបស់កម្ពុជា នឹងត្រូវបានពិចារណាដោយអាជ្ញាធរ ហើយនេះ គឺជាការបោះជំហានក្នុងការដោះស្រាយវិបត្តិកាកសំណល់ដ៏ពិបាកបំផុត។ នេះបើតាម Channel News Asia ចុះផ្សាយថ្ងៃនេះ។

សំណល់ជាង៣០តោន ត្រូវបានប្រមូលជារៀងរាល់ថ្ងៃនៅលើផ្ទៃដី ៤០០ គីឡូម៉ែត្រការ៉េនៅតំបន់អង្គរ ឬប្រមាណ៤០០តោនក្នុងខេត្តសៀមរាប។ នេះបើតាម VGREEN ដែលជាក្រុមហ៊ុនប្រមូលសម្រាមនៅអង្គរ និងដកស្រង់ដោយសារព័ត៌មានដ៏ល្បីរបស់សិង្ហបុរីខាងលើ។

កាកសំណល់ប្លាស្ទិចដែលនៅក្បែរតំបន់ព្រៃជុំវិញប្រាសាទ

កម្ពុជាជាប់ចំណាត់ថ្នាក់ ជាប្រទេសដែលមានអ្នកប្រើប្រាស់ប្លាស្ទិកច្រើនបំផុតមួយលើលោក។ បើយោងតាមសហភាពអឺរ៉ុប ថង់ប្លាស្ទិក ១០ លានតោនត្រូវបានប្រើប្រាស់ជារៀងរាល់ថ្ងៃនៅភ្នំពេញ ហើយ ប្រជាជនកម្ពុជាម្នាក់ ប្រើថង់ប្លាស្ទិកគិតជាមធ្យម ២,០០០ ថង់ក្នុង១ឆ្នាំ។ ប្រភពខាងលើបន្ត។

ទីលានចាក់សំរាមអន្លង់២គ្របដណ្តប់លើផ្ទៃដី ៨ ហិកតានៅក្នុងខេត្តសៀមរាប

នៅក្រុងសៀមរាប មានភ្ញៀវទេសចរកាន់តែច្រើន មានន័យថាសម្រាមមានកាន់តែច្រើនដែរ។ សំណល់ដប ប្រអប់បាយ សំបកវេចខ្ចប់ម្ហូបពីការលំហែ របស់ប្រជាជនកម្ពុជា បានបន្សល់សំណល់ប្លាស្ទិកពាសពេញបរិវេណអង្គរ។

គំនិតនៃការហាមឃាត់ប្លាស្ទិកត្រូវបានគាំទ្រជាគោលការណ៍ដោយ អាជ្ញាធរអប្សរា នាយកដ្ឋានបរិស្ថាន និងអង្គការមិនមែនរដ្ឋាភិបាល។ ប្រភពខាងលើបន្ថែម។

អង្គរវត្តត្រូវបានបោះឆ្នោតដោយ TripAdvisor ជាប់ចំណាត់ថ្នាក់លេខ១ក្នុងបញ្ជីរបស់ពិភពលោកដែលជាតំបន់ទេសចរណ៍ដ៏មានប្រជាប្រិយភាពបំផុតឆ្នាំនេះ។ កាលពីឆ្នាំមុន ភ្ញៀវទេសចរបរទេសច្រើនជាង ២ លាននាក់ បានមកទស្សនាតំបន់នេះ ហើយ៤ខែដើមឆ្នាំ២០១៨នេះ បានកើនឡើង១១% បើធៀបនឹងរយៈពេលដូចគ្នាកាលពីឆ្នាំ២០១៧៕

ប្រភព៖ Channelnewsasia ប្រែសម្រួល៖ សុខ លាងហ៊ត