ជប៉ុនប្រគល់រថយន្ត ៤០គ្រឿង និងហិបឆ្នោតជាងមួយម៉ឺនដល់គ.ជ.ប

2018-07-15 02:00:03
ព័ត៌មាន

2018-07-15 02:00:03
ចំនួនមតិ 0 | ចំនួនចែករំលែក 0

ចន្លោះមិនឃើញ

រាជរដ្ឋាភិបាលជប៉ុនបានប្រគល់ជំនួយជាសម្ភារៈមកឱ្យគណៈកម្មាធិការជាតិរៀបចំការបោះឆ្នោត ឬគ.ជ.ប. សម្រាប់បម្រើឱ្យការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដែលមានទឹកប្រាក់ស្មើនឹងជាងប្រាំពីរលាន ដុល្លារអាមេរិក។ នេះបើតាមសេចក្តីប្រកាសព័ត៌មានរបស់គ.ជ.ប. កាលពីថ្ងៃទី១៤ ខែកក្កដា ឆ្នាំ២០១៨។

សេចក្តីប្រកាសព័ត៌មានបានបញ្ជាក់ថា សម្ភារដែលរាជរដ្ឋាភិបាលជប៉ុនបានប្រគល់ជូនគ.ជ.ប. រួមមាន ហិបឆ្នោត ចំនួន ១១.០០០ ហិប និងរថយន្តប្រភេទភីក អាប់( Pickup )ចំនួន ៤០គ្រឿង។ ជំនួយនេះបានកើតឡើងបន្ទាប់ពីមានការចុះហត្ថលេខាលើអនុស្សរណៈយោគយល់គ្នា ក្នុងទឹកប្រាក់ ៨០០ លានយេន រវាងលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយនឹងលោក ហៃដឺហ៊ីសា ហូរីនូឈី (H.E. Mr. Hiddehisa Horinouchi) ឯកអគ្គរាជទូតជប៉ុនប្រចាំនៅកម្ពុជា កាលពីថ្ងៃទី២១ ខែកុម្ភៈ ឆ្នាំ២០១៨ ។

សូមជម្រាបជូនថា គ.ជ.ប. ក៏មានហិបឆ្នោតចំនួន ១២.០០០ទៀត ជាជំនួយរបស់ជប៉ុនតាំងពីឆ្នាំ១៩៩៨ ដែលកំពុងបន្តប្រើប្រាស់ សម្រាប់ការបោះឆ្នោតនៅថ្ងៃទី២៩ ខែកក្កដាខាងមុខ ។ សម្ភារបរិក្ខារ ដែលជាជំនួយរបស់ជប៉ុន និងសម្ភារបោះឆ្នោតផ្សេងទៀត បាននិងកំពុងបញ្ជូនទៅ គណៈកម្មការឃុំ សង្កាត់រៀបចំការបោះឆ្នោត ហើយនឹងបញ្ជូនបន្តទៅគ្រប់ការិយាល័យបោះឆ្នោតក្នុងរយៈពេល ៣៦ ម៉ោង មុនថ្ងៃបោះឆ្នោត ៕

ប្រភព៖ រស្មីកម្ពុជា ប្រែសម្រួល៖ ស៊ិន សាវ៉េត