គ.ជ.ប បញ្ជាទិញទឹកខ្មៅពីក្រុមហ៊ុនឥណ្ឌា ជាងប្រាំម៉ឺនដបសម្រាប់ការបោះឆ្នោតខាងមុខ

2018-07-17 10:38:52
ព័ត៌មាន

2018-07-17 10:38:52
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៦នេះ គណៈកម្មាធិការជាតិរៀបចំការបោះឆ្នោតបានបញ្ជាទិញទឹកខ្មៅជ្រលក់ដៃជាងប្រាំម៉ឺនដបពីក្រុមហ៊ុនមួយរបស់ឥណ្ឌា ក្នុងតម្លៃជាទឹកប្រាក់ប្រមាណជា៨០ម៉ឺនដុល្លារអាមេរិក។

(មន្ត្រីធ្វើតេស្តគុណភាពទឹកខ្មៅកាលពីព្រឹកមិញ)

ក្នុងសេចក្តីប្រកាសព័ត៌មានមួយចុះផ្សាយនៅថ្ងៃនេះ គ.ជ.ប បានឲ្យដឹងថាខ្លួនបានទិញទឹកខ្មៅចំនួន៥១ ០០០ដប ពីក្រុមហ៊ុនឥណ្ឌាមួយក្នុង ទឹកប្រាក់ប្រមាណជា៨០ម៉ឺនដុល្លារ។

គ.ជ.ប បញ្ជាក់ថាក្រុមហ៊ុន Mysore Paints and Varnish limited នេះបានផលិតទឹកខ្មៅតាំងពីឆ្នាំ១៩៣៨ ដែលផ្តួចផ្តើមផលិតដោយស្តេចនៅប្រទេសឥណ្ឌា ហើយថាការប្រើប្រាស់ទឹកខ្មៅលុបមិនជ្រះនេះក៏មានប្រទេសផ្សេងទៀតប្រើប្រាស់ផងដែរ។

គ.ជ.ប សរសេរទៀតថា៖ «សូមបញ្ជាក់ថា នេះមិនមែនជាលើកទី១ទេ ដែល គ.ជ.ប បានប្រើប្រាស់ទឹកខ្មៅ ជ្រលក់ម្រាមដៃលុបមិនជ្រះដូចគ្នានេះ សម្រាប់បម្រើការបោះឆ្នោត ហើយអ្វីដែលគ.ជ.ប បានសម្រេចប្រើទឹកខ្មៅនេះគឺធ្វើឡើងស្របតាមច្បាប់»៕

អត្ថបទ៖ ទូច សុខា