- 2018-10-31 23:30:00
- ព័ត៌មាន
និស្សិតខ្មែរមួយរូបបង្ហើបខ្ទង់ចំណាយដ៏ខ្ពស់លើការរៀនបើកបរយន្តហោះ
- 2018-10-31 23:30:00
- ចំនួនមតិ 0 | ចំនួនចែករំលែក 0
និស្សិតខ្មែរមួយរូបបង្ហើបខ្ទង់ចំណាយដ៏ខ្ពស់លើការរៀនបើកបរយន្តហោះ
ចន្លោះមិនឃើញ
មានយុវជនខ្មែរមិនច្រើនឡើយ ដែលអាចមានឱកាស បន្តការសិក្សាលើជំនាញបើកបរយន្តហោះ (Pilot) ដោយសារមុខជំនាញនេះមិនចំពោះអ្នកមានសមត្ថភាពមួយមុខទេ តែក៏ទាមទារនូវខ្ទង់ចំណាយរាប់ម៉ឺនដុល្លារទៅលើការសិក្សាដែរ។ ក្នុងវ័យ២៥ ឆ្នាំ ពេញ ញ៉ាវន្ត គឺជានិស្សិតខ្មែរមួយរូប ក្នុងចំណោមគ្នា៤ នាក់ កំពុងបន្តការសិក្សានៅសាលា FAST Aviation Academy ដែលត្រូវគេដឹងថាជាសាលាហ្វឹកហ្វឺនផ្នែកហោះហើរ មានមូលដ្ឋាននៅក្នុងទីក្រុងម៉ានីឡា ប្រទេសហ្វីលីពីន។
ញ៉ាវន្ត ទើបចាកចេញពីកម្ពុជាកាលពីពេលថ្មីៗនេះថា ខ្លួននឹងត្រូវសិក្សានៅប្រទេសហ្វីលីពីនយ៉ាងតិច ១៨ខែ ដោយផ្ដោតទាំងទ្រឹស្ដី និងការអនុវត្តជាក់ស្ដែង។ ការសិក្សាលើទ្រឹស្ដីត្រូវចំណាយពេល ១១១ម៉ោង ការអនុវត្តហោះហើរ ១២០ម៉ោង ហើយចុងក្រោយ គឺប្រលងយកវិញ្ញាបនបត្រ។
មានទីកន្លែងកំណើតនៅរាជធានីភ្នំពេញ និងជាកូនច្បងនៅក្នុងក្រុមគ្រួសារចំណោមបងប្អូនពីរនាក់ ញ៉ាវន្ត ឱ្យដឹងថា ការសម្រេចចិត្តរៀនជំនាញបើកបរយន្ត ព្រោះជាចំណង់ចំណូលចិត្តតាំងពីកុមារភាព និងស្របពេលវិស័យអាកាសចរ នៅក្នុងប្រទេសកម្ពុជាមានការរីកចម្រើន។
មែនទែនទៅ លោកឪពុក ញ៉ាវន្ត ក៏ជាអ្នកបើកបរយន្តហោះ នៅក្រុមហ៊ុនឯកជនមួយដែរ។ ញ៉ាវន្ត បានប្រលងជាប់សញ្ញាបត្រមធ្យមសិក្សាទុតិយភូមិ(បាក់ឌុប) នៅឆ្នាំ២០១១ និងបានចូលរៀននៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច ព្រមទាំងបានចូលបម្រើការងារ នៅអគ្គិសនីកម្ពុជា។ បន្ទាប់ពីបានចូលបម្រើការងារនៅអគ្គិសនីកម្ពុជាបានពីរឆ្នាំ ឪពុក ញ៉ាវន្ត បានសាកសួរជាថ្មី ពីការសិក្សាផ្នែកបើកបរហោះហើរ នៅប្រទេសហ្វីលីពីន។
“ពីមុនប៉ាគាត់ចង់ឱ្យទៅរៀនដែរ ប៉ុន្តែកាលហ្នុង ដោយសារវិស័យអាកាសចរនៅមិនទាន់រីកចម្រើនច្រើន ។ ម្យ៉ាងខ្ញុំនៅក្មេង ភាសាក៏មិនទាន់ល្អ ចង់ធ្វើការងារយកបទពិសោធន៍សិន។ តែបច្ចុប្បន្ននៅខ្មែរមានក្រុមហ៊ុន Airline បើកច្រើនក៏គាត់សម្រេចចិត្តឱ្យចូលរៀនតែម្ដង ដោយមានគ្នាបួននាក់ជាកូនមិត្តភ័ក្ដិគាត់”។ ញ៉ាវន្ត និយាយ។
មុននឹងអាចចូលរៀនវគ្គបើកបរយន្តហោះ ញ៉ាវន្ត ត្រូវធ្វើតេស្តសុខភាព ភាសាអង់គ្លេស និងការសម្ភាសផ្ទាល់ជាមុន។ បន្ទាប់មកត្រូវបង់ថវិកាជាបីដំណាក់កាល សរុបអស់ចំនួន ៦ម៉ឺនដុល្លារ ដោយមិនគិតទៅលើថ្លៃហូបចុក និងស្នាក់នៅទេ។ “អញ្ចឹងដំបូង ដើម្បីបានចូលរៀនខ្ញុំត្រូវបង់ ២ម៉ឺនដុល្លារ បីខែបន្ទាប់ដល់វគ្គហ្វឹកហ្វឺនហោះហើរយើងត្រូវបង់ ២ម៉ឺនដុល្លារ និងចុងក្រោយគឺ ២ម៉ឺនទៀត”។
ញ៉ាវន្ត បានបន្ថែមថា រយៈពេល១៨ខែ សិក្សានៅសាលា FAST Aviation Academy ប្រទេសហ្វីលីពីន និស្សិតមានឈ្មោះត្រឹមជាអ្នកបើកបរឬ (Pilot) មិនទាន់មានសិទ្ធិអាចបើកយន្តហោះធន់ Boeing ឡើយ ពោលគឺអាចបើកបរត្រឹមយន្តហោះខ្នាតតូច (C-152) ប៉ុណ្ណោះ។ លុះត្រាទៅបន្តការសិក្សា រយៈពេលបីខែបន្ថែម ទើបអាចបើកបរយន្តហោះខ្នាតធំបាន។
“អញ្ចឹងប៉ាប្រហែលគាត់ចង់ឱ្យទៅរៀននៅកូរ៉េខាងត្បូង ដោយត្រូវចំណាយប្រហែល ៣ម៉ឺនដុល្លារទៀត។ បីខែហ្នឹងគេហៅថា វគ្គ Type Rating ដោយធ្វើការរើសប្រភេទយន្តហោះដូចជា Airbus ,Boeing ហើយភាគច្រើននៅខ្មែរយើង គេហោះ Airbus 320។ អញ្ចឹងខ្ញុំយកសញ្ញាបត្រខ្ញុំរៀននៅហ្វីលីពីន ទៅ Applies ដាក់ទៅរៀននៅកូរ៉េខាងត្បូងបន្តទៀត ហើយទាល់តែរៀនចប់ និងមានការទទួលស្គាល់ ទើបអាចដាក់ពាក្យធ្វើការងារនៅក្រុមហ៊ុនអាកាសចរណ៍នានាបាន”។
បើទោះជាយូរម្តងគេតែងលេចលឺព័ត៌មានស្តីពីការធ្លាក់យន្តហោះនៅតាមបណ្ដាប្រទេសមួយចំនួន ក្តី ប៉ុន្តែហេតុការណ៍នេះមិនបានធ្វើឱ្យ ញ៉ាវន្ត ដែលនឹងប្រឡូកក្នុងការងារនេះនាពេលអនាគតមានការតក់ស្លុតនោះឡើយ ព្រោះថា នេះគឺជាអាជីពមួយ ស្រលាញ់ពេញតាំងពីតូចមក។
“ប៉ាម៉ាក់ខ្ញុំ គាត់តែងលើកទឹកចិត្ត និងថាបើស្រលាញ់ចូលចិត្តធ្វើទៅ។ ដូច្នេះខ្ញុំដាក់ចិត្តស្រលាញ់ហើយ គឺខ្ញុំមិនគិតអញ្ចឹងទេ។ រឿងគ្រោះធម្មជាតិយើងមើលមិនឃើញទេ ជាក់ស្ដែងកាលពីថ្ងៃច័ន្ទដើមសប្តាហ៍នេះ ពេលខ្ញុំកំពុងរៀន គ្រូខ្ញុំក៏បានប្រាប់ពីការធ្លាក់យន្តហោះនៅឥណ្ឌូនេស៊ី ខ្ញុំអត់មានការភ័យខ្លាចទេ។ ស្រុកយើងខ្ញុំគិតថា អាកាសធាតុល្អ កម្រនឹងកើតមានហេតុការណ៍អញ្ចឹងទេ”។
យុវជន ញ៉ាវន្ត ឱ្យដឹងទៀតថា កម្ពុជាគួរតែមានក្រុមហ៊ុនទីភ្នាក់ងារផ្ដល់ការប្រឹក្សាយោបល់សម្រាប់អ្នកមានធនធាន និងបំណងចង់រៀនជំនាញនេះ ខណៈបច្ចុប្បន្នហាក់មិនទាន់មានក្រុមហ៊ុនប្រភេទនេះនៅឡើយ។ ញ៉ាវន្ត ចង់ឃើញពលរដ្ឋខ្មែរច្រើននាក់បន្ថែម មានសមត្ថភាពអាចបើកបរយន្តហោះនៅក្រុមហ៊ុនអន្តរជាតិធំៗ ព្រោះថា បច្ចុប្បន្នមានខ្មែរ តិចតួចបំផុតបម្រើការងារលើផ្នែកនេះ។
“ខ្ញុំទៅហ្វីលីពីន និងថៃឃើញអ្នកបើកបរយន្តហោះស្ទើរតែ៧០% ទៅ៨០% ជាជនជាតិគេប៉ុន្តែនៅខ្មែរយើងភាគច្រើនបំផុតជាជនបរទេស។ អញ្ចឹងត្រលប់មកវិញនៅខ្មែរបើមានសេវាកម្មដូចនៅហ្វីលីពីនថា បើយើងចង់រៀនសាលាណាមួយគេពន្យល់ណែនាំនិងផ្ដល់ជម្រើស និងរត់ការឱ្យយើងទាំងអស់។ ដូច្នេះខ្ញុំជឿថានៅខ្មែរបើមានក្រុមហ៊ុនណាមួយធ្វើសេវាកម្មហ្នឹងខ្ញុំជឿថា មានកូនខ្មែរជាច្រើនទៀតចង់រៀនច្រើន និងឈានទៅបង្កើនអ្នកបើកបរយន្តហោះនៅកម្ពុជាកាន់តែមានការកើនឡើង”៕
ចុចអាន៖ មកស្គាល់អ្នកបើកយន្តហោះវ័យក្មេងបំផុត ២រូបរបស់កម្ពុជា បញ្ចប់ការហ្វឹកហាត់ត្រឹមវ័យ២០ឆ្នាំ