- 2018-11-01 08:13:43
- ព័ត៌មាន
ចូលរួមទាំងអស់គ្នា! យុទ្ធនាការភ្នំពេញស្អាតឆ្នាំទី២ ចាប់ផ្ដើមពីថ្ងៃនេះហើយ
- 2018-11-01 08:13:43
- ចំនួនមតិ 0 | ចំនួនចែករំលែក 0
ចូលរួមទាំងអស់គ្នា! យុទ្ធនាការភ្នំពេញស្អាតឆ្នាំទី២ ចាប់ផ្ដើមពីថ្ងៃនេះហើយ
ចន្លោះមិនឃើញ
យុទ្ធនាការភ្នំពេញស្អាត បានចាប់កំណើតឡើងកាលខែវិច្ឆិកា ឆ្នាំ២០១៧ នៅពេលនេះបានវិលត្រឡប់មកជាថ្មីម្ដងទៀត សម្រាប់ឆ្នាំទី២ ក្នុងឆ្នាំ២០១៨។ ពិធីបើកយុទ្ធនាការនេះ បានប្រព្រឹត្តិទៅយ៉ាងគគ្រឹកគគ្រេង នៅព្រឹកថ្ងៃទី០១ ខែវិច្ឆិកា ឆ្នាំ២០១៨នេះ ក្រោមវត្តមានគណៈអធិបតីសំខាន់ៗ និងសហស្ថាបនិកគម្រោង ក៏ដូចជាភ្ញៀវជាតិ និងអន្តរជាតិជាច្រើនរូបទៀត។
យុទ្ធនាការភ្នំពេញស្អាត បានធ្វើនៅរៀងរាល់ឆ្នាំ ក្នុងអំឡុងខែវិច្ឆិកា ដែលយុទ្ធនាការនេះ បានប្រសិទ្ធនាមថា «ខែស្អាត»។ ហើយនេះគឺជាឆ្នាំទី២ហើយ នៃយុទ្ធនាការភ្នំពេញស្អាត ដែលនឹងប្រព្រឹត្តិឡើងពេញមួយខែវិច្ឆិកាតែម្ដង ត្រូវបានអនុវត្តដោយស្ម័គ្រចិត្ត ដោយមានការចូលរួមពី «យុវជនសុឆន្ទៈស្អាត» ចំនួន២០០នាក់។
អ្នកទាំង២០០នាក់នោះ គឺជាអ្នកនាំសាររបស់យុទ្ធនាការ និងបំពេញការបារស្ម័គ្រចិត្ត ដោយយោងទៅតាមផែនការសកម្មភាព ៩ធំៗរួមមាន៖ ការអប់រំផ្សព្វផ្សាយនៅតាមគ្រឹះស្ថានអប់រំទាំង និងឯកជនចំនួន ៣៤កន្លែង, វេទិកាវោហារសព្ទជាសាធារណៈ, ការបំផុសយុទ្ធនាការតាមរយៈ Social media Challenge «ផ្ទះខ្ញុំស្អាត ភ្នំពេញស្អាត», ការបង្កើតកម្មវិធីប្រកួតប្រជែងវីដេអូអប់រំខ្លី, ការផ្សព្វផ្សាយតាមរយៈការបិទស្ទីគ័រ «ស្អាត» និងជំរុញការទទួលយកទស្សមាទាន »ស្អាត» ឲ្យបានទូលំទូលាយ, បន្តការផ្សព្វផ្សាយបទចម្រៀងភ្នំពេញស្អាត និងឃ្លីបវីដេអូតុក្កតាខ្លីអប់រំពីការថែរក្សាអនាម័យទីក្រុង តាមរយៈការផ្សព្វផ្សាយតាមទូរទស្សន៍ និងបណ្ដាញសារព័ត៌មាន។ល។
គោលបំណងដ៏សំខាន់នៅក្នុងយុទ្ធនាការនេះ គឺសំរាមមិនមែនជារបស់នរណាម្នាក់ ពោលគឺវាកើតចេញពីយើងទាំងអស់គ្នា ដែលទាមទារឲ្យមានការចូលរួមចំណែកទទួលខុសត្រូវរួមគ្នា ក្នុងទិសដៅរួមគ្នា គឺ «ស្អាត» បានន័យថា គ្មានសំរាមពាសវាសពាសកាល។ យុទ្ធនាការភ្នំពេញស្អាត នឹងធ្វើយ៉ាងណាឲ្យប្រជាពលរដ្ឋផ្លាស់ប្ដូរឥរិយាបថ របស់ប្រជាពលរដ្ឋ ឲ្យចេះគ្រប់គ្រងកាកសំណល់ ក្នុងប្រទេសកម្ពុជា ជាពិសេសគឺ រាជធានីភ្នំពេញ ក្រោមពាក្យស្លោក៖ «សំរាមមិនធ្លាក់ដល់ដី ភ្នំពេញកាន់តែប្រពៃ»។
នៅក្នុងពិធីបើកយុទ្ធនាការដ៏ធំសម្បើមនេះ មានការចូលរួមពីសំណាក់គណៈអធិបតី ឯកឧត្ដម ហ៊ុន ម៉ានី សមាជិកនៃរដ្ឋសភា និងជាសហស្ថាបនិក «គម្រោងស្អាត»ឯកឧត្ដម George EDGAR ឯកអគ្គរាជទូតសហភាពអឺរ៉ុបប្រចាំប្រជាណាចក្រកម្ពុជា ឯកឧត្ដម អ៊ាង សុផល្លែត រដ្ឋលេខាធិការ ក្រសួងបរិស្ថាន ព្រមទាំងឯកឧត្ដម ហួត ហៃ អភិបាលរងរាជធានីភ្នំពេញ ។ ក្នុងនោះ ក៏មានការចូលរួមពីបណ្ដាដៃគូពាក់ព័ន្ធ និងម្ចាស់ឧបត្ថម្ភនៃគម្រោងភ្នំពេញស្អាត ព្រមទាំងសមាជិក សមាជិកា នៃក្រុមការងារប្រតិបត្តិគម្រោងស្អាត យុវជនសុឆន្ទៈស្អាត សិល្បករ សិល្បការិនី ដែលទាំងអស់មានចំនួនសរុប ១៥០នាក់។
«គម្រោងស្អាត» ត្រូវបានបង្កើតឡើងនៅក្នុងខែវិច្ឆិកា ឆ្នាំ២០១៧ ដោយសហស្ថាបនិកចំនួន៦រូប ដែលមកពីស្ថាប័នផ្សេងៗគ្នា រួមមាន១៖ ឯកឧត្ដម ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា ទី២៖ លោក ជី សីលា អគ្គនាយកប្រតិបត្តិក្រុមហ៊ុន Sabay ទី៣៖ លោកស្រី ជា ផល្លា អគ្គនាយិកាប្រតិបត្តិក្រុមហ៊ុន Emerald Plus ទី៤៖ លោកស្រី ហេងធីតា អគ្គនាយិកាផ្នែកសេវាកម្មហិរញ្ញវត្ថុនៃធនាគារ CIMB Cambodia PLC ទី៥៖ លោក ហៃ ភិរម្យ អគ្គនាយកក្រុមហ៊ុន Bosch នៅក្នុងប្រទេសកម្ពុជា និងទី៦៖ លោកស្រី ទេព កូលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ (PPIU)។
គម្រោងភ្នំពេញស្អាត មានការចូលរួមគាំទ្រដោយ ក្រសួងអប់រំយុវជន និងកីឡា, ក្រសួងបរិស្ថាន, ក្រសួងទេសចរណ៍, គណៈកម្មាធិការជាតិវាយតម្លៃទីក្រុងស្អាត, សាលារាជធានីភ្នំពេញ, សភាពាណិជ្ជកម្មកម្ពុជា, សមាគមសហគ្រិនស្ត្រីកម្ពុជា, សមាគមភោជនីយដ្ឋានកម្ពុជា, សភាពាណិជ្ជកម្មអឺរ៉ុប, សមាគមសហគ្រិនវ័យក្មេង និងសមាគមនិស្សិតវិទ្យាសាស្ត្រសេដ្ឋកិច្ច និងពាណិជ្ជសាស្ត្រជាតិនៅកម្ពុជា (AIESEC) និងស្ថាប័នផ្សេងៗទៀត៕
