បួនឆ្នាំនេះ មហាសេដ្ឋីអចលនៈទ្រព្យ ហុង ពីវ បរិច្ចាគលុយប៉ុន្មានលានដុល្លារដល់ពេទ្យគន្ធបុប្ផា?

2019-02-27 09:59:39
ព័ត៌មាន

2019-02-27 09:59:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ច្រើនឆ្នាំមកហើយ ដែលអ្នកឧកញ៉ា ហុង ពីវ អគ្គនាយកក្រុមហ៊ុនពិភពថ្មីគ្រុប និងក្រុមគ្រួសារបានបរិច្ចាគថវិកាផ្ទាល់ខ្លួនដ៏ច្រើនមហាសាល ដើម្បីបម្រើដល់ការងារសង្គម ពិសេស គឺការបរិច្ចាគដល់មន្ទីរពេទ្យគន្ធបុប្ផា។ ជាក់ស្តែងឆ្នាំ ២០១៩ នេះ លោកបានបរិច្ចាគថវិកា ២ ១៨៨ ៨៨៨ ដុល្លារ។ ថវិកាជាង ២លានដុល្លារ នេះគឺជាការបរិច្ចាគលើកទី៤ ហើយ ពោល គឺគិតចាប់តាំងពីឆ្នាំ ២០១៦ រហូតដល់ ឆ្នាំ២០១៩ នេះ។

ការបរិច្ចាគថវិកាដ៏មហាសាល និងច្រើនជាងគេ នៅក្នុងប្រទេសកម្ពុជា ជូនដល់មន្ទីរពេទ្យគន្ធបុប្ជា

លើកទី១ ត្រូវបានធ្វើឡើងកាលពីថ្ងៃទី ២៩ ខែមករា ឆ្នាំ២០១៦ មានទឹកប្រាក់ចំនួន១ លានដុល្លារ។
លើកទី២ នៅថ្ងៃទី០៦ ខែមករា ឆ្នាំ២០១៧ មានចំនួន ២ លានដុល្លារអាមេរិក ជូនផ្ទាល់ដល់លោកវេជ្ជបណ្ឌិតបេអាត រីចឆ្នឺរ (Beat Richner) អតីតស្ថាបនិក និងជាប្រធានមន្ទីរពេទ្យគន្ធបុប្ផា។
លើកទី៣ ត្រូវបានធ្វើឡើងនៅថ្ងៃទី១៧ ខែមករា ឆ្នាំ២០១៨ ចំនួន ២ ១៦៨ ៨៨៨ ដុល្លារអាមេរិក និង
លើកទី៤ នៅថ្ងៃទី២៨ ខែមករា ឆ្នាំ២០១៩ ចំនួន ២ ១៨៨ ៨៨៨ ដុល្លារ។ ដូច្នេះសរុបទាំងបួនលើក អ្នកឧកញ៉ា បានបរិច្ចាគថវិកាដល់មន្ទីរពេទ្យគន្ធបុប្ផាប្រមាណ ៧ ៣៥៧ ៧៧៦ ដុល្លារអាមេរិក។

មន្ទីរពេទ្យគន្ធបុប្ផា មានចំនួន ៥ទីតាំង នៅក្នុងនោះ មាន៤ទីតាំងនៅក្នុងរាជធានីភ្នំពេញ និង១ទីតាំងនៅក្នុងខេត្តសៀមរាប ហើយក្នុងមួយថ្ងៃៗ មន្ទីរពេទ្យគន្ធបុប្ផា បានទទួលព្យាបាលកុមារ ចាប់ពីចំនួន ១ ៦០០នាក់ ទៅ ២ ០០០ នាក់ ដោយមិនគិតថ្លៃសេវាអ្វីទាំងអស់។ តាមការបញ្ជាក់របស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីពេលកន្លងមកឱ្យដឹងថា មន្ទីរពេទ្យនេះ ចំណាយថវិកា ប្រមាណ ៤២លានដុល្លារ ក្នុង១ឆ្នាំៗ។

អ្នកឧកញ៉ាហុង ពីវ មិនត្រឹមតែជួយដល់មន្ទីរពេទ្យគន្ធបុប្ផា ប៉ុណ្ណោះទេ តែកន្លងមក លោកបានជួយដល់កិច្ចការមនុស្សធម៌ជាច្រើននៅក្នុងព្រះរាជាណាចក្រកម្ពុជា និងទទួលបានកោតសរសើរ និងការគាំទ្រយ៉ាងខ្លាំង ពីមហាជនចំពោះទឹកចិត្តសប្បុរសធម៌របស់អ្នកឧកញ៉ារូបនេះ៕