- 2019-03-23 08:17:26
- សេដ្ឋកិច្ច
ឥណ្ឌាប្រើសេវាដឹកជញ្ជូនម្ហូបដ៏គួរឲ្យចាប់អារម្មណ៍បំផុតលើលោក ដែលគ្រប់គ្នាមិននឹកស្មាន
- 2019-03-23 08:17:26
- ចំនួនមតិ 0 | ចំនួនចែករំលែក 0
ឥណ្ឌាប្រើសេវាដឹកជញ្ជូនម្ហូបដ៏គួរឲ្យចាប់អារម្មណ៍បំផុតលើលោក ដែលគ្រប់គ្នាមិននឹកស្មាន
ចន្លោះមិនឃើញ
ដូចមនុស្សរាប់លាននាក់ដែលចូលមកទីក្រុងម៉ុមបៃដើម្បីធ្វើការជារៀងរាល់ថ្ងៃ ជីវភាពប្រចាំថ្ងៃរបស់លោក Santosh Apte ពិតជាគួរឲ្យចាប់អារម្មណ៍និងមិនខុសពីបុគ្គលិកដទៃទៀតឡើយ។ Apte ធ្វើការនៅក្នុងក្រុមហ៊ុននាំចេញសំលៀកបំពាក់ប្រពៃណីឥណ្ឌានៅទីក្រុងមុមបៃ។
រៀងរាល់ថ្ងៃភរិយារបស់គាត់ចម្អិនអាហារថ្ងៃត្រង់ និង ផ្ញើពីផ្ទះមកឲ្យលោក។ Apte បានប្រាប់ The Telegraph ថាលោកមិនអាចធ្វើដំណើរទៅញ៉ាំបាយថ្ងៃត្រង់នៅផ្ទះ ឬ ប្រពន្ធគាត់ក៏មិនងាយនឹងយកម្ហូបមកផ្ញើឲ្យគាត់ដែរ ពីព្រោះពួកគេត្រូវធ្វើដំណើរដោយរថភ្លើងហោចណាស់២ម៉ោងពីផ្ទះទៅកន្លែងធ្វើការ។
ទោះជាមកដល់សម័យទំនើបទៅហើយក្តី ឥណ្ឌានៅតែប្រកាន់ខ្ជាប់ទំនៀមទម្លាប់ប្រពៃណីដែលស្ត្រីនៅតែដើរតួនាទីសំខាន់ជាមេផ្ទះ ខណៈបុរសគឺជាអ្នកធ្វើការក្រៅផ្ទះ។
អាហារថ្ងៃត្រង់របស់ Apte រួមជាមួយនឹងមនុស្សជាង ២០០ ០០០ នាក់ ទៀតត្រូវបានដឹកតាមសេវាដឹកជញ្ជូនដ៏គួរអោយចាប់អារម្មណ៍បំផុតលើពិភពលោក ដែលគេឲ្យឈ្មោះហៅថា dabbawalas ដែល Dabba ជាភាសាឥណ្ឌាមានន័យថា "ប្រអប់បាយ" និង wala មានន័យថា "អ្នកដឹកជញ្ជូន"។
Dabbawala បង្កើតឡើងដំបូងតាំងពីឆ្នាំ ១៨៩០។ បច្ចុប្បន្ន អ្នកដឹកជញ្ជូនជាង ៥ ០០០ នាក់កំពុងដឹកជញ្ជូនម្ហូបទៅកាន់កន្លែងធ្វើការជាច្រើនកន្លែងក្នុងទីក្រុងម៉ុមបៃនៅពេលព្រឹក និង ត្រលប់មកវិញនៅពេលថ្ងៃជាមួយប្រអប់បាយទទេ។
អតិថិជនម្នាក់ៗត្រូវបង់ថ្លៃសេវាដឹកជញ្ជូនចន្លោះពី ៦ ដុល្លារ ទៅ ២០ដុល្លារក្នុង១ខែៗ ហើយអ្នកជញ្ជូនទទួលបានប្រាក់ខែខ្ទង់ ២៥០ ដុល្លារ។
ជាមួយនឹងអាហារថ្ងៃត្រង់ប្រហែល ១២០ តោនក្នុង១ថ្ងៃៗ ការដឹកជញ្ជូនដោយមិនប្រើកុំព្យូទ័ររបស់ក្រុមហ៊ុន Deliveroo ទំនងដូចប្រថុយប្រថាន តែមែនទែនទៅកំហុសក្នុងការដឹកជញ្ជូនខុសរបស់ពួកគេតិចតួចបំផុតគឺ ១ លើ ៨លាន។ ប្រភពខាងលើបន្ត។
អ្នកដឹកជញ្ជូនអាហារថ្ងៃត្រង់ចេញពីផ្ទះមួយទៅផ្ទះមួយដើម្បីប្រមូលបាយម្ហូបសំដៅទៅការិយាល័យដែលអាហារទាំងនោះត្រូវបានគេកំណត់គោលដៅ ឆ្លងកាត់ចរាចរណ៍ដ៏កកកុញបំផុតក្នុងទីក្រុងម៉ុមបៃ ដែលជាលំនៅឋានរបស់មនុស្សជាង ២៤ លាននាក់។
Dabbawala ដែលជិតឈានដល់ខួបទី១៣០ឆ្នាំនៃការបង្កើត គឺមិនមែនត្រឹមគំនិតក្នុងការដឹកជញ្ជូនអាហារថ្ងៃត្រង់ទៅកន្លែងធ្វើការប៉ុណ្ណោះទេ ប៉ុន្តែវាជាផ្នែកមួយដ៏រស់រវើកនៃវប្បធម៌ឥណ្ឌា ស្តីពី គំនិតអាហារថ្មីៗទើបចំអិនពីផ្ទះរៀងរាល់ព្រឹកដោយក្តីស្រលាញ់។ ប្រភពខាងលើបន្ថែម៕