អភិបាលខេត្តនៅអ៊ីរ៉ាក់ ត្រូវបណ្ដេញចេញក្រោយហេតុការណ៍លិចសាឡាងសម្លាប់មនុស្សជាង ១០០នាក់

2019-03-25 03:02:42
ព័ត៌មាន

2019-03-25 03:02:42
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋសភារបស់អ៊ីរ៉ាក់ បានធ្វើការសម្រេចបណ្ដេញអភិបាលខេត្ត Nineveh ចេញពីដំណែងក្រោយមានហេតុការណ៍លិចសាឡាងសម្លាប់មនុស្សជាង ១០០នាក់កាលពីថ្ងៃព្រហស្បតិ៍កន្លងទៅដែលបណ្ដាលឲ្យប្រជាជនមានការខឹងសម្បារយ៉ាងខ្លាំង។

យោងតាម AFP ឲ្យដឹងថា ភាគច្រើននៃជនរងគ្រោះដែលបានស្លាប់គឺជាស្ត្រី និងកុមារដែលកំពុងប្រារព្ធបុណ្យ Nowruz និងទិវាមាតា។ នាយករដ្ឋមន្ត្រី Adel Abdul Mahdi បានកោះប្រជុំសមាជិកសភាដើម្បីបោះឆ្នោតទម្លាក់អភិបាលខេត្ត Nineveh លោក Nawfel Akoub ចេញពីដំណែងដោយអះអាងថាជាការធ្វេសប្រហែស និងកំហុសជាក់ស្ដែងរបស់អភិបាលខេត្តរូបនេះ។ លោក Akoub ត្រូវបានទទួលរងនូវការខឹងសម្បារពីសាច់ញាតិរបស់ជនរងគ្រោះដែលបានចោទប្រកាន់លោកពីបទពុករលួយ និងភាពមិនទៀងត្រង់។

ទោះបីជាគ្មានការបញ្ជាក់ជាផ្លូវការពីមូលហេតុដែលបណ្តាលឱ្យមានគ្រោះថ្នាក់នេះក៏ដោយ អ្នកស្រុកបាននិយាយថាអាចបណ្ដាលមកពីផ្ទុកមនុស្សលើសចំណុះ ដោយសារសាឡាងនេះផ្ទុកមនុស្សបានត្រឹម ៥០នាក់ប៉ុណ្ណោះ។ ជាមួយគ្នាដែរ លោកនាយករដ្ឋមន្ត្រីបានធ្វើការព្រមានកាត់ទោសមន្ត្រី និងអភិបាលខេត្តដែលពុករលួយទាំងអស់ ខណៈពេលដែលមនុស្ស ១៦នាក់ត្រូវបានចាប់ខ្លួនដើម្បីស៊ើបអង្កេតពីមូលហេតុដែលបណ្ដាលឲ្យលិចសាឡាងនេះ។

យ៉ាងណាមិញ រដ្ឋសភាបានប្រកាសថាសាច់ញាតិ និងក្រុមគ្រួសារនៃជនរងគ្រោះដែលបានស្លាប់ទាំងអស់នឹងទទួលបានសំណងផ្នែកហិរញ្ញវត្ថុ ក៏ដូចជាបើកផ្លូវសម្រាប់នីតិវិធីតុលាការផងដែរ៕